I. Samuela 17 - Iaai Bible 1901 (New Caledonia)

¹ KE haba at Filisiti adre me ûkhacaköuâ anyidra je utbavat he ka vat, ke adre me ûkhacaköu hnyi Soko, i Juda, me hunuma knyi wanben Soko me Azeka hnyi Efesi-damim.

² Ke Saulo me at Isaraela adre me ûkhacaköu me hunuma hnyi hnyigöulen bucen e Ela, me tot metâ he ka vat me at Filisti.

³ Ke haba at Filisiti adre me tot hon bucen hnyi ke keihen, kʼ ame tot at Isaraela hon bucen hnyi ke keihen; ke e bi thop hnyi wanbödra.

⁴ Ke ame he but at ae nua hwegien ûnyi hnyi hna hunuma anyin at Filisiti, adre hwenyi ien Goliatha, at Gatha, haba ibeûen me siks je kubit ke khaca hnyam.

⁵ Ke e ame bicâ hnabinybak bras, me khavâ ûkhaûen vat a fao; ke faiv thauzan je sekel bras ihmakiny ûkhaûen.

⁶ Ke e hu li unen bras hnyi li can, me ke unen bras hnyi wanben li bajebenyin.

⁷ Ke haba taben anyin ö, me helâ me ûtoiny ûnyi hnân hwâwâ mano; ke haba homakan anyin ö, me, siks haded je sekel fao ihmakiny: kʼ ame he hnyi hnyimakan, at ame hom tilâ anyin bec.

⁸ Ke e ame tot me hongot ka je utbavat anyin at Isaraela, me ha, kodra, ka habe, Ieû gabun öbun e ok he ka tot metâ hnyi vat? hawa, ca at Filisiti bi nya, ke öbun lathnyabai Saulo? Uca thö ke at gabun, me hamen he ka utut könya.

⁹ Ame ne khana he ka vat mönya me hlingö nya, awe, ohmun e be ka bi athnyaba köbun: ke oge ne tuk me hlingâ, awe, öbun e he ka bi athnyaba kohmun me huliwa kohmun.

¹⁰ Haingen at Filisiti, ka habe, Inya oge me humbasö je utbavat anyi Isaraela hnyi bong ang; kunâ jem könya ke at mʼ ohmu me he ka ûkûc.

¹¹ Ke haba Saulo me at Isaraela hia adre me long ta je hofuc hwan Filisiti, me ödrin e öbubuny me ödrin e gan hmâ ot.

¹² Ke haba Davita, me nokon at Eferatha, adre hwenyi ien Jese, at Bethe-leema-juda; ke eit lakon obaga: ke e at ae hingat ut hnyi je bong bongu Saulo, ke e hingat ae hnathu unyidra.

¹³ Ke ame tha he hotu Saulo ka hnyi vat kun ta laku Jese a lakon ae gan: Ke haba ien ta lakon a kun ödrin e hnyi vat, me jia Eliaba a atö, me Aminadab a ûtangköu mē, me Sama a kuniny.

¹⁴ Ke Davita a wakeiat: ke ame he hotu Saulo ta hnyat a kun ae gan.

¹⁵ Ke Davita ame labö he ûheny unyi Saulo he ka tuö je mamoe haleny kamen hnyi Bethe-leema.

¹⁶ Ke ame labö hakekeny at Filisiti hnyi je hnyomakatu me sahac, me omanenâ e bi hnyi fâte je bong.

¹⁷ Ke haba Jese ame ha kö Davita a nokon, ka habe, Hom dö walang ang ka latuhâm a kun, khaca efa hwit eang adre le, me je areto eang a ten, me hom mweimweiâ ka hnyi hna hunuma ka latuhâm a kun:

¹⁸ me hom je fromage a ten ka taben anyidrin je thauzan, me wâ hawa ge latuhâm a kun, me kap anyidrin haten.

¹⁹ Ke Saulo, mödrin, me at Isaraela hia thithö ödrin e labö vat me at Filisiti hnyi hnyigöulen bucen Ela.

²⁰ Ke Davita ame vesâkong, me hna je mamoe ka at ame tuö, me hom je ûnyi me he, helâ me Jese ame hûna kâu; ke a ame o but hnyi hnen je kât kʼ ame tiga he ka hnyi vat je utbavat ke ödrin e tiga sue.

