I. Peteru 3 - Iaai Bible 1901 (New Caledonia)

¹ HELÂE minya öbun omomo löng ju hoton laöiöbun; mʼ adre me he ka hmehmelâ ge hwakecin laöiödra ae so, ke ca hnen bi hofuc, a ne hu tavat gadra adre me ca löng hoton hofuc;

² at ka wâ hwakecibun ae ba hnyikongon, me ot.

³ Haba theibibun, me so e me ca theibâ unyin, wale he ka hûle bät me theibâ gol, me khavâ je ûkhaû;

⁴ ke so bi he ka omecâ at ae iyong eû hnyi hnyok, wale ûkhaû ame ca he ka bobot, wale hnyok ae menyik me ilemuk, wale ûnyi ae ûnyi hnathu hmonyin hnyi hnyimakan Khong.

⁵ Anyin ame ka omeci ödra helâe hnen omomo ae kap ehac, hnyat adre me labageju ka Khong, ke adre me löng hoton laöiödra:

⁶ ke helâe Sara ame löng hotu Aberahama, kʼ ame hawâ e, me than: ke öbun je lakon, öbun ka he ka mâdrâ so, me ca outen bi ke ûnyi hnân outen.

⁷ Obaga lö, e so öbun e helâe, tha laba me laöiöbun hoton metâ, ke ogânâ momo, anyin a e kaia ae sënyin, ke öbu me he ka tha hu ibetengiö baûiny möt; waleling me me ca he ka ovhelâ hijibun je hic.

⁸ Walang obiny, e so öbun e he hia ka tha hnyok, me vec betenge, me tha hnyok helâ me je liamekeiny, me sang betenge, me hnyok ae hnyikânâ:

⁹ ca bi hwaban monu ge monu, me ûjao ge ûjao; ke so bi hahnahicâ; anyin adre hawʼ öbun kâe, mʼ öbun e he ka hnahic.

¹⁰ Anyin a Haba at ame weny möt, Kʼ ame bewâ je bong ae so, Me so e ame noc bohmen hnyi monu, Ke li esongodiny wâ e nye fuc thoi:

¹¹ E so e ame saû but ûnyi hnyi hulo, me mâdrâ so; E so e ame elâm ûsoköu, me hnu hoton e.

¹² Anyin a e li emakan Than hon tavat ae wisa, Ke li hnyikonyen ame löng hijidra je hic: Ke e bi hnyimakan Than hon tavat adre me ânyâ hulo.

¹³ Ke ie at ame he ka okongu öbun, öbun e ne hwege ka hnyi so?

¹⁴ Ke öbun e ne vec can hwakecin ae wisa, hnobun hnahic: ke ca ot bi ge hnödra hna ootâ, ke ca hlohlo bi;

¹⁵ ke okabâ ju Keriso eû hnyi je hnyekubun me me Than bi: ke laba penapena bala öbun he ka thu kodra hia tavat adre me hnei öbun ge bongon labageju wale eû hnyibun, ke so bi hnyi menyik me ot;

¹⁶ ke e hu gabun ûnykûm sa ae so; waleling me me hmehma ju tavat adre me haikongo hwakecibun ae so unyin Keriso: anyin adre me haikongu öbun.

¹⁷ Anyin ae so but, a ne weny Khong, mʼ öbun e he ka vec can so öbun e ânyâ, ke kong bi e can hulo öbun e ânyâ.

¹⁸ Anyin ae okhaca hom vec Keriso can hulo, wale ae wisa me hwaban tavat ae ca wisa hwakecidra, me me he ka lili öta ka Khong: adre hlingâ e hnyi unyin, ke adre omelö e hnyi hanu;

¹⁹ ke ûnyi hnyi e, e ame he but me khetâ ka ta je hanu hnyi hnyin uma ceat,

²⁰ waleji a tavat adre me ca ûling ehac, hnyi ûen lingvec ae beû hmâ anyin Khong ame halubahingen hnyi ûö Noa, ke e ame penapena hu, waleji adre omelö hnyat ae wakhalet hnyin, a ödrin eit hnyi köiö:

²¹ wale thibi e hnyi ûhoûcû ae hnathu at ame omeli öbun minya walang ang, a bapataiso, ca ûnyi bi ge hna hneû degecâ ikikiny unyin, ke so bi he ka hnö ge ûnykûm sa ae so ka Khong hnen möt hmetu a Iesu Keriso;

²² wale hnyi ke keihen a metân Khong, ke a ölö hnyi drany ai: ke ame löng hoton hnen ta je angela, me tavat musi, me ta je man.