I. Peteru 5 - Iaai Bible 1901 (New Caledonia)

¹ INYA oge me sihwegiâ wahingat unyibun, inya minya ang ke hingat, me at ohnatho je vec anyin Keriso, me at ame he ka hnyi hu hmanenang ame he ka manen:

² Tuö ju hna hat mamoe e unyibun, me bi homakan, ca ge musi, ke so bi ge weny, hoton Khong; ke ca ûnyi ge behu omjeû, ke so bi ge hnyok ame weny;

³ ke ca he ka hwen thanâ je hanymöbun, ke so bi hamöbun he ka bi tulut ka hnahat mamoe.

⁴ Ke e ka manen dut Taben tavat tuö mamoe, me öbun e he ka hu korona ae hmanenang ame ca he ka hia but.

⁵ Helâe minya öbun hnyat ae teb unyi, löng ju hoton wahingat. Eke, öbun hia thithö lö, weikâ ju hwakecin ae hnyikânâ he ka uhuliwaköu: anyin a Khong ame hagutâ tavat bi gan, me ham ibetengiö baû ka tavat ae hnyikânâ oûnykûmidra.

⁶ Anyin a wale, ohnyikönʼ öbun ju hnyi hmelen hnyamen Khong ae man, me me he ka ogoranyi öbun hnyi ûen ae ûcû;

⁷ hna but kâu anyibun ta je hmak hia thithö, anyin a e ame ûnykûmi öbun.

⁸ Metâ but öbun, ke hmâkâ thö: haba iwahnaihmiony möbun, wale diabolo ame ngenu helâ me liona ame kuku, kʼ ame heleû haniny:

⁹ hwege bala ju öbun ka hagutâ e hnyi anyibun labageju, anyin ae khanʼ öbun a gʼ ame aat dö unyin je liamekeiny möbun eang hmeledrany ta je vec helâe.

¹⁰ Ke haba Khong hwecin ibetengiö baû hia, wale ame hawʼ öbun ka hnyi anyin hmanenang ame ca ba balua unyin Keriso, öbun ka um dö vec hnyi ûen ae okhulit, me wale at ame he ka obekhöti öbun, me otethmʼ öbun, me ohwegi öbun.

¹¹ E unyin musi nyiele nyiele balua. Amen.

¹² Oge hia but sihnalimen okhulitâ köbun ûnyi ge Silevana, ke oge me ûnykûme ae liamekeiny ae hnathu, hnân he ka sihwegi öbun me ohnatho, ka habe, wale ibetengiö baû ae hnathu anyin Khong; tethmâ ju öbun hnyin e.

¹³ Haba ekalesia hnyi Babulona, wale adre me tha ûca möbun, me ame italofa mʼ öbun; ke helâe minya Mareko a nokuk.

¹⁴ Italofaköu ju öbun ge ûcimhnyimakiny ibetengiö. E so e unyibun hia thithö ûsoköu, öbun tavat unyin Keriso.