I. Samuela 10 - Iaai Bible 1901 (New Caledonia)

¹ ME wale Samuela ame hom tap wakaco me hingâlâ hon ban, me ûcimhnyimak mē, me ha, ka habe, Hawa, ca anyin a Iehova ame hû u me hnân taben jekhon?

² U ka he but eâu ûheny ang unyik, u me he ka wâ li at hnyi hu Rakela hnyi hnyigöulö Beniamina hnyi Zeleza; ke ödru me he ka ha köu, ka habe, Adre wâ ju asina, wale u me elâm: ke wâ bi ame ca ûnykûme hmetu je asina kâmâm, ke e hmak ut hnyekon gabu, ame ha, ka habe, Hawa la nokuk?

³ Ke u me he ka he ûhem e, me u je he ka o hnyi iwajo anyi Tabora, me ame be ka ûkhanö mou eling kun ta hnyat, ödrin e he Beth-ela ai ka Khong, ke at ame hom tilâ kun ta nokon got, ke ke at ame hom tilâ kun ta areto, ke ke at ame hom tilâ tap waina:

⁴ ke ödrin e he ka iouny mou, me ham köu lo li aretoʼ; ke u me he ka kap gadrin.

⁵ Ke hwaban e, u me he ka o ka hnyi dok ae hut anyin Khong, wale lap tue anyin at Filisiti: ke u ka hia but o ka hnyi taun, u me he ka ûkhanö me deö perofeta ödrin e utut ûheny ʼthö, ke e hnyi hnyimaködrin nabeli, me bwinybet, me utköwi, me kitara; ke ödrin e he ka hnyi perofeta:

⁶ ke ame he ka o hwege hom hanu Iehova, me u me he ka tha perofeta mödrin, ke adre me he ka wiö u helâ me ke at bi.

⁷ Ke e ka āt do köu je haten eling, u me he ka ânyâ hnâm hna wâhmakhmeto; anyin a e unyâm Khong.

⁸ Ke bâm dö Gilegala ai, ke ama bilik; ke wâ bi, oge me he ka utut köu he ka hudo je hudiny leû, me hudo je hudiny ûsököu: seven je bong u me he ka hulubahingen ke ne o but oge me o köu, me omanenâ köu ûnyi u me he ka ânyâ.

⁹ Ke e ame hwio thö me he ga Samuela, me Khong ame ham kâu hnyekon ae ke hwakecin bi, ke ame hwâdâ thö je haten hia eling hnyi bong eling.

¹⁰ Ke ödru me o eling hnyi dok ae hut, me wâ bi, ame ûkhanö mödru deö perofeta; me ame o hwege hon hanon Khong, me e ame tha perofeta unyidrin.

¹¹ Ke a wâ but tavat hia, a hnyat wâhmakhmeto e ehac, ke wâ bi e ame hnyi perofeta me je perofeta, me adre me ûhaköuâ ka habe, Ieû e a o ka nöku Kiso? Hawa, Saulo ame laba unyin je perofeta?

¹² Ke ame thu ke at a aten eling, ka habe, Ke ia kamödrin? Anyin a wale, adre vejecâ, ka habe. Hawa, Saulo ame laba unyin je perofeta?

¹³ Ke e ame um dö perefota me he ka hnyi dok ae görany.

¹⁴ Ke haba ke kamö Saulo ame ha kâu me athnyabainy, ka habe, Ûhebu ua? Haingen, ka habe, Öhme elâm je asina: ke öhme wâ but ae hia bala me ohmu me he kö Samuela.

¹⁵ Me ame ha ke kamö Saulo, ka habe, Me omanenâ könya hofuc ho Samuela köbu.

¹⁶ Me Saulo ame ha ka ke kamen, ka habe, E ame ha manenâ köhmu a gʼ adre wâ ju je asina. Ke e ame ca omanenâ kâu ge dökhu, waleji a ha Samuela.

¹⁷ Ke Samuela ame ûkhacaköuâ tavat kö Iehova hnyi Mizepa;

¹⁸ me e ame ha ka lakon Isaraela, ka habe, Walang hofuc ho Iehova, Khongu Isaraela, ka habe, Oge me hom at Isaraela ûheny Aigupito, me oge me omeli öbun ûnyi hnyi hnyamen at Aigupito, me ûnyi hnyi hnyamen je dökhu hia waleji a oveci öbun:

¹⁹ ke öbun e hia but degec Khongubun hnyi ûen ang, at a omeli öbun ûnyi ge anyibun je hna okongoâ me hna ovecâ; ke öbun e ha kâu, ka habe, Otilâ thanihmun dö. Awe, omanenʼ öbun dö walang ang hnyi hnyimakö Iehova hoton anyibun je tribu me je thauzan gabun.

²⁰ Me Samuela ame hakekenyâ je tribu hia anyin at Isaraela, me adre me kû tribu Beniamina.

²¹ Ke e ame hakekenyâ tribu Beniamina hoton anyidrin je lap, me adre kû lap anyi Mater: ke adre kû Saulo noku Kiso; ke ödrin e elâm e, kʼ adre me ca wâ.

²² Anyin a wale adre me elâm hmetu unyi Iehova, hawa, e tiga hu ke at biju ame he ka he jem? Me Iehova ame thu, ka habe, Wâ bi, e ame lubaduöng hnyi je thatûnyi.

²³ Me adre me wadring me hom e ûheny e; ke e ame tha tot me tavat, me e beû hon tavat hia, bongödra juʼ hnyi li abenyin.

²⁴ Ke hâhâ Samuela ame ha ka tavat hia, ka habe, Wâ ju e, wale a ûca Iehova, anyin ae ba at helâ mē unyin tavat hia thithö. Me ame hongot tavat hia, me tha ha, ka habe, Khong lö omelö than.

²⁵ Ke haba Samuela ame thumeto tavat ge bongon dökhu, me sihnalimen e hnyi tusi, me ip hnyi hnyimakö Iehova. Ke Samuela ame kunâ tavat ka hnyi je hnyabadra.

²⁶ Ke Saulo ame he minya ka hnyi hnyaban hnyi Gibea; ke ame tha he mē tavat a kâlâ Khong je hnyekudrin.

²⁷ Ke ame ha ke je laku Belial, ka habe, Ame he ka kâmâu hna omeli otin at eji? Me ödrin e hûkötiâ e, ke ödrin e ca hom kâu je bwihlany. Ke e bi ame laba hnyibû.