Biblia Todo Logo
Bìoball air-loidhne

- Sanasan -

I. Je Than 12 - Iaai Bible 1901 (New Caledonia)

1 KE Reoboama ame he Sekema ai: anyin ame o hnyi Sekema Isaraela hia he ka otilâ e me than.

2 Ke a long ut Jeroboama nöku Nebata, (anyin ae tiga e bi hnyi Aigupito, kʼ ame kec kâe ehac ga Solomona, me ame laba Jeroboama hnyi Aigupito,

3 me adre me ûkhûnöng he ka hawâ e;) me ame tha o Jeroboama me ûkhacaköu hia anyin at Isaraela, me ba ko Reoboama, ka habe,

4 Haba kâmâm ame ohmakâ ûnyi hnân ûhûkâlâköuâ huhmun: ke haba walang ang u ma he ka ohâhâ huliwa anyin kâmâm ae vec, me ûnyi hnân ûhûkâlâköuâ ae hmak e ame ip huhmun, me ohmun e he ka bi lakem.

5 Me e ame ha ködrin, ka habe, He thö ama kun ta bong, mʼ öbun hmetu thö könya. Me ame vese thö tavat.

6 Me haba Reoboama than ame ûhnenamö me wahingat, a hnyat adre me tot hnyi hnyimakö Solomona a kamen ke tiga möt, me ha, ka habe, Ie hofuc öbun e ûnykûme hnân thu ka tavat ang?

7 Ke haingödrin kâu, ka habe, U je ne he ka bi athnyaba ka tavat ang hnyi bong ang, me ânyâ wedrin, me thu ködrin, me ha ködrin ta je hofuc ae so, awe, ödrin e he bi ka bi athnyaba köu nyiele balua.

8 Ke e ame degecâ hofuc hwan wahingat ödrin e ûhnenamö, ke e ame ka ûhnenamö me je hidröu a ödrin tha dö më, wale ödrin e tot hnyi hnyimakan.

9 Ke haingen ködrin, ka habe, Ieû hnobun hna ha, mötin e he ka thu ka tavat ang ödrin e ha könya, ka habe, Ohâhâ thö ûnyi hnân ûhûkâlâköuâ waleji ame ip kâmâm huhmun?

10 Me ame ha kâu je hidröu a ödrin tha dö më, ka habe, Walang ûnyi u me be ka ha ka tavat ang adre me fuc köu, ka habe, Haba kâmâm ame ohmakâ ûnyi hnân ûhûkâlâköuâ huhmun, ke u me he ka ohâhâ e huhmun; walang ûnyi u me he ka ha ködrin, ka habe, haba banyök a bakevic ame he ka haki hon hnyi cica.

11 Ke wale bi ang, haba cica ame ip hubun ûnyi hnân ûhûkâlâköuâ ae hmak: ke oge me he bi nya ka bi hanen e hubun: haba cica ame kuc öbun ge osö, ke oge me he bi nya ka kuc öbun ge je sekopio.

12 Haba Jeroboama, me tavat hia, ödrin e o kö Reoboama hnyi bong a kuniny, helâ me hna hûna hnen than, ka habe, Hmetu thö könya hnyi bong a kuniny.

13 Ke haba than ame thu hwegiâ ka tavat, me degec hofuc hwan je hingat wale ödrin e ûhnenamö;

14 me fuc ködrin hoton hofuc hwan je hidröu, me ha, ka habe, Haba cica ame ohmakâ ûnyi hnân ûhûkâlâköuâ hubun, ke oge me he bi nya ka bi hanen ka ûnyi hnân ûhûkâlâköuâ hubun: haba cica ame kuc öbun ge osö, ke oge me he bi nya ka kuc öbun ge sekopio.

15 Me ame ca long bi than ka tavat; anyin a ûnyi ga Iehova ûnyi eling, me me ohwâdâ hwan hofuc, waleji ame ha Iehova kö Jeroboama nöku Nebata a deny Ahia at Silo.

16 Ke a wâ but Isaraela hia a gʼ ame ca long ködrin than, haba tavat adre me thu ka than me ha, ka habe, Ewa ke keihöhmun unyi Davita? ke ba jekhöûhmun unyin laku Jese: at Isaraela lö, vese thʼ öbun ka hnyi umöbun je uma mano: Davita lö, hamâm he ka tuö ânyâm lap. Me Isaraela ame vese but ka hnyi umödrin je uma mano.

