I. Je Than 7 - Iaai Bible 1901 (New Caledonia)

¹ KE haba Solomona ame otilâ umen uma bi hnyi je huna a thötin, me ame um hia thö umen uma.

² Anyin e ame ânyâ uma ûöiny Lebanona; khaca haded kubit ibeûen e, ke fifte kubit ûlauen ke thote kubit ibeûen goranyai, kʼ ame bi taben hon vak ta gaöutö arasi a je hmolom, ke je venyâ arasi hon je hmolom.

³ Ke adre bi arasi hon je venyâ ae hon je hmolom a fâte faiv; a fiftin je gaö.

⁴ Ke kun ta deö mamalama, khaca mamalama cicö ke mamalama, a kun ta dö.

⁵ Ke haba hwanuma me uthwanuma, me khaca tulutiny baten a vak: ke ke mamalama cicö ke mamalama a kun ta dö.

⁶ Ke e ame ânyâ poretiko a je hmolom; haba ibeûen e, me, fifte kubit, ke thote kubit ûlauen; ke e hu poretiko hnyi hnyimakan; ke je hmolom me je venyâ ae gan cicö e.

⁷ Ke e ame ânyâ poretiko hobi kâu theron me me owisa hon, wale poretikoiny hna owisa; ke adre me khavâ e ge arasi hwân eû hnyikânâ ke ne o thö ethö.

⁸ Ke haba umen uma he ka laba hnyin, me wale hnyeule hnyin poretiko, a khaca thibi hna huliwan. Ke e ame bi uma umen hlu nöku Farao, (at a hom Solomona me âiân,) helâ me poretiko eling.

⁹ Haba je vetoiny hia, me, gan hwaban, adre tretrao hoton tulut, kʼ adre gilo ge je gili, eû me eiö, hwân hnyi taben ke ne o but hnyi je veto ethö, a helâe bala ke ne o but hnyi hnyeule ae gan.

¹⁰ Ke haba taben, me je veto ae gan hwaban, a je veto ae gan, ke eit kubit je veto.

¹¹ Ke je veto ae gan hwaban minya ethö, a je veto adre me tretrao, hoton tulut, me je arasi.

¹² Ke haba hnyeule ae gan igigilo, me kun ta deo veto adre tretrao, ke khaca deo venyâ arasi; helâ me hnyeule eiö hnyin uma umo Iehova, me poretikoiny uma.

¹³ Ke haba Solomona than ame ûkhûnöng he ka hum Hirama ûheny Turo.

¹⁴ E nokon safac hanen tribu Nafatali, ke at Turo kamen, at ame huliwan bras: e unöngöt ge metâ, me wâhmakhmeto, me wâ ûnykûme, he ka ânyâ ta je huliwa bras hia. Me e ame he kö Solomona than, me ânyâ anyin ta je huliwa hia.

¹⁵ Anyin a e ame ânyâ li hmolom bras, ûsa eitin je kubit ibeûen goranyai, ke ûsa twelv kubit tulutiny igigilo, ke at me ke at.

¹⁶ Ke e ame ânyâ li ovejien bras adre oköiâ hnân tot ethö hon li ban li hmolom: ke faiv kubit ibeûen goranyai ke ovejien, ke faiv kubit ibeûen goranyai ke ovejien.

¹⁷ Ke e ame ânyâ je boert, me je ûnyi adre wâdrâ kâu helâ me cen, hobi kâu li ovejien wale ethö hon ban li hmolom; seven hobi kâu ke ovejien, ke seven hobi kâu ke ovejien.

¹⁸ Ke e ame ânyâ li hmolom; ke e hu lo li gaö igigilo hon ke boert he ka oiyongâ li ovejien wale ethö hon li ban li hmolom, ke e ame ânyâ helâe hobi kâu ke ovejien.

¹⁹ Ke haba li ovejien wale hon ban li hmolominy poretiko, me e hu hna huliwan helâ me obedila, foa je kubit.

²⁰ Ke e hu li ovejien minya ethö hon li hmolom, hakekeny ka hnyi dok a ganiny baten boert: ke haba je wan rimona me tu haded, adre wâdrâ igigilo hon ke ovejien.

²¹ Ke e ame otilâ li hmolom hnyi poretikoiny uma kap; ke e ame otilâ hmolom hnyi metâ me hwenyi ien Jakina: ke e ame otilâ ke hmolom hnyi me, me hwenyi ien Boaza.

²² Ke haba ethö hon ban li hmolom e hu hna huliwan helâ me obedila: ke adre umo je huliwainy li hmolom eling.

²³ Ke e ame ânyâ taben köiö adre oköiâ, ten kubit hnyi ke baten ka hnyi ke baten, me op wathelaba igigilo, ke faiv kubit ibeûen goranyai; ke haba tulutiny igigilö thote kubit.

²⁴ Ke e hu je ovejien igigilö hmelen baten e, ûsa ten hnyi kubit, ame igigilö taben köiö igigilö: adre tha oköiâ li deo ovejien hnyi ûen adre oköiâ taben.

²⁵ Ke adre otabâ e hon je bolok a twelv, kun ame hnyimakan ka hnyi hwadro, ke kun ame hnyimakan jio, ke kun ame hnyimakan ka hnyi hwaiöu, ke kun ame hnyimakan deiö: ke ethö hon e taben köiö, ke ame iobinyköu eû hnyin.

