I. Je Than 1 - Iaai Bible 1901 (New Caledonia)

¹ HABA Davita a than, me hingat ut ke se hia je hunainy; ke ödrin e khavâ e ge je imano, kʼ ame ca mage bi unyin.

² Me ame ha kâu lathnyabainy, ka habe, E so adre me he ka elâm hlu hmai hobi kâu than a tuhok: ke hamen he ka tot hnyi hnyimakan than, me tuö e; ke e ame he ka mokut hnyi ûlâiâm, me me mage than a tuhok.

³ Me adre me elâm hnyi je ke keihen Isaraela hia ke hlu ae hmanenang, me ō Abisaga at Sunema me adre me hom ka than.

⁴ Ke ti hmanenang hlu; ke e ame tuö than me huliwa unyin; ke than ame ca kâlâ bi.

⁵ Ke haba Adonia nöku Hagitha ame bi gan, me ha, ka habe, Oge me he bi nya ka than: me e ame penapena je kariota, me tavat tabö hors, me tavat a fifte he ka bodrin ka wadring hnyi hynimakan.

⁶ Ke ame ca ohmakâ e hnen kamen hnyi ta je ûen ehac, me ha kâu, ka habe, Ieû gam u me ânyâ helâng? ke e at ae ti hmanenang; ke adre hnokoâ e hwabö Abasoloma.

⁷ Ke e ame ûhnenamö me Joab noku Zeruia, me Abiathara at bihut: me ödru me hadruo Adonia me he hoton.

⁸ Ke haba Zadoka at bihut, me Benaia nöku Jehoiada, me Nathana perofeta, me Simei, me Rei, me tavat ae hwege unyi Davita, ödrin e ca tha hien me Adonia.

⁹ Ke haba Adonia ame thân je mamoe me je bolok me je meno ae pipikhenya, hnyi veto anyi Zoeleth wale hnyi En-rogel; me e ame hawâ je liamekeiny më hia a lakon than, me hnyat Juda hia lathnyabainy than:

¹⁰ ke haba Nathana perofeta, me Benaia, me tavat hwege, me Solomona liamekeiny më, e ame ca hnyi hawâ bi.

¹¹ Haba Nathana ame ha kö Bathe-seba hinyö Solomona, ka habe, U me ca long a ga musi but Adonia nöku Hagitha, ke ca khanö Davita bi a tuhötin?

¹² Ke walang ang oge me ûsabö möu, mʼ u me he ka omeli u bi me nokom a Solomona.

¹³ He thö ka dit kö Davita than me ha kâu, ka habe, Than lö a tuhök, u je ca khemanyin könya athnyabaem, ka habe, E hnathu ame he Solomona a nokom ka than hwabök, ke e ame he ka tabâ anyik theron? ke anyin a ieû ame musi but Adonia?

¹⁴ Wâ bi, u ka tiga ûhnenamö eling me than, me oge me he ka dit hotom, me ohnathoâ hwâm hofuc.

¹⁵ Haba Bathe-seba ame didro ka than hnyi hnyeule: a hingat hmonyin dut than; ke Abisaga at Sunema ame bi athnyaba ka than.

¹⁶ Haba Bathe-seba ame iyâû me nom ka than. Ke haingen than, ka habe, Ieû u je elâm!

¹⁷ Ke e ame ha kâu, ka habe, Tuhok lö, u je khemanyin ga Iehova Khongom ka athnyabaem, ka habe, Ame he Solomona a nokom ka than hwabök, ke e ame ke ka tabâ anyik theron.

¹⁸ Ke wâ bi, walang ang ame musi but Adonia, ke ca khanö u than a tuhok:

¹⁹ ke e a hia but thân je bolok me je meno ae pipikhenya me je mamoe ae se hia, ke a hia but hawâ lakon than, me Abiathara at bihut, me Joab taben vat: ke Solomona athnyabaem, e ame ca hawâ bi.

²⁰ Ke haba u, than lö a tuhok, ame bwele köu je li emakan at Isaraela hia, mʼ u me he ka ha ködrin at ame he ka tabâ theron anyin than a tuhok hwaban.

²¹ Ke a ne ba, adre me he ka hai kongu nya me Solomona a nokuk, u ka tha mokut ut me je lakâmâm.

²² Ke wâ bi, e ame tiga ûhnenamö me than, me ame o but Nathana perofeta.

²³ Ke ödrin e ha ka than, ka habe, Wâ bi, Nathana perofeta. Ke e ame didro ka hnyi hnyimakan than, me e ame nom ja hnyikânâi ka than.

²⁴ Haba Nathana ame ha, ka habe, Than lö a tuhok, hawa, u je hia but ha, ka habe, Ame he ka musi but Adonia hwabök, ke e ame he ka tabâ anyik theron?

