I. Je Than 9 - Iaai Bible 1901 (New Caledonia)

¹ KA hia but Solomona umo uma umö Iehova, me uma umen than, me ta je we Solomona hia e ame weny he ka ânyâ,

² me Iehova ame hmetu kö Solomona helâ me hnen hna manen kâu hnyi Gibeona.

³ Ke Iehova ame ha kâu, ka habe, Oge hia but long hijâm hic me ânyâm sumat hnyi hnyimakök: oge hia but okabâ uma ang, wale u je ânyâ hnân ip iök hnyin nyiele balua; ke ame he ka e ling li emakök me hnyekuk hnyi je bong hia thibut.

⁴ Ke haba u, u je ne he ka he hnyi hnyimakök, helâ me hnö Davita a kâmâm hna he me hnyekon ae bekhot me wisa, he ka ânyâ ta je ûnyi hia oge hûna köu, me tuö anyik je hnanyibu me hnok je hna owisa;

⁵ me oge me he ka ohmâ theroniny dokhom dökhu hon Isaraela nyiele balua; helâ me hnok hna ha bânâ kö Davita a kâmâm, ka habe, Ame ca he ka ba hwabâm hon theroni Isaraela.

⁶ Ke öbun e ne hmetu gak, ame ne lakom bi, me ca tuö bi hnok je hna hûna me anyik je hnanyibu, wale oge hia but ip hnyi hnyimaköbun, he ka he me bi athnyabainy je khong baû, me khudrung ködrin:

⁷ awe, oge me he ka subâ degeci Isaraela ûnyi hnyi hnyei wale oge ham ködrin; ke haba uma ang oge okabâ hobi kâu iök, me oge me he ka degec ûnyi hnyi hnyimakök; ke ame he Isaraela ka tot hnân hofuc vejec me hluma hnyi ta je hnyei hia:

⁸ ke haba uma eang ae beû goranyai, ame he tavat hia adre me he eû hnyi gethen ka lâiâ, me jû; ke adre me he ka ha, ka habe, Anyin a ieû Iehova ame ânyâ helâe ka hnyei ang me uma ang?

⁹ Ke adre me he ka thu, ka habe, Anyin ödrin e hna degeci Iehova Khongudrin, at ame hom lakamödrin ûheny hnyi hnyei Aigupito, ke ödrin e kât ke je khong bi, me khudrung ködrin, me bi athnyaba ködrin: anyin a wale Jehova ame oâ ködrin ta je ûnyi hia thithö eang ea kong.

¹⁰ Ke a um dö je hunai Solomona a twente ka op li uma, wale uma umö Iehova me uma umen than,

¹¹ (haba Hirama than Turo ame hia but ham kö Solomona je ûö arasi, me je ûö kop, me gol, helâ me je weny hia) haba Solomona than ame ham kö Hirama twente je taun hnyi Galelaia.

¹² Ke Hirama ame he ûheny Turo he ka wâ je taun a ham kâu Solomona; me ca so bi kâu.

¹³ Me haingen, ka habe, Muma lö, ie je taun ang u je ham könya? Me e ame hwenyi ien je taun, ka habe, hnyei Kabul, ke ne o but hnyi bong ang.

¹⁴ Ke Hirama ame kunâ ka than je gol a wan haded ke twente je talan.

¹⁵ Ke walang bongon a ga ûca at hnö Solomona than he ka op uma umo Iehova, me umen uma bi, me Milo, me hak vetoiny Jerusalema, me Hazora, me Megido, me Gezera.

¹⁶ Haba Farao than Aigupito ame hia but he me hûgûnâ Gezera, me thong ge meic, me hlingâ at Kanana tavat a idrin taun, me ham e hnân bwihlany ka nokon hlu, a öiö Solomona.

¹⁷ Me Solomona ame op Gezera, me Bethe-horona eû,

¹⁸ me Baalath, me Tamara hnyi hnyebuba, hnyi hnyei,

¹⁹ me je taun hia hnân ip omjeû omjehe Solomona, me je taun hnân ip anyin je kariota, me je tauniny tavat tabö hors, me ûnyi a we Solomona he ka op hnyi Jerusalema hnân weny bi, me Lebanona, me hnyi hnyei hia hnyi dokhon dökhu.

²⁰ Ke haba tavat hia, a je kolon at Amora, me Heth, me Perizi, me Hivi, me Jebusi, wale a ca lakon Isaraela;

²¹ ke lakon aten hnyei a wan hwabodrin, waleji ae ca khana lakon Isaraela he ka ohia, me haba Solomona ame ûca hnyat gadrin he ka ânyâ anyin ta je huliwa ke ne o but hnyi bong ang.

²² Ke Solomona ame ca hawâ lakon Isaraela he ka ânyâ anyin ta je huliwa: ke ödrin bi tavat vat, me je athnyabainy, me je taben, me je homakan, me tavat muso anyin je kariota, me tavat tabö hors.

²³ Haba tavat eling ödrin e musi hon ta je huliwa anyi Solomona, a ödrin faiv haded ke fifte, ke ödrin e muso tavat huliwa anyi Solomona.

²⁴ Ke haba momo nöku Farao ame o ûheny hnyi taun anyi Davita ka hnyi umen uma wale adre op hnân hobi kâu; me e ame op Milo.

²⁵ Ke Solomona ame okun hudo je hudiny leû, me je hudiny ole, hnyi ke huna me ke huna, hon taben e ame ânyâ hobi kö Iehova, ke e ame leû utö ae bo so hon taben hut ae hnyi hnyimakö Iehova. Ke ame um dö uma.

²⁶ Ke habâ Solomona than ame tibet je hu hnyi Eziona-gebera, ae hakekenyâ Elath, hnyi hobatköiöiny Köiö ae Dra hnyi hnyei Edoma.

²⁷ Ke haba Hirama ame kunâ hon hu ai lathnyabainy a je aten hu, tavat ödrin e wâhmakhmeto köiö, he ka tha he me lathnyabai Solomona.

²⁸ Ke ödrin e he Ofira ai, me hok gol ûheny e foa haded me twente je talan, me hom kö Solomona than.