I. Je Than 8 - Iaai Bible 1901 (New Caledonia)

¹ HABA Solomona ame ûkhacakönâ wahingatiny Isaraela, me je ban je tribu hia, je tuhan je lap anyin je kamen laku Isaraela, kö Solomona than hnyi Jerusalema, he ka hom tangen ûhihinköu anyi Iehova ûheny hnyi taun anyi Davita, wale Ziona.

² Ke ame ûkhacaköu kö Solomona than tavat Isaraela hia hnyi bijeû, hnyi tehi Ethanima, wale tehi a seveniny.

³ Ke ame o hia but wahingatiny Isaraela, ke je at bihut ödrin e kap tang.

⁴ Ke ödrin e hom tang tangö Iehova, me uma mano hnân ûkhacaköu, me ta je ûnyi hia thithö ae kap hnyi hnyin uma; haba tavat bihut me at Levi ödrin e hom ta je ûnyi eling.

⁵ Ke haba Solomona me ûkhacaköu hia anyi Isaraela, tavat adre me ûkhacaköu kâu, ödrin e tha e më hnyi hnyimakan tang, me hudo je mamoe me bolok, a ca hnân bi aû me ha ûseiny anyin ae se hia.

⁶ Ke haba tavat bihut ödrin e odilâ tangen ûhihinyköu anyi Iehova ka hnyi hnen, ka hnyin umen hofuc hnyin uma kap, wale dok ae ti kap, eû hmelen je labenyin li kerubi.

⁷ Anyin ame lau li kerubi li labenyidru hon tang, me haba li kerubi ödru me tube tang me li venyâiny.

⁸ Ke ame beû hmâ li venyâ me me manen li hnyiban li venyâ hnyi dok ae kap cicö umen hofuc, ke ca manen bi eû: ke ka ödru e ke ne o but hnyi bong ang.

⁹ E ba ûnyi hnyi hnyin tang, ke li veto thibi ae lau, waleji ame ip hnyin Mose hnyi Horeba, hnyi ûen Iehova ame ûhihinyköu me lakon Isaraela, waleji a ûhedrin hnyi hnyei Aigupito.

¹⁰ Ke ame didrut tavat bihut ûhedrin hnyi dok ae kap, me ame unöngötö uma umo Iehova ge ûlâ,

¹¹ me me ca khana hnyat bihut he ka tot me huliwa can ûlâ: anyin ame unöngötö uma umo Iehova ge hmanenangi Iehova.

¹² Ke haba Solomona ame fuc, me ha, ka habe, A hia but ha Jehova a e ame he ka laba hnyi menekholom ae gan.

¹³ Awe, oge me hia but otilâ uma me hnyabam, wale dok hobi köu bi, mʼ u me he ka laba hnyin nyiele balua.

¹⁴ Me haba than ame hwio me hahnahicâ ûkhacakoû hia anyin Isaraela: ke ame todrö ûkhacaköu anyin Isaraela hia.

¹⁵ Ke haingen, ka habe, Ole kö Iehova, Khongu Isaraela, at ame ha ge hnyimen kö cica Davita, me ohwâdâ ge hnyamen, ka habe,

¹⁶ Hwân hnyi bong waleji oge me hom lakeik a at Isaraela ûheny Aigupito, me oge me ca ûca ke taun ûnyi hnyi je tribu hia anyin at Isaraela he ka op uma, mʼ adre me ip eling iök; ke oge me ûcö Davita he ka musi hon lakeik a Isaraela.

¹⁷ Ke eû hnyi hnyeku cica Davita he ka op uma hnân hobi kâu iö Iehova, Khongu Isaraela.

¹⁸ Ke Iehova ame ba kö cica Davita, ka habe, Haba hnâm hna hnyok he ka op uma hobi kâu iök, me so hnâm hna hnyok:

¹⁹ ke so bi u me ca he ka op uma; ke haba nokom ame he ka o gam, me hamen bi he ka op uma hobi kâu iök.

