I. Je Than 3 - Iaai Bible 1901 (New Caledonia)

¹ KE haba Solomona ame hwân he ka liameûngon me Farao than Aigupito, anyin a e ame hom hlu nöku Farao, me hom e ka hnyi taun anyi Davita, ke ne o but e ame mö um dö op umen uma, me uma umo Iehova, me hak veto igigilo Jerusalema.

² Ke so bi haba tavat adre bi hut hnyi je dok ae görany, anyin a ödra tiga ca um op uma umen iö Iehova ke ne o but hnyi je bong eling.

³ Ke Solomona ame hnyok kö Iehova, kʼ ame vheno je hnanyibu anyi Davita a kamen; ke so bi e ame hudo me leû uto ae bo so hnyi je dok ae görany.

⁴ Ke haba than ame he Gibeona ai he ka bi hut eling; anyin a haba wale dok ae görany ke gan bi: khaca thauzan je hudiny leû ame hudo eling Solomona hon taben hut.

⁵ Ke Iehova ame manen kö Solomona hnyi Gibeona hnyi bwi hnyi hnyinghet: ke ame ha Khong, ka habe, Sumâtâ thö ûnyi oge me he ka ham köu.

⁶ Ke haingö Solomona, ka habe, U je betenge gan hmâ ga cica Davita athnyabaem, hoton hnen hnaʼ he hnyi hnyimâkâm hnyi hnathu, me hwakecin ae so, me hnyekon ae wisa köu; ke u je tuö hobi kâu ibetengiö ang ae gan, a u je ham kâu nokon he ka laba hon anyin theron, helâ me hnyi bong ang.

⁷ Ke haba walang ang, Iehova lö a Khonguk, u je otilö nya athnyabaem he ka than hwabö cica Davita: ke iny wanakat ae ûhnyûkong; ke ca khanö nya bongon he ka didrut me didro.

⁸ Ke inya but ang a athnyabaem hnyi wanben lakem waleji u je uca, hnyei ae gan, ae pason he ka ha ûseiny, ke ca hnân aû anyin ae se hia.

⁹ Ö u ham könya athnyabaem hnyok ae metâ he ka owisa ka lakem, mʼ inye he ka wâhmakhmeto so me kong; anyin a ie at ae khana he ka owisa ka lakem ae gan helâng?

¹⁰ Ke haba hofuc ho Solomona me so ka Than, wale ame sumâtâ ûnyi eling.

¹¹ Ke haba Khong ame ha kâu, ka habe, Anyin a u je sumâtâ ûnyi eling, ke u je ca sumâtâ he ka möt beû hobi köu bi, ke u je ca sumâtâ omjeû hobi köu bi, ke u je ca sumâtâ me me mok je iwahnaihmiony möu; ke u je sumâtâ bi metâ hobi köu mʼ u me wâhmakhmetoâ he ka owisa;

¹² awe, oge hia but ânyâ helâ me hnâm hna ha: me wâ bi, oge hia but ham köu hnyok ae metâ me wahmakhmeto; ke ba ke at a helâ möu ehac, ke haba khaca, e ba ke at ame he ka ûcû möu ame he ka o hwabâm.

¹³ Ke oge hia but ham minya köu ûnyi u je ca sumâtâ, wale omjeû me he ka lung, me me ca he bi ka ûcû möu ke than, hnyi bongom ta je bong hia thithö.

¹⁴ Ke u je ne he ka vheno dek je gethen he ka tuö anyik je hnanyibu me hnok je hna hûna, helâ me hnö Davita a kâmâm hna vheno, me oge me he ka osehia bongom je bong.

¹⁵ Ke ame hmak dö Solomona, me wâ bi, ame bwi: ke e ame o Jerusalema ai me tot hnyi hnyimakan tangen ûhihinyköu anyi Iehova, me hudo je hudiny leû, me je hudiny ole, me ânyâ bijeû ka lathnyabainy hia.

¹⁶ Ke ame o but ka than li momo hnyi gethen, me tha tot hnyi hnyimakan.

¹⁷ Ke ame ba ke momo, ka habe, Than lö, oge laba me momo ang hnyi uma a khaca; ke oge me hnokoâ hnyi uma eling më.

¹⁸ Ke haba hnyi bong a kuniny hwaban hnok hna hnokoâ, haba momo ang ame hnokoâ minyâ; ohmu thibi; ke ba ke at unyihmu hnyi uma, ke hake ohmu ke hnyi uma.

¹⁹ Ke ame mokcu nokon momo ang hnyi hnyinghet; anyin a e ame hwio takoû.

²⁰ Ke e ame todrö wanbenset, me hom nökuk da gak, e ka tiga mokut bi nya athnyabaem me ip e hnyi ûlainy, ke e ame ip bi nokon a mokcu hnyi ûlaik.

²¹ Ke iny ka hmak dö hnyi hnyomakatu he ka asen nökuk, me wâ bi a mokcu: kʼoge hia but wâhmakhmeto e hnyi hnyomakatu, me wâ bi, a ca nökuk bi waleji oge hnokoâ.

²² Ke haingen ke momo, ka habe, Ohe, nökuk bi ang ae möt, ke ka nokom e ae mok. Ke haingen momo, a bân, ka habe, Ohe, nokom bi e ae mok, ke ka nökuk bi ang ae möt. Wale hnödru hna ha hnyi hnyimakan than.

²³ Haba than ame ha, ka habe, Haingen ke at, ka habe, Ka nökuk ang ae möt, ke nokom bi e ae mok: ke haingen bi ke at, ka habe, Ohe, nokom bi e ae mok, ke ka nökuk bi ang ae möt.

²⁴ Ke haingen than, ka habe, Hö jem könya hele vat. Ke ödrin e hom ke hele vat ka hnyi hnyimakan than.

²⁵ Haba than ame ha, ka habe, Kave luâ but wanakat ae möt, me ham ke keihen ka ke at me ke keihen ka ke at.

²⁶ Haba momo hinyen wanakat ae möt ame ha ka than, anyin a e ame hnyok ka nokon, ka habe, Than lö, ham kâu wanakat ae möt, ke ca he bi ka hlingâ. Ka ame ha bi ke at, ka habe, Awe me me ca nökuk bi me ca nokom, kave luâ but.

²⁷ Me than ame thu, ka habe, Ham ka at eji wanakat ae möt, ke ca hlingâ bi; e bi hinyen.

²⁸ Haba at Isaraela hia adre me long hna owisa hnen than; me adre me outen than: anyin adre me wâ a e unyin metâ he ka owisa ûnyi ge Khong.