I. Samuela 15 - Iaai Bible 1901 (New Caledonia)

¹ KE haba Samuela ame ha kö Saulo, ka habe, Iehova ame kunö nya he ka hû u me thaniny lakeiny a at Isaraela: ke long ju walang ang hofuc ho Iehova.

² Walang hna ha hnö Iehova tuhan sabaoth, ka habe, Oge hia but bi haten hna ânyâ hnö Amaleka kö Isaraela, waleji e ame tot kâu eû hnyi gethen, e ka ölö e ûhenyʼ Aigupito.

³ Ke he thö walang ang, me kuc Amaleka, me tha ohia anyidrin ta je ûnyi hia, ke ca he ka betenge gadrin: ke so bi kot hia thö obaga me omomo, je mendreng me at ame i, je bolok me mamoe, je kamela me asina.

⁴ Ke haba Saulo ame ûkhacaköuâ tavat, me öû ödrin hnyi Telaim, ödrin tu haded thauzan tavat he hon kânâ, me ten thauzan at Juda.

⁵ Ke ame o but Saulo ka hnyi taun anyi Amaleka, me khöu mokut hnyi bnyigöulen bucen.

⁶ Ke haba Saulo ame ba ka at Keni, ka habe, E, kec dö öbun, utut ge at Amaleka, wâ oge ne he ka tha ohiʼ öbun mödrin: anyin a öbun e betenge ge lakon Isaraela hia waleji hnyi ûhedrin jem ûheny Aigupito. Me ame he but at Keni ge at Amaleka.

⁷ Ke Saulo ame kot at Amaleka hwân hnyi Havila wale gethen ame he Sura ai, cicö Aigupito.

⁸ Ke e ame hom meli Agaga thaniny at Amaleka, ke adre me tha ohia tavat hia ge hele vat.

⁹ Ke Saulo me tavat ödrin e omeli Agaga, me je mamoe ae so, me bolok, me je meno ae pipikenya, me je nokon mamoe, me ta je ûnyi hia ae so, ke ca wedrin he ka tha ohia ta je ûnyi e: ke haba ta je ûnyi hia ae kong me ûnyi baû adre me tha ohia.

¹⁰ Me ame o hofuc ho Iehova ko Samuela, ka habe,

¹¹ Inya oge me ietra hnok hna otilö Saulo me than: anyin a e ame hmetu but ûnyi hnyi hnen hna he hotuk, ke e ame ca ânyâ hnok je hna hûna. Me ame hmönyi Samuela; me tenge kö Iehova hnyi hnyinghet hia.

¹² Ke ame vesâkong Samuela he ka ûkhanö me Saulo hnyi hnyomakatu: ke adre me thumetu Samuela, ka habe, A o thö Saulo hnyi Karemela, ke wâ bi e ame otilâ haten hobi kâu, kʼ ame hwio thö, me he but, me utut Gilegala ai.

¹³ Ke ame o but Samuela kö Saulo: ke Saulo ame ha kâu, ka habe, E so u hnahic ga Iehova: ke oge hia but ânyâ ûnyi a hûna ga Iehova.

¹⁴ Ke haingö Samuela, ka habe, Ieû bongon je mamoe ame tenge hnyi li hnyikönyök, me je bolok ame kuku kʼ, inya oge me long?

¹⁵ Me Saulo ame ha, ka habe, Adre me hom ûnyi ge at Amaleka: anyin a haba tavat adre me omelö je mamoe me je bolok ae so hnân hut kö Iehova Khongom; ke öhmun e hia but ti ohia je kolon.

¹⁶ Me haba Samuela ame ha kö Saulo, ka habe, Me todru, me oge me he ka thumetu u ga hofuc a ha könya Iehova eja hnyinghet. Me haingen, ka habe, ha thö.

¹⁷ Haba Samuela ame ha, ka habe, Eja ke ne u je ne at ae ûhnyûkong ehac, hawa, adre ca hum u hnân homakan je tribu Isaraela? Me Iehova ame hû u mʼ u me thaniny at Isaraela;

¹⁸ ke Iehova ame kunö u he ka vheno ke keihen hnyei, me ha köu, ka habe, He thö, me ti ohia but tavat ae kong a at Amaleka, me vat ju mödra ke ne o but ame hiʼ ödra.

