I. Je Than 16 - Iaai Bible 1901 (New Caledonia)

¹ KE ame o but hofuc ho Iehova kö Jehu nöku Hanania ga Baasa ame ha, ka habe,

² Anyin a oge ogöranyi u ûnyi hnyi sesâ me otüö u hnân thaniny lakeik a at Isaraela; ke u je hia but vheno gethen de Jeroboama, me kunâ lakeik a Isaraela he ka monu, he ka okûâ anyik hmonyin ge anyidrin je hulö;

³ wâ bi, oge me he ka aba degeci Baasa but me anyin lap; ke oge me he ka wia ânyâm lap he ka helâ me lap anyi Jeroboama nöku Nebata.

⁴ Haba hanö Baasa ame he ka mok hnyi taun, ame he je kuli ka an, ke haba hanen ame he ka mok hnyi ta hnyei, ame he je meno ame gâ ka an.

⁵ Ke haba kolon je hna ânyâ hnö Baasa, me anyin je huliwa, me anyin hwege, hawa, adre ca sihnalimen hnyi tusi hnân ha je bong bongon je than Isaraela?

⁶ Ke ame mokut ut Baasa tha e me lakamen, me adre konâm e hnyi Tireza; ke ame than biju Ela a nokon hwaban.

⁷ Ke ame o but hofuc ho Iehova minya a deny Jehu a perofeta nöku Hanani ga Baasa, me ga anyin lap, can ta je monu hia e ame ânyâ hnyi hnyimakö Iehova he ka okûâ anyin hmonyin ge huliwa anyin li hnyamen, wale me me helâ me lap anyi Jeroboama, me khaca minya anyin a e ame hlingâ.

⁸ Ke haba hnyi huna twente siksi Asa than Juda, ame hwân Ela nöku Baasa he ka musi hon Isaraela hnyi Tireza, me musi hnyi lo li huna.

⁹ Ke haba Zimeri athnyabainy, taben hafiny anyin je kariota, ame sihnân: ke e bi hnyi Tireza ame ic me ka omono e bi hnyi uma umö Areza, at ame tuö hnyaban hnyi Tireza:

¹⁰ ke Zimeri ame didro, me kot e, me hlingâ e, hnyi huna a twente seveni Asa than Juda, me e ame than ju hwaban.

¹¹ Ke e ame bi hwân he ka than, ke e ame hap tabâ anyin theron, me e ame hlingâ hia lap anyi Baasa: e ame ca hna wan ke da a khaca, ame ne liamekeiny më, ame ne lahanen.

¹² Ke haba Zimeri ame ohia lap anyi Baasa helâe, helâ me hofuc ho Iehova waleji e ame ba ga Baasa a deny Jehu perofeta,

¹³ can ta je hulö hia anyi Baasa, me ta je hulö anyi Ela a nokon, wale ödre ânyâ, me waleji hna okûâ monu anyi Isaraela, he ka kunö Iehova Khongu Isaraela he ka hmonyin ge anyidrin ta je ûnyi baû.

¹⁴ Ke haba kolon je hna ânyâ hnö Ela, me anyin ta je huliwa, hawa, adre ca sihnalimen hnyi tusi hnân ha je bong bongon je than Isaraela?

¹⁵ Ke haba hnyi huna a twente seveni Asa than Juda, me, haba Zimeri ame than hnyi Tireza hnyi seven ta bong. Ke ame hunuma tavat ûcon Gibethon, wale iny at Filisiti.

¹⁶ Ke a long ut tavat hunuma a ga hia but sihnân ga Zimeri, kʼ ame hia but kot minya than: anyin a wale haba at Isaraela hia adre me otilö Omeri wale taben vat me me than hnyi bong eling hnyi hna hunuma.

¹⁷ Me ame he Omeri tha e me at Isaraela hia ûhedrin Gibethon, me ödrin e thelöng Tireza.

¹⁸ Ke a wâ but Zimeri a gʼ adre hûgûnâ but taun, me e ame didro ka hnyi uma umen than, me e ame thong uma umen than ka hnyi hon e bi ge meic, me ame mokcu,

¹⁹ can ta je hulö e ame ânyâ hnyi hnyimakö Iehova, hnyi hnen hna vheno gethen de Jeroboama, me anyin hulö, waleji ame kû monu ka at Isaraela.

²⁰ Ke haba kolon je hna ânyâ hnö Zimeri, me hnen hna sihnân, hawa adre ca sihnalimen hnyi tusi hnân ha je bong bongon je than Isaraela?

²¹ Me haba at Isaraela adre me khekhe lo but: haba ke hafiny adre me hnu hotu Tibeni nöku Ginath, he ka otilâ me than; ke haba ke haf adre me hnu hotu Omeri.

²² Ke hwege tavat adre me hnu hotu Omeri hon tavat adre me hnu hotu Tibeni nöku Ginath: me ame mokcu Tibeni, me Omeri ame than.

²³ Ke haba hnyi huna a thote wani Asa than Juda, mo, ame hwân Omeri he ka musi hon Isaraela hnyi twelv ta huna: ke e ame than hnyi Tireza hnyi je huna a siks.

²⁴ Ke e ame ûco ûnyi ga Semeri ong bucen Samaria hwaban lo li talan sileva; ke e ame bi uma hon bucen, me hwenyi ien taun e ame op, me, Samaria, hoton ien at a iny ehac, jia Semeri.

²⁵ Ke haba Omeri ame ânyâ hwakecin ae kong hnyi hnyimakö Iehova, ke beönua anyin ta je hulö hon tavat hia ehac.

²⁶ Anyin a e ame vheno gethen hia de Jeroboama nöku Nebata, me anyin hulö waleji ame okûâ hwakecin ae kong ka at Isaraela, he ka okûâ hmonyin anyi Iehova Khongu Isaraela can anyidra ta je ûnyi baû.

²⁷ Ke haba kolon je hna ânyâ ga Omeri waleji e ame ânyâ, me tang hwegien, hawa, adre ca sihnalimen hnyi tusi hnân ha je bong bongon je than Isaraela?

²⁸ Me ame mokut ut Omeri tha e me lakamen, me adre me konâm e hnyi Samaria: ke ame than dö Ahaba a nokon hwaban.

²⁹ Ke haba hnyi huna a thote eiti Asa than Juda ame hwân Ahaba nöku Omeri he ka musi hon Isaraela: ke Ahaba nöku Omeri ame musi hnyi Samaria twente tu je huna hon Isaraela.

³⁰ Ke haba Ahaba nöku Omeri ame ânyâ ûnyi ae kong hnyi hnyimakö Iehova e beönua hudrin hia ehac.

³¹ Ke helâke e hâhâ kâu waleji hnen hna vheno je hulö anyi Jeroboama nöku Nebata, me e minya bi ame hum Jezebela nöku Ethebaala thaniny at Zidona, me âiân, me e ame he me bi athnyaba kö Baala, me khudrung kâu.

³² Ke e ame otilâ taben hut kö Baala hnyi uma umo Baala, wale e ame hia but op hnyi Samaria.

³³ Ke Ahaba ame theati Aseira; ke beönua hna ânyâ hnö Ahaba he ka okûâ hmonyin anyi Iehova, Khongu Isaraela, hon ta je than Isaraela hia a bân.

³⁴ Ke haba hnyi bongon je bong haba Hiel at Beth-ela ame op Jeriko: e ame bi taben ge hna ohia nokon a bân jia Abirama, me otilâ je homagöule ge hna ohia nokon a wakeiat hmonyin jia Seguba; hoton hofuc ho Iehova, waleji e ame ha a deny Josua nöku Nuna.