I. Je Than 11 - Iaai Bible 1901 (New Caledonia)

¹ KE haba Solomona than ame hnyok ka je momo kanyua ae se hia tha ödrin me momo nöku Farao, a je momo Moaba, me Amona, me Edoma, me Zidona, me Heth;

² ûnyi hnyi je hnyei waleji a ha Iehova ka lakon Isaraela, ka habe, Ca he öbun ködrin, ke khaca ödrin e ca he ka he köbun: anyin ae hnathu ödrin e he ka wia je hnyekubun he ka hnu hoton je khongudrin: me ame kece hnyeku Solomona ködrin.

³ Ke e hu gan seven haded je âiân, je momo than, ke kun ta haded anyin je momo: ke ame wia thö hnyekon hnen je âiân.

⁴ Anyin ae ka hingat ut Solomona, haba laâiân ödrin e wia thö hynekon he ka hnu hoton je khong me monu: ke e ca bekhot bi hnyekon kö Iehova a Khongon, helâ me hnyeku Davita a kamen.

⁵ Anyin a Solomona ame hnu hotu Aseira khong momo anyin at Zidona, me Milekoma ae ikiki anyin at Amona.

⁶ Ke Solomona ame ânyâ hwakecin ae kong hnyi hnyimakö Iehova, ke ame ca ti hnu hotu Iehova helâ me Davita a kamen.

⁷ Haba Solomona ame op dok ae görany hobi kö Kemosa ae ikiki anyi Moab, hnyi bucen ae cicö Jerusalema, me hobi kö Moleka at ae ikiki anyin je laku Amona.

⁸ Ke e ame ânyâ helâe hobi kâu je âiân hia a je atkanyua, ödrin e leû uto ae bo so, me hudo ka je khongudrin.

⁹ Ke haba Iehova ame hmöyin kö Solomona can hna wia hnyekon ga Iehova, Khongu Isaraela, wale a olo omanenâ e bi kâu,

¹⁰ kʼ ame hûna kâu hnyi ûnyi ang; a e ame ca he bi ka hnu hoton je khong: ke e ame ca tuö hna hûna hnö Iehova kâu.

¹¹ Anyin a wale ame ha Iehova kö Solomona, ka habe, anyin a u je ânyâ ûnyi ang, ke u je ca tuö anyik ûhihinyköu, me anyik ta je hnanyibu, waleji oge me hûna köu, me oge me he ka hûgûnâ gam dökhu, me ham ka athnyabaem.

¹² Ke so bi oge me ca he ka ânyâ e hnyi ûâm, ga Davita a kâmâm: ke oge me he ka hûgûnâ e hnyi hnyamen nokom.

¹³ Ke oge me ca he ka hûgûnâ hia dökhu; ke oge me he ka ham khaca tribu ka nokom, ga Davita athnyabaik, me Jerusalema waleji oge me ûca.

¹⁴ Ke haba Iehova ame okûâ iwahnaihmiony kö Solomona, jia Hadada at Edoma: a e mâtrâniny than hnyi Edoma.

¹⁵ Haba ehac ke tiga Davita hnyi Edoma, ke ame he Jaob taben vat he ka konâm je hnyat adre kot, ke adre hia but hlingâ obaga hia hnyi Edoma;

¹⁶ (kʼ ame laba eling Joab me at Isaraela hia hnyi siks ta tehi, ke ne o but adre hia but subâ degecâ obaga hia hnyi Edoma;)

¹⁷ me haba Hadada ame kec, a tha e me keihen at Edoma lakeiny kamen, me he Aigupito ai; ke tiga ûhnyûkong Hadada.

¹⁸ Ke ödrin e todrö ûhedrin Midiana, me he Parana ai: ke ödrin e hom ke je hnyat ûheny Parana he ka tha he mödrin, me ödrin e o Aigupito, kö Farao than Aigupito; me e ame ham kâu uma, me hûna he ka han, me ha iny.

¹⁹ Ke e gan hmâ ibetengiö anyi Farao kö Hadada, he e ame ha âiân a liamekeiny me âiân bi, wale liamekeiny me momo than jia Tapenes.

²⁰ Me haba liamekeiny me Tapenes ame hnokoâ nokon baga jia Genubath, ke haba Tapenes ame hnebaiö e hnyi uma umo Farao: ke Genubath ame laba hnyi uma umö Farao a tha e me laku Farao.

²¹ Ke a long ut Hadada hnyi Aigupito a ga tha he Davita ka lakamen, ke a mokcu Joab taben vat, me haba Hadada ama ha kö Farao, ka habe, Ö u hnö nya but mʼ inye he but ka hnyi ik hnyei.

²² Me haba Farao ame ha kâu, ka habe, Ie ûnyi ae hia gam unyik, mʼ u me elâm he ka he ka hnyi em hnyei? Ke haingen, ka habe, E ba: ke so bi ō u hnö nya but.

