I. Je Than 2 - Iaai Bible 1901 (New Caledonia)

¹ KE hakekeny dut ûen ame he but Davita ka mokcu; me e ame hûna kö Solomona a nokon, ka habe,

² Oge me he ka vheno gethen deny aten hmeledrany hia: bethe hwege ju u, me hnyok baga thö;

³ ke tuö je hanymâm ûnyi ga Iehova Khongom, he ka vheno deny je gethen, me tuö anyin je hna hûna, me anyin je hnanyibu, me hnen je hna owisa, me hnen je hna otilâ, helâji me hna sihnalimen hnyi tusi anyi Mose, mʼ u me hnahic hnyi ta je ûnyi hia u me he ka ânyâ, me ta je dok u me he ka he kâu:

⁴ me me he Iehova ka ohmâ hwan hofuc, waleji e ame ha gak, ka habe, Ame ne he lakom ka tuö dedrin je gethen he ka he hnyi hnyimakök hnyi hnathu ge hnyekudrin ae bekhot me hanu ae bekhot, (haingen,) ame ca he ka ba hwabâm hon theron hnyi Isaraela.

⁵ Ke haba khaca, e khanö u but waleji a ânyâ könya Joab nöku Zeruia, waleji e ame ânyâ ka li taben vat anyin at Isaraela, jia Abinera nöku Neri, me Amasa nöku Jether, a li at e ame hlingâ, me hingâlâ dren vat hnyi ûen hnahic, me ip dren vat hon wen hnyekon hnyi hnyin, me hnyi tangen hnyeûcan hnyi li can.

⁶ Anyin a wale ânyâ thö hoton ânyâm metâ, me ca hna ban ae hûen ka utut ka hnyi erkemok hnyi hnahic.

⁷ Ke u me he ka betenge ge laku Bazilai at Gileada, ke ödrin e he ka hnyi han hnyi ânyâm laulau: anyin a helâe ödrin e he könya hnyi ûen oge me kec ga Abasoloma liamekeiny möu.

⁸ Ke wâ bi e unyâm Simei nöku Gera at Beniamina ûheny Bahurim, ke e ame hangö nya ke hwege hnen hna ûhangö waleji hnyi bong oge me he hnyin Mahanaima ai: ke so bi o ame utut he ka ûkhanö mönya hnyi Joridano, me oge me khemanyin kâu ga Iehova, ka habe, Oge me ca he ka blingö u ge hele vat.

⁹ Ke walang ang u me ca he ka ha a e ba anyin monu, anyin a u at ae metâ, ke e khanö u ûnyi ae ûcû he ka ânyâ kâu, ke u me he ka hom ban ae hûen ka hnyi erkemok ge dra.

¹⁰ Ke Davita ame tha mokut me lakamen, me adre me konâm e hnyi taun anyi Davita.

¹¹ Ke haba ta je bong ame musi hnyin Davita hon at Isaraela, me, fâte je huna: seven je huna e ame musi hnyi Heberona, ke thote theri je huna e ame musi hnyi Jerusalema.

¹² Ke Solomona bi ame tabâ theron anyi Davita a kamen; ke adre ti ohmâ dokhon dökhu.

¹³ Ke haba Adonia nöku Hagitha ame o kö Bathe-seba hinyö Solomona. Ke haingen momo ka habe, Hawa u me oâ hnahic? Haingen, ka habe, E ke.

¹⁴ Me e ame ha ka momo, ka habe, E hu hok hofuc he ka ha köu. Haingen, ka habe, ha thö.

¹⁵ Haba e ame ha, ka habe, e khanö u a hanymök dökhu, ke haba at Isaraela hia ödrin e tha hnyimakodra könya me inye than; ke so bi adre wia bi dökhu, me adre ham bi ka keik, anyin a Iehova ame ham kâu.

¹⁶ Ke walang ang inya oge me sumatö u ge ke ûnyi a khaca, u me ca be ka behânâ. Haingen momo, ka habe, Ha thö.

¹⁷ Haingen, ka habe, Ö u ha kö Solomona than (anyin a e ame ca he ka behânâ gam,) me me ham Abisaga könya at Sunema me öiök.

¹⁸ Ke Bathe-seba ame ha, ka habe, E so; oge me be ka ûhnenamö me than hobi köu.

¹⁹ Haba Bathe-seba ame he kö Solomona than he ka ûhnenamö më ga Adonia. Ke than ame tot he ka ûkhanö më, ke e ame nom kâu, me laba hon anyin theron, me kunâ he ka ip ke theron hobi kâu hinyen than; ke momo ame laba hnyi ke keihen a metân.

²⁰ Haba momo ame ha, ka habe, Inya oge me sumatö u ge ke ong ûnyi a khaca; ca he ka bebanö nya. Haingen than, ka habe, Bai, sumâtâ thö: anyin a oge me ca he ka behânâ gam.

²¹ Haingen momo, ka habe, He ka ham Abisaga at Sunema kö Adonia liamekeiny möu me âiân.

²² Haba Solomona than ame thu me ha ka hinyen, ka habe, Anyin a ieû u me sumatö Abisaga at Sunema hobi kö Adonia? sumâtâ minya thö dökhu hobi kâu; anyin a tuhok e; a hobi kâu bi, me Abiathara at bihut, me Joab nöku Zeruia.

²³ Haba Solomona than ame khemanyin ga Iehova me ha, ka habe, Ame he Khong ka ânyâ helâe könya me bi hanen minya, a ne ca ha Adonia hofuc e hnân hangâ e bi.

