I. Samuela 1 - Iaai Bible 1901 (New Caledonia)

¹ E HU ke at ûheny Ramathaima-sofima unyi hnyi hnyei ae hut hnyi Eferaima, Elekana ien, nöku Jerohama, nöku Elihu, nöku Tohu, nöku Zuf a at Eferaima:

² ke lo lâiân; haba ien khaca me Hana, ke Penina ien khaca: ke e hu laku Penina ke ba nöku Hana.

³ Ke haba at eling ame labö he hnyi je huna ûheny hnyi hnyaban he ka hnyi hmi me bi hut kö Iehova tuhan sabaoth hnyi Silo. Ke haba eling li laku Eli, jia Hofeni me Fineasa, a li at bihut kö Iehova.

⁴ Ke ame o but ûen ame he Elekana ka bi hut hnyin, me e ame ve ham jekhoû kö Penina âiân, me lakon obaga me wahlu:

⁵ ke e ame ham kö Hana lo li jekhoû; anyin a e ame betenge ga Hana, ke Iehova ame otoûnyö e.

⁶ Ke haba momo a iwahnaihmiony mē ame ovecâ hwegiâ e, he ka otengiâ e, anyin a Iehova ame otoûnyö e.

⁷ Ke e ame labö ânyâ helâe hnyi je huna hnyi ûen e ame he ka hnyi uma umo Iehova, me ovecâ e; anyin a wale e ame tenge me ca hnyi han.

⁸ Haba Elekana âiân ame ha kâu, ka habe, Hana, ieû u me tenge gan? me ieû gam u je ca me han? ke ieû ame vec gan hnyekom? hawa, iny ca beönua köu hon lakuk obaga a ten?

⁹ Me ame todrö Hana hwaban ödrin e hia but han me ic hnyi Silo. Ke haba Eli at bihut ame laba hon tap hmelen uthwanuma hnyi uma umo Iehova.

¹⁰ Ke e vec hnyekon momo, me e ame hic kö Iehova me tenge.

¹¹ Ke e ame bi khöbi me ha, ka habe, Iehova tuhan sabaoth lö, u je ne he ka wâ vec anyin athnyabaem a momo, me ûnykûme könya, me ca hnying bi athnyabaem a momo, ke u je ne he ka ham könya a athnyabaem ke da, me oge me he ka ham e kö Iehova hnyi ta je bonginy hia thithö, ke ame ca he ka o heleûgi ka hnyi hon ban.

¹² Ke e ame tiga hic bala bi hnyi hnyimakö Iehova, me haba Eli ame wâhmakhmeto hnyimen.

¹³ Ke haba Hana ame fuc hnyi hnyekon; kʼ ame bwebwet thibi li esongodiny, ke adre me ca long ifucin: anyin a wale Eli ame ûnykûme a gʼ ame monu ge grâg.

¹⁴ Ke Eli ame ha kâu ka habe, U me he ka monu ke ne o but kehö? degec ut waina unyâm.

¹⁵ Haingö Hana ame thu, ka habe, Eba, than lö, inya momo ae vec hnyekon, ke oge ca ic waina bi me grâg, ke so bi oge me hingâlâ hnyekuk hnyi hnyimakö Iehova.

¹⁶ U me ca he ka ûnykûme a atö Belial inya athnyabaem a momo: anyin oge me fuc ke ne o but walang ang ûnyi hnyi ûganiny hmakiny hnyekuk me hna oveci nya.

¹⁷ Haba Eli ame thu me ha, ka habe, He thö me hnahic: ke e so ame he Khongu Isaraela ka ham köu ûnyi u je sumâtâ gan.

¹⁸ Ke haingen, ka habe, Ö u betenge gak a athnyabaem. Me ame he but momo, me han, ke haba hnyimakan e ca hmak hmetu bi.

¹⁹ Ke ödrin e vesâkong me hic hnyi hnyimakö Iehova, me hmetu, me o hnyi hnyabadrin hnyi Rama: ke Elekana ame khanö Hana a âiân, me Iehova ame ûnykûme kâu.

²⁰ Ke a hwâdâ thö ûen me ame erkin dut Hana, me e ame hnokoâ da, me hwenyi ien Samuela, ame ha, ka habe, anyin oge sumâtâ ga Iehova.

²¹ Ke ame he at, jia Elekana me anyin lap hia he ka hudo kö Iehova hut helâ hnyi je huna, me anyin khöbi.

²² Ke a ca hnyi he bi Hana: anyin a e ame ha ka âiân, ka habe, Me hnebaiö but wanakat, me oge me he ka hom e me me manen hnyi hnyimakö Iehova, me laba balua but eling.

²³ Haba Elekana a âiân ame ha kâu, ka habe, ânyâ thö so köu; laba ju ke ne o but u me hnebaiö e; ke so e he Iehova ka ohmâ hwan hofuc. Me ame laba momo, me asen nokon ke ne o but e ame hnebaiö.

²⁴ Ka hia but hnebaiö e, e ame hom e me je bolok minya a kun, ke khaca efa falawa, me tap waina, me hom e ka hnyi uma umo Iehova hnyi I Silo: ke tiga ûhnyûkong wanakat.

²⁵ Ke ödrin e hlingâ bolok, me hom wanakat kö Eli.

²⁶ Ke haingen momo, ka habe, Than lö, u möt tuhok, he inya ang momo waleji at ame tot unyâm eang me hic kö Iehova.

²⁷ Oge sumâtâ wanakat ang; ke Iehova ame ham könya hnok hna sumâtâ gan:

²⁸ Anyin a wale oge hia but hna minya e kö Iehova; adre hna kö Iehova hnyi ta je bonginy hia anyin möt. Me e ame khudrung kö Iehova eling.