I. Samuela 16 - Iaai Bible 1901 (New Caledonia)

¹ HABA Iehova ame ha kö Samuela, ka habe, U me he ka tengiö Saulo ke ne o but kehö anyin oge me degecâ me me ca muso at Isaraela? Öunöngötâ thö ânyâm faoiny meno ge wakaco, ke he thö, me oge me he ka kunö u kö Jese at Bethe-leema: anyin a oge hia but penapena ke than hobi könya unyin lakon.

² Ke haingö Samuela, ka habe, Oge me he ka hawa? ame he Saulo ka hlingö nya ame ne löng bi. Haba Iehova ame ha, ka habe, U me he ka tha hom mou ke nokon kau, me ha, ka habe, Oge me o he ka hudo kö Iehova.

³ Ke u me he ka hawo Jese he ka hnyi hanen hut, ke oge me he ka omanenâ köu ûnyi u me he ka ânyâ: ke u me he ka hû hobi könya at oge me he ka ha köu.

⁴ Me Samuela ame ânyâ ûnyi ame ha Iehova, me o hnyi Bethe-leema. Ke haba wahingatiny taun ödrin e ûkhanö me, me öbubuny, me ha, ka habe, U me o hnyi ûsoköu?

⁵ Me haingen, ka habe, Oge me o hnyi ûsoköu he ka bi hut kö Iehova: okabi öbun dö, me tha he thö mönya ka hnyi bi hut. Ke e ame okabi Jese me lakon, me hawʼ ödrin he ka hnyi hanen hut.

⁶ Ke ödrin e o but, me e ame ö Eliaba me ha, ka habe, E hnathu wale at adre hû kö Iehova hnyi hnyimakan.

⁷ Ke Iehova ame ba kö Samuela, ka habe, Ca wâ hnyimakan bi, me ibeûen; anyin ae ca wek bi at e: anyin ame ca wâ ga ʼ Iehova helâ me at; anyin a haba at ame wâ ûnyi ae manen, ke Iehova ame wâ hnyok.

⁸ Me Jese ame hawo Aminadab, me kunâ ka hnyi hnyimakö Samuela. Ke e ame ha, ka habe, Iehova ame ca ûca at ang.

⁹ Me Jese ame kunö Sama he ka he. Ke haingen, ka habe, Iehova ame ca ûca minya at ang.

¹⁰ Ke Jese ame ve kunâ lakon a seven he ka he hnyi hnyimakö Samuela. Me Samuela ame ha kö Jese, ka habe, Iehova ame ca ûca hnyat eang.

¹¹ Me haingö Samuela ko Jese, ka habe, Hawa, e ba minya lakom! Me haingen, ka habe, Khaca biju, wale wakeiat hmonyin ke, wâ bi, e ame tuö je mamoe. Ke haingö Samuela kö Jese, ka habe, Ûkhûnöng do he ka hom: anyin a ötin e ca he ka laba ju ke ne o but e ame o thö.

¹² Ke e ame ûkhûnöng, me hom e. Ke e dra makan, me hmanenang hnyimakan, me so ka wâ. Haba Iehova ame ha, ka habe, Todrö, hû but e: anyin ae at e.

¹³ Ke haba Samuela ame hom faoiny wakaco, me hû e hnyi wanben je liamekeiny mē: me ame o hwege hanu Iehova hu Davita hwân hnyi bong eling. Me Samuela ame tot me he Rama ai.

¹⁴ Me ame hia but he digic Saulo hnen hanu Iehova, me ame ohmakâ e hnen hanu ae kong ûnyi ga Iehova.

¹⁵ Ke haba lathnyabai Saulo ödrin e ha kâu, ka habe, Wâ bi, ame ohmaki u walang ang hanu ae kong ûnyi ge Khong.

¹⁶ E so u me he, tnhömun, ka kunʼ ohmun a lathnyabaem hnyi hnyimâkâm he ka elâm at ae khana he ka kokot kitara: ke e ka o but köu hanu ae kong ûnyi ge Khong, me e ame he ka ânyâ ge hnyamen, me u me he ka so but.

¹⁷ Ke haingö Saulo ka lathnyabainy, ka habe, He thö ka elâm walang ang at ae khana wia ânyâ ûnyi khumöng, me hom jem könya.

¹⁸ Me ame thu ke hidröu me ha, ka habe, Wâ bi, oge hia but wâ ke at nöku Jese, at Bethe-leema, ae khana ânyâ ûnyi khumöng, ke e at ae hwege hmonyin, me at vat, me metâ hnyi hwan je hofuc, ke e at ae hmanenang, ke e unyin Iehova.

¹⁹ Anyin a wale habe Saulo ame kunâ je ûthumetu kö Jese me ha, ka habe, Kunö Davita thö a nokom könya, wale a tha laba me je mamoe.

²⁰ Haba Jese ame hom asina ame hijen hok areto, me tap waina me ke nokon got, me kunâ a deny Davita a nokon kö Saulo.

²¹ Ke Davita ame o but kö Saulo, me tot hnyi hnyimakan: ke e gan hmâ hnen hna hnyok kâu; ke e at hom tilâ anyin ta je omjehen vat.

²² Ke haba Saulo ame ûkhûnöng kö Jese, he ka ha, ka habe, Ama me tot Davita hnyi hnyimakök, anyin oge me betenge gan.

²³ Ke hnyi ûen ame o but kö Saulo hanu ae kong ûnyi ge Khong, me haba Davita ame hom kitara me ânyâ ge hnyamen: me ame menâ Saulo, me so, me ame hia unyin hanu ae kong.