²⁰ Ke Iehova ame ohwâdâ hwân hofuc e ame ha; anyin a oge me o but hwabö cica Davita, me tabâ theron anyi Isaraela, helâ me hofuc ho Iehova waleji e ame ha bânâ, me oge me hia but op uma hobi kâu iö Iehova Khongu Isaraela.

²¹ Ke oge me hia but bi hnen eling tang, adre hitangen ûhihinyköu anyi Iehova, waleji e ame ânyâ me lakamöta, kʼ ame hum ödrin ûnyi hnyi hnyei Aigupito.

²² Haba Solomona ame tot cicö taben hut anyi Iehova hnyi hnyimakan ûkhacaköu hia anyin Isaraela, me hai goranyai li hnyamen:

²³ ke haingen, ka habe, Iehova lö, Khongu Isaraela, e ba ke khong ae ûcû möu, ethö hnyi drany, me eang hmeledrany; at ame tuö ûhihinyköu mo ibetengiö ka je laathnyabaem, tavat adre me vheno hnyi hnyimâkâm me hnyekudrin ae bekhot:

²⁴ at ame tuö hobi kâu athnyabaem, a cica Davita, waleji u je fuc kâu: eke, u je fuc ge hnyimâm, me u je hia but ohwâdâ ge hnyamâm, helâ me hnyi bong ang.

²⁵ Ke walang ang, Jehova lö, Khongu Isaraela, tuö thö hobi kâu athnyabaem a cica Davita waleji u je ha kâu, ka habe, Ame ca he ka ba hwabâm hnyi hnyimakök hnân tabô theron anyi Isaraela; wale thibi e ame ne he lakom ka tuö dedrin je gethen, he ka vheno hnyi hnyimakök, helâ me hnâm hna vheno hnyi hnyimakök.

²⁶ Ke walang ang, Khongu Isaraela lö, ō u ohnatho hwâm hofuc, waleji u je ha ka athnyabaem a cica Davita.

²⁷ Ke hawa, e hnathu ame he Khong ka laba eang hmeledrany? wâ ju, e ca ûcû u drany me dranyin ta je drany; ke e ti ca ûcû u uma eang o ge op

²⁸ Ke so bi Iehova Khonguk lö, ō u long hic hijin athnyabaem, me anyin sumat, he ka long hwan hwatenge me hic wale ame hic athnyabaem hnyi hnyimâkâm hnyi bong ang:

²⁹ me me bwele, li emakâm ka hnyi uma eang hnyi hnyinghet me lany, wale ka hnyi dok u je ha gan, ka habe, Ame he ka hnen e iök: he ka long hic hijin athnyabaem hnyi dok ang.

³⁰ Ke long ju sumat anyin athnyabaem, me lakem a Isaraela, ödrin ka he ka hic hnyi dok ang: eke, long ju u e hnyi drany wale hnyabam; ke u ka long ut, ō u thang ut.

³¹ Ame ne ke at ame monu ka ke at, me adre me ip khöbi kâu he ka kunâ e he ka khemanyin, ke e ame o me khemanyin hnyi hnyimakan ânyâm taben hut hnyi uma eang:

³² awe, long ju u ethö hnyi drany, me ânyâ thö, me owisa ka lathnyabaem, me bi hwaban at ae kong, me ip hon ban hwakecin bi; me haiwisa at ae wisa he ka ham kâu hoton hwakecin ae wisa.

³³ Adre me ne he ka kot lakem a Isaraela hnyi hnyimakan iwahnaihmiony, anyin a ödrin e ânyâ hulö köu; ke ödrin e ne he ka hmetu köu, me haimemenâ iâm, me hic me sumat köu hnyi uma ang:

³⁴ awe, u na long ju hnyi drany, me hna hulö anyin lakem a Isaraela, me ohmetu ödrin ju ka hnyi hnyei u je ham ka lakamödrin.

