I. Peteru 4 - Iaai Bible 1901 (New Caledonia)

¹ ANYIN a wale haba Keriso ame hom vec hnyi unyin, e so öbun e tet metâ me hnyok helâe; anyin a hia but mok degec hulo hnen at ame hom vec hnyi unyin;

² mʼ öbun e ca he hmetu ka möt ka hnyi ta je weny at, hnyi ûen a tiga öbun hnyi unyin, ke so bi ka hnyi weny Khong.

³ Ame ne soju hna ânyâ weny Aten ke je hnyei, hnyi je ûen a hia but, waleji adre me vheno wagelue, me je weny ae kong, me hwen hmiâ waina, me mede, me ta je bijeû ae kong, me hmi ka ta je hnatheat ae ikiki:

⁴ ke adre me lâiâ ge ca tha wadring a Öbun mʼ ödra ka hnyi imedioköu ae ti kong, ke adre me haikongu öbun:

⁵ ke adre me he ka ve ha hwakecidra bi kâu at ame he ka hnö tavat ae möt me tavat ae mok.

⁶ Ke can e adre me khetâ ûthumetu ae so ka tavat ae mök, mʼ adre me he ka hnei ödra hnyi unyin helâ me at, kʼ adre möt hnyi hanu helâ me Khong.

⁷ Ke e hakekeny jut obiny ta je ûnyi hia tbithö: anyin a wale metâ thʼ öbun ke hmâkâ thö me hic:

⁸ ke hon ta je ûnyi hia, e so öbun e ibetengiököu; anyin ame he ibetengiö ka tube ta je hulo ae se hia.

⁹ Imetenyimwi ju ke at ka ke at, ke ca ulidro bi;

¹⁰ helâ me hna ve kap bwihlany, e so he ka ûhuliwaköu, helâ me tavat tuö soâ ibetengiö baû anyin Khong ae se hia bongon;

¹¹ a ne fuc ke at, fuc dö helâ me hofuc hwan Khong; a ne huliwa ke at, huliwa helâ me man ame ham ge Khong: mʼ adre me he ka ogânâ Khong hnyi ta je ûnyi hia thithö ga Iesu Keriso, e unyin hna ogânâ, me musi nyiele nyiele balua. Amen.

¹² Je oûnykûminy lö, ca he öbun ka lâiâ ge ûcûbic helâ me meic unyibun ame o he ka cubic öbun, helâke me ûnyi ae teb ûnyi ame o köbun:

¹³ ke so bi senyin dʼ öbun anyin öbun e tha hom vec me Keriso; mʼ öbun e be ka senyin gan hmâ e ka manen dut anyin hmanenang.

¹⁴ Adre ne haikongu öbun can ien Keriso, hnobun hnahic; anyin ame laba unyibun Hanon hmanenang me Hanon Khong.

¹⁵ Ke ca he ke at gabun ka vec anyin a e at ûhlingö bi, me at venöu, me at ame ânyâ monu, me at ame hngele baû ka ta je ûnyi anyin keihen:

¹⁶ ke a ne vec ke at anyin a e Kerisiano ca he ka hmehma; ke so e he ka ogânâ Khong hnyi ien e.

¹⁷ Anyin a walang ûen dut he ka ûhnei hwân hnyi uma umen Khong: ke ame ne hwân unyita, ieû obiny ka tavat adre oûnyibâûâ ûthumetu ae so anyin Khong?

¹⁸ Ke a ne huliwa but he ka omelö tavat ae wisa, ame he ka manen ua at ame ca ot me at ae kong?

¹⁹ Anyin a wale e so ka tavat adre me vec hoton weny Khong he ka ânyâ hwakecin ae so me hna je hanudrin kâu at ae hnathu, a At ame op.