I. Korinito 10 - Iaai Bible 1901 (New Caledonia)

¹ HNYAT me lakeiny lö, e ca wek e me ca khanʼ öbun a ga mwi hia laka-möta hnyi hmelen ûlâ, ke adre me gethen hia hnyi köiö;

² ke adre bapataisoi ödra hia kö Mose hnyi ûlâ me hnyi köiö;

³ ke ödra hia adre me tha han jeûiny hanu;

⁴ ke ödra hia adre me tha ijem belen hanu: anyin adre me ic ûnyi hnyi kiciny hanu ame ûhnûhnû: haba kic eling, me Keriso.

⁵ Ke ame ca senyin Khong ka tavat gadra ae se hia: anyin adre me hudrin ju hnyi hnyebuba.

⁶ Wale ta je ûnyi hnân haten köta, mʼ ate me ca he ka behnyekuta ta je ûnyi ae kong, helâji me hnödra hna behnyekon.

⁷ Ke haba khaca, ca he öbun ka hmi ka je hnatheat, helâ me keihen gadra; helâ me hna sihnalimen, ka habe, Ame laba ju tavat he ka han me ic, me adre me tödra he ka mat.

⁸ Ke ca he minya öta ka bi ûnyi monu, helâ me keihen gadra ame ânyâ, me ame mokcu twente theri thauzan hnyi bong a khaca.

⁹ Ke ca he minya öta ka cubec Than, helâ me keihen gadra adre me cubec, me adre me mokcu ge ta je on.

¹⁰ Ke ca he minya öbun ka ulit, helâ me keihen gadra adre me ulit, me adre me mokcu ge at ame ohia.

¹¹ Ke ame o but ta je ûnyi hia thithö e kodra me hnân haten; ke adre sihnalimen hnân nʼ öta, wale a o köta obiny ta je dö.

¹² Anyin a wale haba at ame ûnykûme a e ame tethmâ, wâ eâu, e nye û but.

¹³ Ame ca o bi köbun ke ûcûbic, waleji ae ca ûcû ka at: ke e hnathu Khong, at ame ca he ka hnʼ öbun ka hnyi ûcûbic hon hnobun hna khana; ke so bi e ame he ka bi deny kec ûheny hnyi ûcûbic, me me khanʼ öbun he ka hokhnyokâ.

¹⁴ Anyin a wale hnyat a oûnykûmik lö, kec ut ge hmi ka je hnatheat.

¹⁵ Inya oge me fuc ka tavat ae metâ; ûnykûme ju öbun hnok hna ha.

¹⁶ Haba utköiöiny ole otin e oleâ, hawa ca e bi hnyi hnötin hna tha hu hnyi dren Keriso? Haba areto otin e susubâ, hawa, ca e bi ate me tha hu hnyi unyin Keriso?

¹⁷ anyin a öta se hia, ke khaca thibi areto me khaca unyin: anyin a öta hia ate me ve hu ûnyi hnyi areto a khaca.

¹⁸ Wâ bi at Isaraela hoton unyin; hawa, haba tavat adre me han hnyi taben hut, e ca tha hu kodra me taben hut?

¹⁹ Ieû oge me he ka ha? Hawa, e ûnyi hnathu ûnyi adre bi hut ka hnatheat? ke ûnyi hnathu hnatheat?

²⁰ Ke oge me ha, ka habe, haba ta je ûnyi ame hudo Aten ta je hnyei, adre me hudo ka ta je demoni, ke ca bi ka Khong: ke ca wek e me tha öbun me ta je demoni.

²¹ E ca khanʼ öbun he ka ijem kaia belen Than me kaia belen ta je demoni: e ca khanʼ öbun he ka ve hu ûnyi hnyi laulau anyin Than, me laulau anyin ta je demoni.

²² Hawa, ate me cubic Than he ka ciâ? hawa, öta hwege hon e?

²³ E ûcû ta je ûnyi hia thithö, ke ca ûnyi hnathu bi ta je ûnyi hia thithö. E ûcû ta je ûnyi bia thithö; ke haba ta je ûnyi hia thithö, me ca hnân okahwa.

²⁴ Ca he bi ke at ka elâm soiny bi, ke so bi soiny ke at bi.

²⁵ Haba ta je ûnyi hia adre uco hnyi hna ûcû, an ju, ke ca hnei can bi ûnyi hnyi ûnykûm sah;

²⁶ anyin a anyin Than hmeledrany me unöngötiny hia.

²⁷ A ne hawʼ öbun ke at ame ca labageju bi, ke webun he ka he; an ju ta je ûnyi adre ip hnyi hnyimaköbun, ke ca ûhnei bi, can ûnyi hnyi ûnykûm sah.

²⁸ Ke e ka ba köbun ke at, ka habe, Adre hia but hudo ûnyi ang ka hnatheat, awe, ca an bi, can at a omanenâ, ke ûnyi hnyi ûnykûm sah:

²⁹ oge me ha ge ûnykûm sah anyin ke at, ke ca ânyâm bi; anyin a ieû ame he ûnykûm sah anyin ke at ka ûnykûme hnok hna he baû?

³⁰ Ke oge ne han me ole, ieû adre me he ka haikongu nya gan hnyi ûnyi oge me oleâ?

³¹ Anyin a wale, öbun ka he ka han, me ic, me ânyâ ke ta je ûnyi bi, ânyâ hia thö hnân ogânâ Khong.

³² Ca he öbun ka bi joniny ka at Juda, me at Heleni, me ekalesia anyin Khong:

³³ helâ me inya oge me osenyinâ tavat hia hnyi ta je ûnyi hia, oge me ca elâm bi soik, ke so bi soiny tavat ae se hia, mʼ adre me möt ut.