³⁵ Adre me ne he ka hlöng drany, me ba we, can adre me ânyâ hulö köu; ke ödrin ka hic köu hnyi dok ang, me haimemenâ iâm, me hwio ûnyi hnyi anyidrin monu, u ka oveci ödrin:

³⁶ awe, u na long ju hnyi drany, me hna monu anyin lathnyabaem, me lakem a Isaraela, u ka he ka nʼ ödrin ge gethen ae so he ka vheno gadrin; me ham we ka hnyi hon em hnyei, waleji u je ham ka lakem me me idrin.

³⁷ Ame ne hu hmiâ hnyi hnyei, ame ne mok ae cap, ame ne ut me löhau me wahamon me ihmâ; ame ne theling ödrin je iwahnaihmiony mödrin hnyi hnyeiny anyidrin je taun; ame ne hu vec, ame ne hu mok;

³⁸ haba je hic hia me hna sumat hia hnen ke at, ame ne lakem a Isaraela hia, a tavat adre me ve wâhmakhmetoâ vecin je hnyekudrin, me hai li hnyamödrin ka hnyi uma ang:

³⁹ awe, u na long ju hnyi drany, a hnyabam, me hna monu bi, me ânyâ, me ham ka tavat hia hoton dedrin je gethen, ke u je wâhmakhmetoâ hnyekudrin; (anyin a hake u thibi at ame wâhmakhmetoâ hnyekon lakon at hia;)

⁴⁰ mʼ ödrin e he ka outö u hnyi ta je bong hia thithö bongon anyidrin möt hon kânâ, wale hnyei u je ham ka lakamöhmun.

⁴¹ Ke haba atkanyua a ca hanen bi lakem a Isaraela, ke e ka o ûheny hnyi hnyei ae sâkâû ge iâm;

⁴² (anyin a adre me he ka long ge iâm ae gan, me hnyamâm ae hwege, me benyâm adre hai;) ke e ka o me hic hnyi uma eang;

⁴³ awe, u na long ju hnyi drany, a hnyabam, me ânyâ helâ me ta je ûnyi hia ame hawo u hnyin atkanyua; me me khana iâm tavat hia eang hmeledrany, he ka outö u, helâ me hna ânyâ hnen lakem a tavat Isaraela, me me khanʼ ödra a gʼ adre hwenyi ien uma eang wale oge ânyâ, me iâm bi.

⁴⁴ Ame ne he lakem he ka vat me je iwahnaihmiony mödrin, hnyi hnâm hna kunʼ ödrin kâu, ke ödrin e he ka hic kö Iehova cicö taun wale u je ûca, me uma wale oge ânyâ hobi kâu iâm:

⁴⁵ awe, u na long ju hnyi drany hijidrin hic, me hnö-drin hna sumat, me owisa ködrin.

⁴⁶ Ödrin e ne ânyâ hulö köu, (anyin ae ba at ame ca ânyâ hwakecin ae kong;) ke u je hmönyâm ködrin, me hnʼ ödrin ka je iwahnaihmiony, mʼ adre me hum ödrin ka hwenbâ ka hnyi hnyeiny je iwahnaihmiony, ame ne dok ae sâkâû, ame ne hakekeny;

⁴⁷ ke so bi ödrin e ne ûnykûme hnyi hnyekudrin hnyi hnyei adre hom hwenbʼ ödrin hnyin, me hwio thö, me khöû köu hnyi hnyei iny tavat adre me hwenbʼ ödrin, me ha, ka habe, Ohmun e ânyâ hwakecin ae kong, me hwali, me monu;

⁴⁸ ke ödrin e ne hmetu köu ge hnyekudrin ae bekhot me hanudrin ae bekhot hnyi hnyei iny je iwahnaihmiony mödrin, tavat adre me hwenbʼ ödrin, me hic köu cicö idrin hnyei, wale u je ham ka lakamödrin, taun u je ûca, me uma wale oge ânyâ hobi kâu iâm:

⁴⁹ awe, u na long ju hnyi drany, a hnyabam, hijidrin hic me anyidrin sumat, me owisa ködrin;

⁵⁰ me hna but lakem wale ödrin e ânyâ hwakecin ae kong, me hnö-drin je hna hanyâûâ hia ânyâm hnanyibu; me okûâ thö betenge gadrin ûnyi ge tavat adre me hwenbʼ ödrin, mödrin e he ka betenge gadrin:

⁵¹ anyin a lakem me em hnyei ödrin, waleji u je hom ûheny Aigupito, ûnyi hnyi meic hnân leû fao:

⁵² me u me he ka wâ sumat anyin athnyabaem, me sumat anyin lakem a Isaraela, he ka ling ödrin hnyi ta je ûen hia thithö ödrin e he ka hawo u hnyin.