17 Ke haba lakon Isaraela, a tavat adre me labâ je taun anyin Juda, me Reoboama ame musi ködrin.

18 Ke Reoboama than ame kunö Adorama, at ame ō fat; me haba Isaraela hia adre me lûâ ge veto me ame mokcu. Me Reoboama than ame ie he logot me ölö ka hnyi anyin kariota, me kec Jerusalema ai.

19 Me haba Isaraela ame hna degecâ lap anyi Davita ke ne o but hnyi bong ang.

20 Ke a long ut Isaraela hia a ga o thö Jeroboama, me adre me ûkhûnöng he ka hawâ ka hnyi ûkhacaköu, me otilâ e me than Isaraela hia: ke ba at ame hnu hoton lap anyi Davita, ke so bi hake tribu Juda thibi.

21 Ke ame o thö Reoboama hnyi Jerusalema, me e ame ûkhacaköuâ lap anyi Juda, me tribu Beniamina, ödra wan haded ke eite thauzan tavat adre ûca, tavat vat, be ka vat me lap anyi Isaraela, he ka ohmeto dökhu kö Reoboama nöku Solomona,

22 Ke ame o but hofuc hwan Khong kö Semaia aten Khong, ka habe,

23 Fuc dö kö Reoboama nöku Solomona than Juda, me lap hia anyi Juda me Beniamina, me kolon biju tavat, me ha kodra ka habe,

24 Walang hna ha hnö Iehova, ka habe. Ca he öbun, ke ca vat bi me je liamekeiny möbun a lakon Isaraela: ve hmetu ju öbun ka hnyi umöbun je uma; anyin a haba ûnyi ang me ûnyi gak. Me adre me long hofuc ho Iehova, me hmetu me vese but, hoton hofuc ho Iehova.

25 Ke haba hnyi ûen e Jeroboama ame op Sekema hnyi hnyei ae hut hnyi Eferaima, me laba eling: ke e ame he ûheny e me op Penuela.

26 Ke haba Jeroboama ame ha hnyi hnyekon, ka habe, Ame he ka hmetu walang ang dökhu ka hnyi lap anyi Davita:

27 ame ne he tavat ang he ka bi hut hnyi uma umö Iehova hnyi Jerusalema, me ame he ka wia hmetu hnyekon tavat ang ka tuhödra, a Reoboama than Juda; me adre me he ka hlingö nya, me hmetu kö Reoboama than Juda.

28 Me than ame ûhnenamö, me ânyâ li nokon kau gol; ke e ame ha ködrin, ha habe, E hmak köbun he ka he Jerusalema ai; Isaraela lö, wâ ju ang li khongom, a li at ödre hum u ûnyi hnyi hnyei Aigupito.

29 Me e ame otilâ khaca hnyi Beth-ela, ke e ame ip khaca hnyi Dana.

30 Ke haba ûnyi eling ame okûâ hulö: anyin a haba tavat adre me he ka khaca, wale ke ne o but hnyi Dana.

31 Ke e ame bi uma hnyi je dok ae görany, me otilâ je hnyat bihut ûnyi hnyi tavat hia, wale a ca je laku Levi.

32 Ke Jeroboama ame hûna he ka bijeûâ hnyi tehi a eitiny, hnyi bong a fiftininy tehi, helâ me bijeû hnyi Juda, ke e ame ölö ka hnyi taben hut; me e ame ânyâ helâe hnyi Beth-ela, me bi hut ka li nokon kau wale e ame ânyâ: ke e ame ip hnyi Beth-ela tavat bihut hnyi dok ae görany wale e ame ânyâ.

33 Ke e ame ölö ka hnyi tahan hut wale e ame ânyâ hnyi Beth-ela hnyi bong a fiftininy tehi a eitiny, wale hnyi tehi e ame ûnykûme hnyi hnyekon bi: ke e ame hûna ke bijeû hobi kâu lakon Isaraela, me ölö ka hnyi taben hut, he ka leû uto ae bo so.

maintained by the British and Foreign Bible Society

Bible Society of the South Pacific
Lean sinn:



Sanasan