I. Je Than 4 - Iaai Bible 1901 (New Caledonia)

¹ HABA Solomona than, me e thaniny at Isaraela hia thithö.

² Ke walang je taben unyin; Azaria nöku Zadoka at bihut;

³ me Eliorefa me Ahia, li laku Sisa, li at sihnalimen; me Jehosafata nöku Ahiluda, at ame oûnykûmeâ;

⁴ me Benaia nöku Jehoiada, taben je utbavat; me Zadoka me Abiathara, li at bihut;

⁵ me Azaria nöku Nathana, taben tavat tue; me Zabuda nöku Nathana, obotkong me at ame tha hnyok me than;

⁶ me Ahisara ame tuö hnyaba; me Adonirama nöku Abeda at ame ō fat.

⁷ Ke twelv je obotkongi Solomona hon at Isaraela hia, ke hanymodrin he ka bi an than me anyin lap: ûsa khaca tehi ködrin ka bi han hnyin hnyi huna.

⁸ Ke walang je iödrin: jia Bene-huro, hnyi hnyei ae hut hnyi Eferaima:

⁹ Bene-dekera, hnyi Makaza, me hnyi Salabim, me Bathe-semes, me Elona-bethe-hanan:

¹⁰ ke Bene-heseda hnyi Aruboth; ke hanymen hnyi Soko me hnyei hia Hefera:

¹¹ ke Bene-abinadab hnyi hnyei ae hut hia e Dora; wale at a hum Tafatha hlu nöku Solomona me âiân bi:

¹² ke Baana nöku Ahiluda, hnyi Tanaka, me Megido, me Bethe-seana hia a hakekeny Zaretana, hnyi hmelen Jezerela, hwân e Bethe-seana ke ne o but hnyi Abela-mehola, ke ne o but cicö Jokameama:

¹³ ke Bene-gibera, hnyi Ramoth-gileada; e hu hanymen bi hnyi je taun anyi Jaira nöku Manase hnyi Gileada, me hnyi ke keihen Aregoba hnyi Basana, sikste je taun ae gan adre up haginy veto me je ohmâiny a bras:

¹⁴ ke Ahinadaba nöku Ido, hnyi Mahanaima:

¹⁵ ke Ahimaza hnyi Nafatali; e ame hum Basemathi hlu nöku Solomona me âiân:

¹⁶ ke Baana nöku Husai, hnyi Asera me Aloth:

¹⁷ ke Jehosafata nöku Parua, hnyi Isakara:

¹⁸ ke Simei nöku Ela, hnyi Beniamina:

¹⁹ ke Gebera nöku Uri, hnyi hnyei Gileada, hnyei i Sihona than Amora, me Oga than Basana; ke hake e thibi obotkong hnyi hnyei.

²⁰ Ke e se hia at Juda me Isaraela, helâ me önyin köiö ûseiny, adre me han me ic me senyin.

²¹ Ke haba Solomona ame muso je dökhu hia hwân hnyi Wagewe ke ne o but hnyi hnyei iny at Filisiti, ke ne o but hnyi hnyiguölen Aigupito: ke adre me ham bwihlany me huliwa kö Solomona hnyi bongon ta je bong hia thithö.

²² Ke haba ō Solomona hnyi bong a khaca, me thote je tulutiny falawa ae so, ke sikste je tulutiny ke falawa bi;

²³ ten je bolok ae pipikhenya, ke twente je bolokiny hnyot, ke khaca haded je mamoe, ca ha bi je aila, me je zebi, me je imura, me je meno ae pipikhenya helâ me koto.

²⁴ Anyin a e ame muso hia hnyi ke keihen ejem Wagewe, hwân hnyi Tifesa ke ne o but hnyi Gaza, hon ta je than hia hnyi ke keihen ejem Wagewe: ke e hu ûsoköu hnyi je ke keihen hia igigilo.

²⁵ Ke haba at Juda me Isaraela hia adre me ve laba hnahic, hmelen haledrin je ûvine, ke hmelen haledrin je imeta, hwân hnyi Dana ke ne o but hnyi Bere-seba, hnyi ta je bong hia thithö anyi Solomona.

²⁶ Ke e hu ga Solomona fâte thauzan je hnyeuleny horse hobi kâu anyin je kariota, ke twelv thauzan tavat tabö horse.

²⁷ Ke haba je obotkong eling ödrin e bi ō Solomona than mödrin hia thithö Ödrin e he ka hnyi laulau anyi Solomona than, ûsa khaca tehidrin: ke ba ke ûnyi ae hia.

²⁸ Ke adre me hom bali me je thatûnyin hwit minya hobi kâu je hors me je meno ame he logot, ödrin e hom ka hnyi hnen hna laba hnyin, hoton je ve hudrödrin.

²⁹ Ke Khong ame ham kö Solomona metâ me wâhmakhmetoâ ae ti gan, me hnyok ae gan hmâ, helâ me öny hnyi köiö.

³⁰ Ke haba metâ anyi Solomona, me gan hon metâ anyin tavat hia thithö e deiö, me metâ hia hnyi Aigupito.

³¹ Ke e beönua anyin metâ hon tavat hia thithö; hu Ethana at Ezera, me Heman, me Kalekol, me Dada, je laku Mahola; ke e lung hnyi ta je hnyei hia igigilo.

³² Ke e ame ha ta je vejec a theri thauzan: ke haba anyin je khumöng, khaca thauzan me faiv.

³³ Ke e ame ha bongon je ûö hwân ge arasi hnyi Lebanona ke ne o but ge hisop ame kû hnyi hna up veto: ke e ame ha minya ge je meno ae gan, me je meno ame gâ me je meno ame iyâû, me ta je wâ.

³⁴ Ke ame o tavat ûhedrin hnyi je hnyei hia he ka long metâi Solomona, ûnyi ge je than hia eang hmeledrany adre me long ge anyin metâ.