I. Korinito 8 - Iaai Bible 1901 (New Caledonia)

¹ KE haba ta je ûnyi adre hudo ka ta je hnatheat: E khanʼ öta a öta hia ate me wâ ûnykûme. Haba wâ ûnykûme ame obigânâ, ke haba ibetengiö ame okahwâ.

² A ne ûnykûme ke at a e khana but ke ûnyi, e tiga ca wâ ûnykûme hnen at e helâ me ae ûcû he ka wâ ûnykûme;

³ a ne ke at ame hnyokâ Khong, awe, e ame wâ ûnykûme at eling.

⁴ Haba ge hna an ta je ûnyi adre hudo ka ta je hnatheat, e khanʼ öta ae ûnyi baû eang hmeledrany hnatheat, ke ba minya ju ke Khong, ke khaca thibi.

⁵ Eja ke ne a ne hu ta je ûnyi adre hâiâ, ka habe, je khong, ame ne ethö hnyi drany, ame ne eang hmeledrany; e se hia ta je khong, ke se hia ta je than;

⁶ ke so bi khaca thibi Khong köta, wale Kamen, ûnyi gan ta je ûnyi hia, ke haba öta me hobi kâu e; ke Than minya a khaca, a e Iesu Keriso, ûnyi gan ta je ûnyi hia, me öta minya a ûnyi gan.

⁷ Ke so bi ame ca wâ ûnykûme e hnen tavat hia: ke haba keihen, me adre me khenen ka ta je hnatheat ke ne o but hnyi bong ang, kʼ adre me an ta je ûnyi adre me hudo ka ta je hnatheat; me ame kong ut ûnykûmenödra anyin ae sēnyin.

⁸ Ke ca hnân osoi öta bi hnyi hnyimakan Khong ge hna han: anyin ae ca beönua anyita monu, at ka ca han; ke ca beönua minya bi anyita so, at ka han.

⁹ Ke wâ wia ju, wâ e nye ohaûâ tavat ae sēnyin hnen maniny je hnyekubun.

¹⁰ Anyin ame ne ō u hnen ke at, a u at wâhmakhmeto, ke u me laba he ka han hnyi uma umen hnatheat, hawa, ca hnân ohwegiâ oûnykûminy at ae sēnyin he ka an! ta je ûnyi adre me hudo ka je hnatheat?

¹¹ Anyin ame he ka ohia at ae sēnyin hnen ânyâm wâhmakhmeto, wale ke liamekeiny, waleji at ame mok Iesu Keriso hnân hobi kâu.

¹² Öbun e monu helâe ka je liamekeiny, kʼ öbun e oaatâ ûnykûmenödra ae sēnyin, kʼ öbun e monu bi ka Keriso.

¹³ Anyin a wale, e ka haû liamekeiny mönya ge jeû, awe, oge me ca he bi nya ka han utiö nyiele balua, wâ oge nye ohaûâ liamekeiny mönya.