I. Samuela 19 - Iaai Bible 1901 (New Caledonia)

¹ KE haba Saulo ame ha kö Jonathana a nokon, me lathnyabainy hia, mʼ ödrin e he ka hlingö Davita.

² Ke so bi Jonathana ame hnyok kö Davita. Me Jonathana ame thumetu Davita, ka habe, Cica Saulo ame elâm he ka hlingö u: anyin a wale ö u wâ wia nyi, ke me laba hnyi dok ae iyong, me ikhölö:

³ ke oge me he ka he me tha tot me cica hnyi utkânâ u me he ka ikhölö hnyin, ke oge me he ka ûhnenamö me cica gam; me oge me he ka thumetu u ge hnok hna he ka wâ.

⁴ Ke Jonathana ame ha soi Davita kö Saulo a kamen, me ha kâu, ka habe, ca he than ka kong hwakecâm kö Davita athnyabaem; anyin ae ca kong hwakacin köu, ke e ti so hmonyin anyin je huliwa köu:

⁵ ke e ame ip anyin möt hnyi hnyamen, me hlingâ at Filisiti, me Iehova ame omelö gan hmâ Isaraela hia thithö: u je wâ e, me senyin: ke anyin a ieû u me he ka kong ka dra ae ba hnyikongon, he ka hlingö Davita ke ba can?

⁶ Ke a long ut Saulo hofuc ho Jonathana: ke Saulo ame khemanyin, ka habe, Kia inya Iehova, adre me ca he ka hlingâ.

⁷ Ke Jonathana ame hawo Davita, ke Jonathana ame thumeto ge ta je hofuc hia eling. Ke Jonathana ame hum Davita kö Saulo, ke e ame tha e mē helâ me ehac.

⁸ Ke ame kû hmetu thö vat: ke Davita ame he, me vat me at Filisiti, me hlingʼ ödrin, ke gan hmâ hna hlingâ; ke adre, me kec gan.

⁹ Ke e bi hnyi hu Saulo hanu ae kong ûnyi ga. Iehova, ke e ame laba hnyi umen uma, ke e hnyi hnyamen dân ö: ke Davita ame kokot ge hnyamen.

¹⁰ Ke Saulo ame elâm he ka dâ fineci Davita ka hnyi hnyeige uma ge ö; ke e ame naûâ ûheny hnyi hnyimakö Saulo, ke ame hwâdâ thö ö hnyi hnyeige uma: ke Davita ame wadring, me kec möt hnyi lit eling.

¹¹ Ke haba Saulo ame kunâ tavat ka hnyi uma umo Davita he ka tuö e, me hlingâ hnyi hnyomakatu: ke ame thumetu Davita hnö Mikala a âiân, ka habe, U je ne ca omeli u bi eâu hnyinghet, adre me he ka hlingö u nyi.

¹² Ke haba Mikala ame öû Davita ûheny hnyi mamalama, me ame he, me kec, me möt.

¹³ Ke Mikala ame hom idola, me ip hon hna mokut, me ip bwiny leûnen got hnân uthunöng, me tube ge mano.

¹⁴ Ke Saulo ame kunâ tavat he ka hum Davita, me e ame ha, ka habe, E mok.

¹⁵ Ke Saulo ame kunâ tavat he ka ö Davita, me ha, ka habe, He thö ka vadren jem könya hon hna mokut me inye he ka hlingâ.

¹⁶ Ke a didro tavat, me wâ bi, idola ame mokut hon hna mokut, me bwiny leûnen got hnân uthunöng.

¹⁷ Ke haba Saulo ame ha kö Mikala, ka habe, Ieû gam u je iyawö nya helâe, me hna but iwahnaihmiöny mönya, me me kec möt? Ke Mikala ame thu kö Saulo, ka habe, E ame ha könya, ka habe, Hnö nya but; hnân eû oge ma he ka hlingö u?

¹⁸ Ke Davita ame kec möt me he Rama ai kö Samuela, me thumeto e ge ta je ûnyi hia ame hia but ânyâ kâu Saulo. Me e ame tha he, me laba me Samuela hnyi Naioth.

¹⁹ Ke adre me thumetu Saulo, ka habe, Wâ bi, e but Davita Naioth hnyi Rama.

²⁰ Me Saulo ame kunâ tavat he ka hum Davita: ke ödrin e wâ bunyen perofeta adre me perofeta, kʼ ame tot Samuela helâ me homakan ködrin, me ame o hanon Khong ka tavat a je atö Saulo, mʼ ödrin e hnyi perofeta minya.

²¹ Me adre me thumetu Saulo, me e ame kunâ ke je hnyat, me ödrin e hnyi perofeta minya. Ke Saulo ame kunâ ke je hnyat minya a okuniny, me ödrin e hnyi perofeta minya.

²² Me e ame he Rama ai me o ka hnyi an ae gan hnyi Seku: ke e ame hnei, ka habe, Ewa Samuela me Davita? Me haingen ke at, ka habe, Wâ bi, ödru but hnyi Naioth hnyi Rama.

²³ Me e ame he kâ e Naioth ai hnyi Rama: ke ame o minya kâu hanon Khong, me e ame perofeta tot ke ne o but Naioth hnyi Rama.

²⁴ Ke e ame uny jut je ûkhaûen, ke e ame hnyi perofeta minya hnyi hnyimakö Samuela, me mokut ke ba ûkhaû hnyi bong hia eling me lit hia. Anyin a wale adre me ha, ka habe, Hawa, tha Saulo minya but me je perofeta?