¹⁹ Ke ieû gam a u je ca long hofuc ho Iehova, ke u je gâ he ka hom ta je hna hûgûnâ, me ânyâ ûnyi ae kong hnyi hnyimakö Iehova?

²⁰ Ke Saulo ame ha kö Samuela, ka habe, Ohe, oge hia but löng hofuc ho Iehova, ke oge me vheno gethen wale a kunö nya hnyin Iehova, ke oge hia but hum Agaga thaniny at Amaleka, ke oge me hia but ti ohia at Ameleka.

²¹ Ke haba tavat, me, ödrin e hom ta je hna hûgûnâ, a ta je mamoe, me ta je bolok, je ûnyi ae ûnyi hnathu hnân hake ip, he ka bi hut kö Iehova Khongom hnyi Gilegala.

²² Haba Samuela ame ha, ka habe, Hawa, e hu senyin kö Iehova ge je hudiny leû me je hut, helâ me hna löng hoton hofuc ho Iehova? Wâ bi, e beönua hna löng hon hut, me beönua, hna hnu hoton, hon pipikhenyainy je mamoe baga.

²³ Anyin a haba hanyâûâ, me helâ me ûkongon bi khong, ke haba ûjöng, me helâ me ûkongon hmi ka hnatheat, me je idola. Anyin a u je hia but hna degecâ hofuc ho Iehova, awe, e ame hia but hna degeci u, me u me ca than dut.

²⁴ Ke Saulo ame ha kö Samuela, ka habe, Oge hia but ânyâ hulö: anyin oge hia but hanyâûâ hna hûna hnö Iehova, me hwâm hofuc: anyin oge outen tavat, me löng hodrin.

²⁵ Ö u hna but walang ang anyik hulö, me tha hmetu mönya, me inye he ka khudrung kö Iehova.

²⁶ Haingö Samuela kö Saulo, ka habe, Oge me ca he ka tha hmetu mou: anyin a u je hia but hna degecâ hofuc ho Iehova, ke Iehova ame digic u, me u me ca he ka than ka at Isaraela.

²⁷ Ke Samuela ame hwio he ka he but, me e ame kât baten khaûen, me ame khekhe but.

²⁸ Ke haba Samuela ame ha kâu, ka habe, Iehova ane hia but kia dökhu Isaraela hnyi bong ang ûnyi gam, me ham e ka ke at ame laba hakekenyi u, ae so hom.

²⁹ Ke haba khaca, ame ca he ka thoi me ietra Man mani Isaraela: anyin a ca at, me me ietra.

³⁰ Ke e ame ha, ka habe, Oge hia but ânyâ hulö: ke so bi ö u ogânö nya walang ang hnyi hnyimakan wahingatiny lakeik, me hnyimakan at Isaraela, ke u me he ka tha hmetu mönya me inye he ka khudrung kö Iehova Khongom.

³¹ Me Samuela ame hmetu hotu Saulo; ke Saulo ame khudrung kö Iehova.

³² Me ame ha Samuela, ka habe, Hum Agaga thö jem könya, thaniny at Amaleka. Ke Agaga ame he hmecik kâu. Ke haingö Agaga E hnathu e hia but hinyin mok.

³³ Ke Samuela ame ha, ka habe, Hnen ânyâm hele vat hna öba nokon je momo, helâe adre me he ka öba nokon hinyâm unyin je momo. Ke Samuela ame susubö Agaga hnyi hnyimakö Iehova hnyi Gilegala.

³⁴ Ke Samuela ame he Rama ai; ke Saulo ame ölö ka hnyi hnyaban hnyi Gibea anyi Saulo.

³⁵ Ke ame ca o hmetu Samuela kö Saulo ke ne o but hnyi bong e ame mokcu hnyin: ke Samuela ame tengiö Saulo; ke Iehova ame ietra hna otilö Saulo ka thaniny at Isaraela.