I. Je Than 6 - Iaai Bible 1901 (New Caledonia)1 KE hnyi huna a foa haded ke eite wale ame he but hnyin lakon Isaraela ûnyi hnyi hnyei Aigupito, hnyi huna a vakiny musi anyi Solomona hnyi Isaraela, hnyi tehi Zif, wale tehi a loiny, me e ame ibi hwân op uma umo Iehova. 2 Ke haba uma ame op Solomona than hobi kö Iehova, sikste je kubit ibeûen, ke twente ûlauen, ke thote kubit ibeûen goranyai. 3 Ke haba poretiko cicö dok ae kap hnyi uma, twente kubit ibeûen hoton ûlauen uma; ke ten je kubit ûlauen hnyi hnyimakan uma. 4 Ke e ame ânyâ je mamalama hobi kâu uma me pewânâ hmâ. 5 Ke e ame ânyâ hnyi hnyeige uma je deo hnyeûle igigilo, hnyi uma, me dok ae kap hmonyin: ke e ame ânyâ je hnyeule igigilo. 6 Haba je deo hnyeule eû hmelen, faiv kubit ûlaûen, ke je deo hnyeule hnyi wanben, siks kubit ûlauen, ke haba kuniny, seven kubit ulaûen: anyin a e ame op ûhnyûkongo me me hu je deo taben hnyi hna up veten uma igigilo hnyou, ke adre me ca ohmâ je wangöningön eû hnyin je hna up veten uma. 7 Ke haba uma aidre me op ge je veto adre penapena hnyi kic adre me hom ûnyi hnyin: ke adre me ca long hama, me gö, me ke fao hnyi uma ödra ka tiga op. 8 Haba hwanumen je hnyeule eû wanben, me hnyi ke keihen metân uma: ke adre me ölö wali ka hnyi je hnyeule eû wanben, ke adre me ölö ûheny ang wale hnyi wanben ka hnyi kuniny. 9 Waleling e ame op uma ge je esö arasi. 10 Ke e ame op je deo hnyeule hnyi baten uma hia, ûsa faiv kubit ibeûen goranyai, kʼ ame bi taben je hnyeule ge uto arasi. 11 Ke ame o but hofuc ko Iehova kö Solomona, ame ha, ka habe, 12 Haba bongon uma ang u je op, me u je ne he ka vheno anyik je hnanyibu, me ânyâ hnok je hna owisa, me tuö hnok je hna hûna hia he ka vheno e; awe, oge me he ka ohmâ köu hok hofuc, waleji oge me ha kö Davita a kâmâm. 13 Ke oge me he ka laba unyin lakon Isaraela, ke oge me ca he ka hna degecâ lakeik a at Isaraela. 14 Me haba Solomona ame op uma, me umo e. 15 Ke e ame op je hnyeige uma i eiö hnyin ge je esö arasi; hwân eû hnyikânâ ke ne o thö ethö, e ame tube eiö hnyin ge uto: ke e ame bi deikiny uma ge je esö kop. 16 Ke e ame bi haginy eiö hnyin uma a twente kubit ge je esö arasi, hwân eû hnyikânâi ke ne o thö ethö: wale e ame otilâ e eiö hnyin me hnân umen hofuc, wale hnân dok ae kap hmonyin. 17 Ke haba uma wale uma kap hnyi hnyimakan umen hofuc, me, fâte kubit ibeûen. 18 Ke e hu arasi eiö hnyin uma adre kave je ovejien hnyin, me je vongon ûö ae susu, arasi hia, e ba veto ae manen bi. 19 Ke e ame penapena umen hofuc eiö hnyin hnyi wanben uma, mʼ adre me he ka ip eling tangen ûhihinyköu anyi Iehova. 20 Ke haba umen hofuc me twente je kubit ibeûen, ke twente je kubit ûlauen, ke twente je kubit ibeûen goranyai; ke ame tube ge gol ae so, me tube taben hut ge arasi. 21 Haba Solomona ame tube eiö hnyin uma ge gol ae so: ke e ame lelö je cein gol hnyi hnyimakan umen hofuc; me tube e ge gol. 22 Ke e ame tube hia uma ge gol ke ne o but ame um do uma: ke e ame tube hia taben hut hnyi umen hofuc ge gol. 23 Ke e ame ânyâ hnyi hnyin umen hofuc li kerubi uto elaio ûsa ten kubit ibeûödru goranyai. 24 Ke faiv kubit ke labenyin ke kerubi, ke faiv kubit ke labenyin ke kerubi: ten je kubit hwân hnyi obiny ke labenyin ke ne o but hnyi obiny ke labenyin. 25 Ke ten je kubit ke kerubi: khaca tulut me khaca bongon li kerubi. 26 Ten kubit ibeûen goranyai ke kerubi, ke helâe minya ke kerubi. 27 Ke e ame ip li kerubi hnyi hnyin uma eiö hnyin: ke ame lau li labenyin li kerubi, me ame kâlâ hnyeige uma labenyin ke at, ke ame kâlâ ke hnyeige uma hnen labenyin ke kerubi; ke ame ûginö ke li labenyidru wanben uma. 28 Ke e ame tube li kerubi ge gol. 29 Ke e ame kave je hnyeige uma hia igigilo ge je kerubi adre kave, me je ûö pama, me je vongon ae susu, eiö me eû. 30 Ke e ame ave uma ge gol eiö me eû. 31 Ke e ame tibet li hlinginy ûö elaio hnân hwanumen umen hofuc: haba hlanyin me li uthwanuma ûsa ke keihen a thabûnginy hnyeige uma. 32 Ke haba li hlinginy, uto elaio; ke e ame kave hnyin je hnatheati kerubi, me je ûö pama, me je vongon ae susu, me tube ge gol, ke e ame khavâ ge gol je kerubi me je ûö pama. 33 Ke helâe minya e ame ânyâ hnân hwanumen uma li uthwanuma elaio ûsa ke keihen a vakiny hnyeige uma; 34 ke uto kop li hlinginy; haba li hlinginy ke kwanuma adre iounyâ, ke li hlinginy ke hwanuma adre iounyâ minya. 35 Ke e ame kave hon je kerubi, me je ûö pama, me je vongon ae susu, me e ame tube ge gol adre okhavâ hon hna kave. 36 Ke e ame ânyâ hnyeule hnyi hnyin ge kun ta deo veto adre tetrao, me ke deo venyâ a arasi. 37 Hnyi huna a vakiny hnyi tehi Zif adre bi taben uma umo Iehova. 38 Ke hnyi huna a eleveniny hnyi tehi Bul, wale tehi a eitiny ame um dö uma me je ke keihen e hia hoton je bongon hia. Me e ame ânyâ hnyi seven je huna. |
maintained by the British and Foreign Bible Society
Bible Society of the South Pacific