I. Samuela 12 - Iaai Bible 1901 (New Caledonia)

¹ KE Samuela ame ha ka at Isaraela hia, ka habe, Wâ bi, oge hia but long hia hoton hobun hofuc waleji öbun e ha könya, me otilâ tuhöbun.

² Ke haba walang ang, me ame ngenu tuhöbun hnyi hnyimaköbun: ke inyʼ hingat ut, me hûen dut; ke wâ bi e unyibun li lakuk: ke oge hia but ngenu hnyi hnyimaköbun hwân kʼ iny tiga thoth ke ne o but hnyi bong ang.

³ Inyʼ ang: ohnathu nya thö hnyi hnyimakö Iehova, me hnen hna hû: ia oge hom haleny bolok? ke hale ia asina oge hom? ke oge iyawö ia? ke oge oveci ia? ke oge kap hwaban ûnyi hnyi hnyamö ia he ka omûkâ li emakök can e? mʼ oge me he ka ham hmetu köbun.

⁴ Ke haingödra, ka habe, U je ca iyawʼ ohmun, me oveci ohmun, ke ba ûnyi u je hom ûnyi ge ke at.

⁵ Me e ame ha kodra, ka habe, Iehova at ame ohnathoâ köbun, ke ame ohnathoâ laten adre hû minya, hnyi bong ang, a öbun e ca wâ ke ûnyi hnyi hnyâmök. Haingödra, ka habe, E but at ohnathoâ.

⁶ Haba Samuela ame ha ka tavat, ka habe, E bi Iehova, at ame otilö Mose me Arona, me hom je lakamöbun ûnyi hnyi hnyei Aigupito.

⁷ Anyin a wale todrʼ öbun walang ang, me inye he ka nʼ öbun hnyi hnyimakö Iehova hnyi ta je hwakecin hia thithö ae wisa anyi Iehova, wale e ame ânyâ köbun, me ta je lakamöbun.

⁸ Haba hnyi ûen ame o Jekob hnyi Aigupito, me ame tenge lakamöbun kö Iehova, me haba Iehova ame kunö Mose me Arona, ödre hom lakamöbun ûheny Aigupito, me olabʼ ödrin hnyi dok eang.

⁹ Ke ödrin e hnying Iehova Khongudrin, me e ame ûcû ödrin ka hnyi hnyamö Sisera, taben utbavat anyi Hazora, me ka hnyi hnyamen at Filisiti, me ka hnyi hnyamen than Moaba, me, ödrin e vat mödrin.

¹⁰ Ke ödrin e tenge kö Iehova me ha, ka habe, Ohmun e hia but monu, anyin a ohmun e hia but hna degeci Iehova, me bi athnyaba ka je Baala, me Aseira: ke u me he walang ang ka omeli ohmun ûnyi hnyi hnyamen je iwahnaihmiony möhmun, mʼ ohmun e he ka bi athnyabaem.

¹¹ Me haba Iehova ameʼkunö Jerubaala me Bedan, me Jefetha, me Samuela he ka omeli öbun ûnyi hnyi hnyamen je iwahnaihmiony möbun igigilo, ke öbun e laba hnahic ut.

¹² Ke öbun e wâ a ga o but köbun Nahasa, thaniny laku Amona, me öbun e ha könya, ka habe, Ohe, e so e hu than he ka musi kohmun: ke so bi Iehova me anyibun than.

¹³ Ke walang ang, wâ bi than öbun e ûca, me sumâtâ: ke wâ bi Iehova ame hia but otilâ tuhöbun.

¹⁴ Öbun e ne he ka outö Iehova, me bi athnyabainy, me long hwan hofuc, me ca ûkhin fucâ hnanyibu anyi Iehova, ke öbun e ne he bala bi me than minya a musi köbun ka hnu hotu Iehova Khongubun, awe, e so eling:

¹⁵ ke öbun e ne ca long hoton hofuc ho Iehova, kʼ öbun e ne hanyâûâ hnanyibu anyi Iehova, awe, ame he ka iwahnaihmiony möbun hnyamö Iehova, helâji me ka je lakamöbun.

¹⁶ Ke tot ju öbun walang ang me wâ ûnyi ang ae gan ame he ka ânyâ Iehova hnyi hnyimaköbun.

¹⁷ Hawa, ca ûen ang he ka meno hwit? Oge me he ka hongot kö Iehova, me e ame he ka kunâ hendreng me we; me me khanʼ öbun me wâhmakhmetoâ a e ti kong hwakecibun öbun e ânyâ hnyi hnyimakö Iehova, a ga sumatö tuhöbun.

¹⁸ Me Samuela ame hongot kö Iehova; me Iehova ame kunâ hendreng me we hnyi bong eling: me ame ot gan hmâ tavat hia thithö kö Iehova me Samuela.

¹⁹ Ke ame ha tavat hia kö Samuela, ka habe, Bethe hic hobi kohmun a lathnyabaem kö Iehova Khongom, mʼ ohmun e ca be ka mokcu: anyin a ohmun e hia but bi hanen ka anyihmun ta je hulö hia ûnyi eang ae kong, he ka sumatö tuhömun.

²⁰ Haingö Samuela ka tavat, ka habe, Ca ot öbun: e hnathu öbun e hia but ânyâ ta je hulö eang: ke so bi ca he öbun ka saû ga Iehova, ke bi athnyaba Iehova ge je hnyekubun ae bekhöt;

²¹ ke ca he öbun ka saû: ke helâe öbun e be ka he hoton ta je ûnyi baû ae ca khana he ka bi troban me möt, anyin ae ba onyen.

²² Anyin ame ca he Iehova ka hna degecâ lakeiny, ûnyi ge ien ae gan hmâ: anyin ae we Iehova he ka wiʼ öbun me hnân hing lakeiny.

²³ Ke haba inya bi, ö iny ca he ka monu kö Iehova, he ka degec hiji öbun: ke oge me he ka nʼ öbun ge gethen ae so me wisa.

²⁴ Ke hamöbun bi he ka outö Iehova, me bi athnyabainy hnyi hnathu me hnyekubun ae bekhöt: ke me ûnykûme thʼ öbun ta je ûnyi ae gan e ame hia but ânyâ hobi köbun.

²⁵ Ke öbun e ne be bala ka ânyâ hwakecin ae kong, awe, adre me he ka tha ohiʼ öbun me tuhöbun.