²⁴ Awe, kia inya Iehova, at ame ohmö nya, me olabö nya hon theron anyi cica Davita, me at a bi hnyabak, helâ me hnen hna ha bânâ, a gʼ adre me he ka hlingö Adonia hnyi bong ang.

²⁵ Haba Solomona ame kunö Benaia nöku Jehoiada; ke ame kot moko e.

²⁶ Ke haba than ame ha kö Abiathara at bihut, ka habe, He thö Anathoth ai ka hnyi em hnyei; anyin ae ûcû u me he ka mok: ke oge me ca he ka hlingö u walang ang, anyin a u je hom tilâ tang tangö Iehova a Than hnyi hnyimakö cica Davita, ke can u je hom vec hnyi ta je ûnyi hia ame vec cica hnyin.

²⁷ Me haba Solomona ame obö Abiathara ûnyi hnyi hanymen at bihut kö Iehova; me me ohwâdâ hofuc ho Iehova, waleji a ha ge lap anyi Eli hnyi Silo.

²⁸ Ke Joab ame long ûthumetu eling: anyin a hia but Joab he hoton Adonia, ke so bi a ca he hotu Abasoloma bi. Me Joab ame kec ka hnyi Uma Mano umö Jehova, me kât je baitoiny taben hut.

²⁹ Ke adre me thumetu Solomona than a ga, kec dö Joab ka hnyi Uma Mano umö Iehova, ke wâ bi e but hnyi taben hut. Me haba Solomona ame kunö Benaia nöku Jehoiada, me ha, ka habe, He thö ka kot.

³⁰ Haba Benaia ame he ka hnyi Uma Mano umo Iehova, me ha kâu, ka habe, Walang hofuc hwan than, ka habe, Aiö u. Haingen, Ohe; oge ma he ka mok ang. Me Benaia ame hmeto hofuc ka than, me ha, ka habe, Ame ha helâng Joab, ke e ame thu könya helâng.

³¹ Ke haingen than kâu, ka habe, Ânyâ thö helâ me hnen hna ha, ke kot ju, me konâm e; mʼ u me he ka ohia dra ae ba hnyikongon, waleji a hingâlâ Joab ûnyi gak, me ûnyi ge lap anyi cica.

³² Ke ame he Iehova ka ohmeto dren ka hnyi hon ban bi, anyin a e ame kot li at ae wisa me so hon, me hlingʼ ödru ge hele vat, ke ca khanö cica Davita, wale jia Abinera nöku Neri, taben vat anyin at Isaraela, me Amosa nöku Jether taben vat anyin at Juda.

³³ Ke ame he hmetu drödru ka mokut hon bö Joab me hon ban je mâtrâniny nyiele balua: ke ame he ka hu hnahic ûnyi ga Iehova nyiele balua kö Davita, me je mâtrâniny, me anyin lap, me anyin theron.

³⁴ Me haba Benaia nöku Jehoiada ame he, me kot hlingâ e; ke adre me konâm e hnyi umen uma hnyi hnyebuba.

³⁵ Me haba than ame otilö Benaia nöku Jehoiada hon je utbavat me hwaban: ke than ame otilö Zadoka at? bihut me hwabö Abiathara.

³⁶ Ke haba than ame ûkhûnöng he ka hawo Simei, me haingen kâu, ka habe, He thö ka bi umâm uma hnyi Jerusalema, me laba eling, ke ca he bi ka hnyi hoton hak.

³⁷ Anyin a hnyi bong u me he ka he didrut me hanyâûâ wagewe Kideron, wâhmakhmeto ju a u me he ka mok: ame he ka mokut hon bâm drâm bi.

³⁸ Haba Simei ame ha ka than ka habe, E so hna ha: ame he athnyabaem ka ânyâ helâ me hnâm than hna ha. Ke haba Simei ame laba hnyi Jerusalema e se hia je bong.

³⁹ Ke hwaban kun ta huna me ame kec li lathnyabai Simei kö Akisa, nöku Maaka, thaniny Gatha. Ke ödrin e thumetu Simei, ka habe, Wâ bi, haba li lathyabaem ödru but Gatha.

⁴⁰ Haba Simei ame todrö, me hûkâlâ taben hon haleny asina me he Gatha ai kö Akisa he ka elâm li lathnyabainy hlu: ke Simei ame he me hom anyin li athnyaba ûheny Gatha.

⁴¹ Ke adre me thumetu Solomona ʼ Simei ame he Gatha ai ûheny Jerusalema, ke a o hmetu thö.

⁴² Haba than ame ûkhûnöng he ka hum Simei, me ha kâu, ka habe, Hawa, oge me ca kunö u he ka khemanyin kö Iehova, me ha hwegiâ köu, ka habe, Wâhmakhmeto ju a u me he ka mok hnyi bong u me he ka he hnyou ai, me he monu me ngenu? ke u je ha könya, ka habe, E so hofuo oge me long.

⁴³ Ieû can u je ca vheno hna khemanyin kö Iehova, me hnanyibu oge hûna köu?

⁴⁴ Ke haba than ame ha minya kö Simei, ka habe, U je wâhmakhmeto but ae kong hia eû hnyi hnyekom, waleji u je ânyâ kö cica Davita; ke ame he Iehova ka bi hwaban ânyâm monu hon bi bâm,

⁴⁵ ke ame he Solomona than ka hnahic, ke ame he ka tet hmâ theron anyi Davita hnyi hnyimakö Iehova nyiele balua.

⁴⁶ Haba than ame kunö Benaia nöku Johoiada me e ame he me kot hlingâ e. Ke hmâ but dökhu unyi Solomona.