I. Je Than 5 - Iaai Bible 1901 (New Caledonia)

¹ KE haba Hirama thaniny Turo ame kunâ lathnyabainy kö Solomona; anyin a e ame long a gʼ adre hû me me than hwaban kamen: anyin a Hirama ame labö hnyokö Davita.

² Ke Solomona ame ûkhûnöng kö Hirama, me ha, ka habe,

³ E khanö u a e ca khanö cica Davita he ka bi uma hobi kâu iö Iehova Khongon can je vat igigilo, ke ne o but Iehova ame ip ödra hmelen li hnyeûcan.

⁴ Ke walang ang Iehova Khonguk ame omeno nya igigilo; e ba iwahnaihmiony, ke ba ke ûnyi ae kong ame kû.

⁵ Ke wâ bi, oge me ûnykûme bi nya he ka bi uma hobi kâu iö Iehova Khonguk, helâ me Iehova ame ha kö cica Davita, ka habe, Haba nokom oge me he ka bi uma hobi kâu iök.

⁶ Ke walang ang u me he ka hûna he ka si arasi hnyi Lebanona hobi könya; ke ame he lakeik ka tha ödrin bi me lakeim; ke oge me he ka ham köu hwaban lakem hoton hnâm hna ha: anyin ae khanö u ae ba at gahmun ae khana he ka si uto helâ me at Sidona.

⁷ Ke a long ut Hirama hofuc ho Solomona, me e ame senyin gan hmâ, me ha, ka habe, Ole kö Iehova hnyi bong ang, at ame ham kö Davita nokon ae metâ he ka muso hnyei eling ae gan.

⁸ Me haba Hirama ame ûkhûnöng kö Solomona me ha, ka habe, Oge me long ut uthumetu u je hunâ könya: me oge me he ka ânyâ hia wem, ge ta je uto arasi, me ta je uto kop.

⁹ Ke hamen lathnyabaik he ka lelö je ûö ka hnyi köiö ûheny Lebanona: me oge me he ka ûhukhâlâköuâ je ûö he ka hâiâ tilâ hnyi köiö ka hnyi dok u me he ka kû könya, ke adre me be ka thang ut eling, me u me he ka kap; ke u me he ka ânyâ wek he ka ham jeû hobi kâu anyik lap.

¹⁰ Me Hirama ame ham kö Solomona je uto arasi me je uto kop e ame weny.

¹¹ Ke Solomona bi ame ham kö Hirama je hwit a twente thauzan je tulut hnân han hobi kâu anyin lap, me je tulutiny wakaco adre kokot a twente: ame ham helâe Solomona kö Hirama hnyi ke huna me ke huna.

¹² Ke Iehova ame ham kö Solomona metâ helâ me hnen hna ba bânâ kâu; ke Solomona me Hirama Ödru me laba ûsoköu; ke ödru me ûhihinyköu.

¹³ Ke Solomona than ame ûca tavat ûheny Isaraela hia; ke haba hna hûce at, me ödrin thote thauzan tavat.

¹⁴ Ke e ame kunʼ ödrin Lebanona ai, ödrin ten thauzan hnyi tehi: khaca tehidrin hnyi Lebanona, ke lo li tehidrin hnyi hnyabadrin: ke hanymö Adonirama hon tavat adre ûca.

¹⁵ Ke ödrin sevente thauzan tavat atö Solomona tavat hije hok, ke eite thauzan tavat si uto hnyi je bucen;

¹⁶ ca ha bi je homakan adre tuö huliwa anyi Solomona, ödrin theri thauzan ke theri haded tavat muso tavat adre me bi huliwa.

¹⁷ Ke haba than ame ûkhûnöng he ka hom je veto ae gan hmâ, je veto ae ti ûnyi hnathu, hnân he ka ip taben uma ge je veto adre tretrao.

¹⁸ Ke ame huliwan hnen tavat up uma atö Solomona, me tavat up uma atö Hirama, me tavat Gebali, me penapena je uto me je veto hnân up uma.