⁵³ Anyin a u, Khong lö a Than, u je ûcʼ ödrin hnân em hnyei ûnyi hnyi ta je hnyei hia thithö eang hmeledrany, helâ me hnâm hna ha a deny Mose athnyabaem, hnyi hnâm hna hom lakamöhmun ûheny Aigupito.

⁵⁴ Ka um do Solomona hijöta je hic eling me sumat kö Iehova, me e ame todrö ûheny hnyi taben hut anyi Iehova, ûheny hnyi hna cibouca me hna hai li hnyamen hnyi drany ai.

⁵⁵ Ke e ame tot me hahnahicâ ûkhacaköu anyin Isaraela hia ge hwan ae gan, haingen, ka habe,

⁵⁶ Ole kö Iehova at ame omenâ lakeiny a at Isaraela, helâ me hnen hna ha bânâ hia: e ca haû bi ke hofuc a khaca hnyi hwan ta je hofuc hia ae so, waleji e ame ha a deny Mose athnyabainy.

⁵⁷ E na tha Iehova ju Khonguta möta helâ me hnen hna tha e me lakamöta: e na ca he ju ka hia gata me hna degeci ota:

⁵⁸ me me he ka wia je hnyekuta kâu, he ka vheno deny ta je gethen hia, me tuö hnen je hna hûna, me anyin je hnanyibu, me hnen je hna owisa, waleji e ame hûna ka lakamöta.

⁵⁹ E na hakekenyâ ju Iehova Khonguta hok ta je hofuc ang, wale oge me sumâtâ hnyi hnyimakö Iehova, hnyi lany me lit, me me he ka owisa ka athnyabainy, me lakeiny a Isaraela, ûnyi ae ûcû hnyi ke bong me ke bong:

⁶⁰ me me khana ta je hnyei hia thithö eang hmeledrany a Iehova thibi Khong; ke ba minya ju.

⁶¹ E so e bekhot je hnyekubun unyi Iehova Khonguta, he ha vheno anyin je hnanyibu, me tuö hnen je hna hûna, helâ me hnyi bong ang.

⁶² Ke haba than me at Isaraela hia a tha ödra më, adre me hudo je hut hnyi hnyimakö Iehova.

⁶³ Ke Solomona ame hudo me je hudiny ole, wale e ame hudo kö Iehova, me twente tu thauzan je bolok, ke wan haded ke twente thauzan je mamoe. Me haba than me lakon Isaraela hia adre me okabâ uma umö Iehova.

⁶⁴ Ke hnyi bong eling than ame okabâ wanben hnyeule ae hnyi hnyimakan uma umö Iehova; anyin a e ame hudo eling hudiny leû, me hudiny han, me pipikhenyainy hudiny ole: anyin ae ûhnyûkong taben hut a bras hnyi hnyimakö Iehova, ke ca ûcû bi hobi kâu hudiny leû, me hudiny han, me pipikhenyainy hudiny ole.

⁶⁵ Me Solomona ame ânyâ bijeû hnyi ûen eling, a tha e me at Isaraela hia, e gan hmâ ûkhacaköu, hwân hnyi gethen ûheny Hamath ke ne o but hnyi wagewe Aigupito, hnyi hnyimakö Iehova Khonguta, seven ta bong ke seven minya ta bong, wale fotin je bong.

⁶⁶ Ke haba hnyi bong a eitiny e ame kunâ tavat, me adre me hahnahicâ than me ve he ka hnyi umödra je uma mano me senyin me hnyok ame hobâ, can ta je so hia ame ânyâ Iehova kö Davita athnyabainy, me Isaraela a lakeiny.