²¹ Ke haba at Isaraela me at Filisiti ödrin e ve tot metâ, ke vat cicö ke vat.

²² Ke Davita ame hna anyin ta je ûnyi ka at ame tuö ta je ûnyi, me wadring ka hnyi hna vat, me he me iouny me latuhan.

²³ Ke e ame tiga ûhnenamö mödrin, me wâ bi, ame o but at ae beönua hwegien, at Filisiti ûheny Gatha, Goliatha ien, ûnyi hnyi je vat anyin at Filisiti, me fuc helâ me hna labö ha: ke a long ut Davita.

²⁴ Ke haba at Isaraela hia ödrin e wâ at, me ödrin e kec gan, me ot gan hmâ.

²⁵ Me ame ha at Isaraela, ka habe, Öbun e wâ at eang ame o? ame o he ka humbasö at Isaraela: ke haba at ame he ka hlingâ, me ame he than ka otenâ gan hmâ omjeû, me ham kâu nokon hlu, ke adre me he ka hna gufa lap anyin kamen hnyi Isaraela.

²⁶ Haba Davita ame ha ka tavat adre me tha tot mē, ka habe, Ieû adre me he ka ânyâ ka at, at ame he ka hlingâ at Filisiti e, me ohia hmehma ûnyi ge at Isaraela? anyin a ia at Filisiti ang adre ca peretomonâ, me e ame he ka humbasö je vat anyin Khong ae möt?

²⁷ Ke ame thu kâu tavat helâe ge ta je ûnyi, ka habe, Helâe adre me he ka ânyâ ka at ame he ka hlingâ.

²⁸ Ke haba Eliaba a tuhan ame long hnyi ûen e ame ûhnenamö me tavat; kʼ ame ubâhlâ hmonyin anyi Eliaba kö Davita me e ame ha, ka habe, U je o eang kâ ieû? me u je hna kö ia je ong mamoe hnyi hnyebuba? Oge me wâ bi gan gam, me hnyekom ae monu; anyin a u je he jem he ka hnyi wâ vat.

²⁹ Ke haingö Davita, ka habe, Ieû oge ânyâ walang ang? Hawa, e ba can?

³⁰ Ke e ame hwio ûnyi gan, me ha helâe ka ke at: kʼ ame thu hmetu bi kâu tavat helâ me hofuc a bân.

³¹ Ke a long ut tavat hofuc ho Davita, me ödrin e thumetu Saulo; me e ame hawâ.

³² Ke Davita ame ha kö Saulo, ka habe, Ca he ke at ka ot gan; haba inya athnyabaem oge me he ka vat me at Filisiti ang.

³³ Ke haingö Saulo kö Davita, ka habe, E ca khanö u he ka he ûcon at Filisiti eling me vat mē: anyin a u thoth ke e at vat hwân e tiga thoth ke ne o but ang.

³⁴ Me Davita ame ha kö Saulo, ka habe, Inya athnyabaem oge me tuö je mamoe hale cica; kʼ! ame ne o but liona ame ne bea, me hom ong mamoe ûnyi hnyi hnahat meno,

³⁵ me oge me hnu, me kot, me omelö ûnyi hnyi hnyimen: ke e ame tot könya me oge me kât wainy, me kot, me hlingâ.

³⁶ Inya athnyabaem oge me kot liona me bea; kʼ ame he at Filisiti ang adre ca peritomonâ ka helâ me ke at gadru, anyin a e ame humbasö je vat anyin Khong ae möt.

³⁷ Ke ame ha Davita, ka habe, haba Iehova at ame omeli nya ûnyi hnyi benyin liona me bea, me e ame he ka omeli nya ûnyi hnyi hnyamen at Filisiti eling. Ke haingö Saulo, ka habe, he thö, kʼ ame he Iehova ka tha e mou.

³⁸ Me haba Saulo ame okhavö Davita ge anyin ûkhaû, me obicâ e ge hnabinybak bras, ke e ame okhavâ e ge ûkhaûen vat.

³⁹ Ke Davita ame hûkâlâ anyin hele vat hon ûkhaûen, me e ame hwân he ka he; kʼ ame tiga ca hia but nâ ûnyi e. Me haingö Davita kö Saulo, ka habe, E ca khanö nya he ka he me ta je ûnyi eang; anyin oge me tiga ca nâ. Me Davita ame uny hmetu but.