²⁶ Ke khaca hnyam ûhakiny; ke adre ânyâ baten helâ me baten utkaia, helâ me vongon obedila: lo li thauzan je bath tulutiny.

²⁷ Ke e ame ânyâ je taben a ten ge bras; foa kubit ibeûen ke taben me ke taben, me foa kubit ûlauen, ke kun ta kubit ibeûen goranyai.

²⁸ Ke walang hwakecin hna huliwan je taben: e bu je hwenöniny; ke wanben je baten je hwenöniny:

²⁹ ke haba hnyi je hwenöniny wanben je baten, je liona, me bolok, me kerubi; ke ethö hon je baten e hu je taben: ke eû hmelen je liona me bolok je sa vongon ûö adre uhno.

³⁰ Ke haba je taben hia, ûsa vak je wil bras me li venyainy wil bras: ke eû hmelen je can a vak e ve hu je ciny: eû hmelen taben soû je ciny adre oköia, ve cicö je sa vongon uö adre uhno.

³¹ Ke haba hnyimen hnyin ovejien ke ethö, me, khaca kubit; ke wathelaba hnyimen hoton hna huliwan taben, khaca kubit me haf: ke e bi hnyi hon hnyimen minya je hna kave mecâ, ke khaca tulutiny vak ta hwenöniny je baten, ke ca wathelaba bi.

³² Ke e hu je wil a vak, eû hmelen je baten, ke e bi hnyi taben je venyâiny je wil: ke haba ibeûen vak ta wil, me, ûsa khaca kubit me haf.

³³ Ke haba hna huliwan vak ta wil, me helâ me wiliny kariota: ke adre oköiâ hia, a je venyâiny wil, me otruiny, me je dâiny, me je taben venyâiny je wil.

³⁴ Ke ûsa vak ta ci hnyi vak ta baten je taben hia: haba je ciny me hanen je taben.

³⁵ Ke haba ethö hnyi ban taben igigilö ûnyi ae wathelaba haf kubit goranyai: ke e hnyi hon ban taben je ciny me je baten ke hanen e.

³⁶ Ke e ame kave hon hnyimakan je ciny, me hon je baten, ta je kerubi, me liona, me pama, helâ me ve ûcû, ke je sa vongon ûö igigilö.

³⁷ Helâe e ame ânyâ je taben a ten: adre ve oköiâ hia a khaca tulut, ke khaca bongon.

³⁸ Ke e ame ânyâ je taben soû bras a ten: haba ûganiny taben soû a khaca, me, fâte je bath: ûsa vak kubit je taben soû hia: ke ûsa khaca taben soû hon je taben a ten.

³⁹ Ke e ame ip je taben a thabûng hnyi ke keihen metân uma, ke ke thabûng hnyi ke keihen meny uma: ke e ame ip taben köiö hnyi ke keihen metân uma, deiö, ka hnyi hwaiöu.

⁴⁰ Ke haba Hirama ame ânyâ je taben soû, me je soi, me je kaia. Ke Hirama ame umo ânyâ je huliwa hia thithö wale e ame ânyâ hobi kö Solomona than hnân hobi kâu uma umo Iehova:

⁴¹ a li hmolom, me li ûnyi a khibiny ovejeien walethö hon ban li hmolom; me li boert hnân tube li dok a khibiny ovejien ethö hon li hmolom;

⁴² me je wan rimona a foa haded hobi kâu li boert; lo li deo wan rimona hobi kâu li ve boert, hnân tube li dok a khibiny ovejien walethö hon li hmolom;

⁴³ me je taben a ten, me je taben soû a ten hon je taben;

⁴⁴ ke khaca taben köiö, me je bolok a twelv hmelen taben köiö;

⁴⁵ me je öt, me je soi, me je kaia: kaba je ûnyi hia eling wale a ânyâ Hirama hobi kö Solomona than hnân hobi kâu uma umo Iehova, a bras adre ohadrön-göcâ.

⁴⁶ Haba than ame oköiâ e hnyi dok ae tha hon hnyi Joridano, hnyi kânâ ae keci, wanben Sukotha me Zaretana.

⁴⁷ Ke Solomona ame hna ta je ûnyi hia, me ca tuluto bi, anyin ae ti se hia hmonyin: ke e ca khana he ka elâm ihmakiny je bras.

⁴⁸ Ke Solomona ame ânyâ je omjehen hia uma umo Iehova: wale taben hut a gol, me laulau gol taben areto hnân omanenâ;

⁴⁹ me je taben lamepa gol ae so, thabûng hnyi ke keihen metâ, ke ke thabûng hnyi ke keihen me, cicö umen hofuc; me je vongon, me je lamepa, me je akofi gol;

⁵⁰ me je utkaia, me je uthesiûn, me je kaia me je spun, me je taben meic, gol ae so; me je hinge wale hobi kâu je hlingin uma eiö hnyin uma, wale dok ae ti kap, me hobi kâu je hlingin uma kap wale ke keihen ae gan.

⁵¹ Ke ame um dö je huliwa wale ame ânyâ Solomona than hnyi uma umö Iehova. Haba Solomona ame odilâ thö je ûnyi a okabâ Davita a kamen, wale sileva, me gol, me je kaia, e ame tha ip me omjeûiny uma umö Iehova.