I. Samuela 18 - Iaai Bible 1901 (New Caledonia)

¹ KE haba hnyi ûen e ame umo fuc kö Saulo, me haba hnyeku Jonathana ame hwege hnyok kö Davita, ka ame betenge kâu Jonathana helâ me e ame ka hnyokâ hing hanon bi.

² Ke haba Saulo ame hom behânâ hnyi bong eling, kʼ ame ca hna he ka hmetu ka hnyi hnyaban kamen.

³ Me haba Jonathana me Davita ödru me ûhi-hinyköu, anyin a e ame betenge gan helâ me e ame betenge kâu bi.

⁴ Me Jonathana ame uny jut anyin ûkot wale e ame khavâ, me ham kö Davita me me khaûen bi, me anyin minya hele vat, me cafana, me wen minya hnyekon.

⁵ Ke Davita ame labö he ka hnyi je hna kunâ kâu hnö Saulo, me metâ hwakecin: ke Saulo ame otilâ e hon aten vat, kʼ ame so ka tavat hia, me lathnyabai Saulo.

⁶ Ke hnyi ûen adre me o, wale Davita ame hmetu ûheny hnyi hna kot at Filisiti, me ame he omomo ûnyi hnyi ta je taun hia hnyi Isaraela, kʼ ödrin e khumöng ma bibiâ he ka ûkhanö me Saulo, me je bwinybet, me senyin, me je ûnyi khumöng.

⁷ Ke je momo ödrin e sithwanân hnyi bibiâ, ha habe, Saulo ame hia but kot haniny je thauzan, Ke Davita bi, haniny je ten thauzan,

⁸ Ke Saulo ame hmonyin gan hmâ, ke kong kâu hofuc eling; ke haingen, ka habe, Ödrin e hna je ten thauzen kö Davita, ke ödrin e hna könya je thauzan thibi: awe, ieû hmetu bi, ama hobi kâu but dökhu?

⁹ Ke Saulo ame ecmakö Davita hwân hnyi bong eling.

¹⁰ Ke nyi ame o but kö Saulo hanu ae kong ûnyi ge Kkong, ke e ame perofeta hnyi wanben umen uma: ke Davita ame kokot ge hnyamen helâ me ta je bong: ke e hnyi hnyamö Saulo ö.

¹¹ Ke haba Saulo ame khûâ ö; anyin a haingen, ka habe, Oge me he ka dâ fineci Davita ka hnyi hnyeige uma. Ke Davita ame olo naûâ anyin ö.

¹² Ke haba Saulo ame outö Davita anyin a e bi Iehova unyin, ke e hia but unyi Saulo.

¹³ Ke Saulo ame ûsâkâûö mē, me otilâ e hnân taben thauzan; ke e ame didrut me didro hnyi hnyimakan tavat.

¹⁴ Ke Davita ame ânyâ metâ hnyi ta je hwakecin; ke e bi Iehova unyin.

¹⁵ Ke a wâ but Saulo a e ame ânyâ metâ me e ame outen.

¹⁶ Ke ame betenge Isaraela hia me Juda hia ga Davita; anyin a e ame didrut me didro hnyi hnyimaködrin.

¹⁷ Ke Saulo ame ha kö Davita, ka habe, Wâ bi nokuk hlu a atö jia Meraba, oge me he ka ham köu me âiâm: ke so bi u me he ka hwege bi singik, me vâtâ je vat anyi Iehova. Anyin a haingö Saulo, ka habe, E so e me ca kot e ge hnyamok, ke so bi hamen hnyamen at Filisiti he ka kot.

¹⁸ Ke haingö Davita kö Saulo, ka habe, Iny ia? ke ieû soik, me lap anyi cica hnyi Isaraela, me inye he ka ûngon than?

¹⁹ Ke hnyi ûen adre me he ka ham Meraba hlu nöku Saulo kö Davita, me adre me ham bi kö Aderiela at Mehola me âiân.

²⁰ Ke haba Mikala hlu nöku Saulo ame betenge ga Davita: me ödrin e thumetu Saulo, ke e so kâu.

²¹ Ke ame ha Saulo, ka habe, Oge me he ka ham e kâu, me me hai hnyamen at Filisiti kâu. Anyin a wale Saulo ame ha kö Davita, ka habe, U me he ka ûnguk hnyi bong ang hnyi ûen a loiny.

²² Ke Saulo ame hûna ka lathnyabainy, ka habe, Ûhnenamö duöng ju me Davita, me ha, ka habe, Wâ bi, than ame weny u, kʼ ame betenge gam lathnyabainy hia: ke u me he ka ûngon than walang ang.

²³ Me haba lathnyabai Saulo ödrin e ha je hofuc eling hnyi hnyi-könyö Davita. Ke haingö Davita, Hawa, öbun e ûnykûme e hâhâ he ka ûngon than, ke inya at ae ba ta ûnyi kʼ iny ûnyibaû?

²⁴ Ke haba lathnyabai Saulo ödrin e thumeto e, ka habe, Davita ame ha ta je hofuc helâe.

²⁵ Me haingö Saulo, ka habe, Öbun e he ka ha helâng kö Davita, ha habe, E ca weny bi than sâniny hlu, ke so bi, khaca haded je unen unyin at Filisiti, me me bi hwaban je iwahnaihmiöny me than. Anyin a haba Saulo ame ûnykûme he ka kuc Davita ge hnyamen at Filisiti.

²⁶ Ke haba lathnyabainy, ödrin e thumetu Davita ge ta je hofuc eling, me ame so kö Davita he ka ûngon than. Ke tiga ca um bi je bong;

²⁷ me haba Davita ame tot me he, a e me anyin vat me kot at Filisiti a tu haded; ke Davita ame hom je unen unyidrin a ka e ka than, me me he ka ûngon than. Me Saulo ame ham Mikala a nokon hlu kâu me âiân.

²⁸ Ke a wâ but Saulo, me wâhmakhmeto a e bi Iehova unyi Davita; ke haba Mikala hlu nöku Saulo ame betenge kâu.

²⁹ Ke ame ot tot Saulo ga Davita; ke iwahnaihmiony bala Saulo me Davita.

³⁰ Ke ame he but je thaniny at Filisiti: ke hwân hnyi ûen ödrin e he but, me Davita ame ânyâ metâ hon lathnyabai Saulo; me ame lung gan hmâ ien.