⁴⁰ Ke e ame hom anyin uci hnyi hnyamen, kʼ ame ûca je veto a thabûng ae haûhaû ûnyi hnyi wagewe, me hitangen hnyi tangen tang, a tangen at tuö mamoe; me koloû hnyi hnyamen: ke e ame hakekeny ka at Filisiti.

⁴¹ Ke ame he at Filisiti, me hakekeny kö Davita; ke ame bân at ame hom tilâ bec.

⁴² Ke ame bwele at Filisiti me ô Davita, me e ame oûnyibâûâ e; anyin a e tiga thöth, ke hngihngidra, me hmanenang hnyimakan.

⁴³ Ke ame ha kö Davita at Filisiti, ka habe, Iny kuli, me u me o könya me je uci? Me haba at Filisiti ame hangö Davita ge je khongon.

⁴⁴ Ke haingen at Filisiti kö Davita, ka habe, Aiö u könya, me oge me he ka ham unyâm ka omeno ame gâ, me omenoiny hnyot.

⁴⁵ Ke haingö Davita ka at Filisiti, ka habe, U me o könya me hele vat, me ö, me ö a telat; ke inya oge me o köu hnyi iö Iehova tuhan sabaoth, Khongon je utbavat anyi Isaraela, wale u je hia but humbasö.

⁴⁶ Ame he Iehova ka hnö u ka hnyi hnyamok hnyi bong ang; ke oge me he ka kuc u me subâ degecâ bâm; ke oge me he ka ham unyin je utbavat anyin at Filisiti ka omeno ame gâ, me omeno a binyin hmeledrany hnyi bong ang; me me he hmeledrany hia ka wâhmakhmeto a e bi Khong unyin at Isaraela:

⁴⁷ me me he minya ûkhacaköu eang ka wâhmakhmeto a Iehova ame ca ûhomeli ge hele vat me ö: anyin a haba vat anyi Iehova, me e ame he ka hnʼ öbun ka hnyi hnyamöhmun.

⁴⁸ Ke ame todrö at Filisiti, me be me hakekeny he ka ûkhanö me Davita, me haba Davita ame wadring logot ka hnyi vat he ka ûkhanö me at Filisiti.

⁴⁹ Ke Davita ame inâ hnyamen ka hnyi tang, me hom ûnyi hnyin ke veto, me kûlûâ, me ame hwâdâ hnyi bariny at Filisiti; me ame didrut veto hnyi bariny, me e ame ta but hnyimakan hnyikânâi.

⁵⁰ Me e hwege Davita hon at Filisiti ge koloû me veto, me kot at Filisiti me hlingâ e; ke ba hele vat hnyi hnyamö Davita.

⁵¹ Ke Davita ame wadring me tot hon at Filisiti, me kât anyin hele vat, me oc ut ûnyi hnyi tangen, me hlingâ, me subâ degecâ ban. Ke a wâ but at Filisiti a ga mokcu anyidrin at ae beönua hwegien, me ödrin e kec.

⁵² Me ame todrö at Isaraela me at Juda me sue, me hnu at Filisiti ke ne o but hnyi Gai, me je homagouleny Ekerona. Ke ame ta tot tavat adre ât dö a at Filisiti eû hnyi gethen ame he Saraim ai, ke ne o but hnyi Gatha, me Ekerona.

⁵³ Ke a hmetu lakon Isaraela ûhedra hnyi hna hnu at Filisiti, me ödra adre me sö anyidra ta je ûnyi.

⁵⁴ Ke Davita ame hom ban at Filisiti, me hom e Jerusalema ai; kʼ ame ip omjehen vat eiö hnyi umen ama mano.

⁵⁵ Ke hnyi ûen Saulo ame ô Davita ame he ka ûkhanö me at Filisiti, me e ame ba kö Abinera taben anyin vat, ka habe, Abinera lö, nöku ia hidröu e? Haingö Abinera, ka habe, Kia inya than ae ca khanö nya.

⁵⁶ Ke haingen than, ka habe, Hnö thö, nöku ia thoth e.

⁵⁷ Ke Davita ame hmetu ûheny hnyi hna kot at Filisiti, me Abinera ame hom e, me hom kö Saulo, ke e hnyi hnyamen ban at Filisiti.

⁵⁸ Ke haingö Saulo kâu, ka habe, Hidröu lö, u nöku ia? Me Davita ame thu, ka habe, Inya nöku Jese a athnyabaem at Betheleema.