²³ Ke haba Khong ame okûâ kâu ke iwahnaihmiony bi, jia Kezona nöku Eliada, at ame kec ga Hadadeza a tuhan, than Zoba:

²⁴ ke e ame ûkhacaköuâ tavat unyin bi, me me taben deo vat, waleji nnyi hnö Davita hna kuc ödrin at Zoba: ke ödrin e he Damaseko ai, me laba eling, me musi hnyi Damaseko.

²⁵ Ke e iwahnaihmiony me at Isaraela hnyi ta je bong hia bongu Solomona, ca ha bi monu Hadada ame ânyâ: ke e ame hûkötiö Isaraela, me musi hnyi Suria.

²⁶ Ke haba Jeroboama nöku Nebata, at Eferaima ûheny Zereda athnyabai Solomona, ke Zeruia ien hinyen, e safac, me e at ame hai hnyamen minya ka than.

²⁷ Ke walang can e ame hai hnyamen ka than: haba Solomona ame op Milo, me okhötâ je dok ae hmouca hnyi taun anyi Davita a kamen.

²⁸ Ke at ae hwege hmonyin Jeroboama: ke a wâ but Solomona a e hidröu ae ti huliwa, ke e ame otilâ e hon ta je huliwa hia hnyi lap anyi Josefa.

²⁹ Ke haba hnyi ûen eling, me ame he Jeroboama ûheny Jerusalema, me ame ûkhanö më Ahia perofeta at Silo eû hnyi gethen; ke e ame hia but khavâ ke ûkhaûen ae teb ûnyi; ke hake ödru thibi hnyi hnyei.

³⁰ Ke haba Ahia ame kât ûkhaû ae teb ûnyi e ame khavâ, me kia mûa me me twelv je ec mano.

³¹ Ke e ame ha kö Jeroboama, ka habe, Hom dö je ec mano a ten: anyin a walang ame ha Iehova, Khongu Isaraela, ka habe, Wâ bi oge me he ka kia dökhu ûnyi ga Solomona, me ham bi köu je tribu a ten:

³² (ke khaca thiju tribu hobi kâu, ga Davita athnyabaik, me ge Jerusalema, taun oge ûca hnyi ta je tribu hia hnyi Isaraela:)

³³ can ödrin e digic nya, me khudrung kö Aseira khong momo anyin at Zidona, me Kemosa khongon at Moaba, me Milekoma khongon laku Amona; ke ödrin e ca vheno dek je gethen, he ka ânyâ wisa hnyi hnyimakök, me tuö anyik je hnanyibu helâ me Davita a kamen.

³⁴ Ke so bi oge me ca he ka hûgûnâ hia dökhu gan: ke oge me he ka ânyâ e, me me tuhan hnyi ta je bonginy hia anyin möt, ga Davita athnyabaik, wale o ge ûca, anyin a e ame tuö hnok je hna hûna, me anyik je hnanyibu:

³⁵ ke oge me he bi ka hûgûnâ dökhu ûnyi hnyi hnyamen nokon, me ham e köu, ten je tribu.

³⁶ Ke khaca tribu oge me he ka ham ka nokon, me me hu ga Davita athnyabaik nyiele balua lamepa hnyi hnyimakök hnyi Jerusalema, taun oge ûca hobi könya bi he ka ip eling iök.

³⁷ Ke oge me he ka hum u, ke u me he ka muso hia hoton weny hnyekom, ke u me he ka than hon at Isaraela.

³⁸ Ke u je ne he ka long hia hoton hnok hna hûna köu, me vheno dek je gethen, me ânyâ ûnyi ae wisa hnyi hnyimakök, me tuö anyik je hnanyibu, me hnok je hna hûna, helâji a ânyâ Davita athnyabaik; me oge me he bi nya ka tha inya möu, me bi uma ae tet hmâ me umâm, helâji me hnok hna ânyâ hobi kö Davita, me oge me he ka ham köu Isaraela bi.

³⁹ Ke oge me he ka ovecâ je mâtrâni Davita can e, ke ca nyiela balua.

⁴⁰ Ma haba Solomona ame elâm he ka hlingö Jeroboama; me Jeroboama ame todrö, me kec Aigupito ai kö Sisaka than Aigupito, ke e bi Aigupito ke ne o but ame mokcu Solomona.

⁴¹ Haba kolon je huliwa a ânyâ Solomona, me hnen hna ânyâ hia, me anyin metâ, hawa, adre me ca sihnalimen hnyi tusiny ta je huliwa anyi Solomona?

⁴² Ke haba ûen ame musi hnyin Solomona hon Isaraela hia hnyi Jerusalema, me fâte je huna.

⁴³ Ke amo tha mokut ut Solomona me lakamen, me adre me konâm e hnyi taun anyi Davita a kamen: me Reoboama a nokon ame than ju hwaban.