²⁵ Anyin a e ame he but eja, me thân je bolok me je meno ae pipikhenya, me je mamoe ae se hia, ke e a hia but hauâ lakon than hia, me je taben vat, me Abiathara at bihut; ke wâ bi, ödri ne han me ic hnyi hnyimakan, ke ödrin e ha, ka habe, E so e möt than Adonia.

²⁶ Ke haba inya athnyabaem, me Zadoka at bihut, me Benaia nöku Jehoiada, me Solomona athnyabaem, e ame ca hnyi hauʼ ohmun.

²⁷ Hawa, adre me ânyâ ûnyi eling ûnyi ge than a tuhok, ke u je ca omanenâ ka lathnyabaem, at ame he ka tabâ theron anyin than a tuhok hwaban?

²⁸ Haba Davita than ame thu me ha, ka habe, Hawo Bathe-seba thö. Me ame o momo ka than, me tot hnyi hnyimakan than.

²⁹ Me haba than ame khemanyin, ka habe, Kia inya Iehova at ame omeli nya ûnyi hnyi anyik ta je vec hia,

³⁰ a oge me he ka ânyâ hnyi bong ang helâ me hnok hna khemanyin köu ga Iehova Khongu Isaraela, ka habe, E hnathu ame he Solomona a nokom ka than hwabök, me e ame he ka tabâ anyik theron hwabök.

³¹ Me Bathe-seba ame nom hnyikânâi, me ogânâ than, me ha, ka habe, E so e möt bi than Davita a tuhok nyiele balua.

³² Me Davita ame ha, ka habe, Hawo Zadoka thö könya at bihut, me Nathana perofeta, me Benaia nöku Jehoida. Me ödrin e o but ka than.

³³ Ke than ame ha ködrin, ka habe, Tha he thʼ öbun me lathnyabainy tuhöbun, me otabö Solomona nokuk hon halek miul, me hom e Gihona ai:

³⁴ me hamö Zadoka at bihut me Nathana perofeta, he ka hû e eling me me than bi hon at Isaraela: ke öbun e he ka tûâ trutru, me ha, ka habe, E so e möt bi than Solomona.

³⁵ Ke öbun e he ka he hoton, me e ame he ka tabâ anyik theron; anyin a e ame he ka than hwabök: ke oge me hia but wia e me me tuhan at Isaraela me Juda.

³⁶ Me haba Benaia nöku Jehoiada ame thu ka than, me ha, ka habe, Amen: e na helâ ju e hna ha hnö Iehova, Khongon than a tuhok.

³⁷ Iehova a tha e möu than a tnkök, e na helâ minya ju ame he ka tha e me Solomona, me obeönua anyin theron hon theron anyin than Davita a tuhok.

³⁸ Me ame he Zadoka at bihut me Nathana perofeta, me Benaia nöku Jehoiada, me tavat Kerethi me Pelethi, me olabö Solomona hon miul hale Davita than, me hom e Gihona ai.

³⁹ Me haba Zadoka at bihut ame hom faoiny meno taben wakaco ûnyi hnyi Uma Mano, me hû Solomona. Ke ödrin e tûâ trutru; ke ame ha tavat hia, ka habe, E so e möt bi than Solomona.

⁴⁰ Me tavat hia adre me he hoton, ke ödrin e tûö je köwi me senyin ke gan hmâ senyin, me ame hmouca hmeledrany ge medi ödra.

⁴¹ Ke a long ut Adonia mʼ ödrin hia thithö unyin, ödrin e hia but han. Ke a long ut Joab ifucin trutru, me e ame ha, ka habe, Ieû ang ame mede hnyi taun?

⁴² Ke e ame tiga ha, me wâ bi, ame o but Jonathana nöku Abiathara at bihut: haba Adonia ame ha, ka habe, Didro; anyin a u at ae so, me u me hom ûthumetu ae so.

⁴³ Haba Jonathana ame thu me ha kö Adonia, ka habe, E, a hia but Davita than otilö Solomona ka than:

⁴⁴ ke a hia but than tha kunâ e me Zadoka at bihut, me Nathana perofeta, me Benaia nöku Jehoiada, me hnyat Kerethi me Pelethi, ke ödrin e olaba e hon miul haleny than:

⁴⁵ ke a hia but Zadoka at bihut me Nathana perofeta hû e hnân than hnyi Gihona: ke ödrin e o but ûheny e hnyi senyin me ame û but taun. Wale mede öbun e long.

⁴⁶ Ke Solomona ame tabâ minya theroniny dökhu.

⁴⁷ Ke wale minya ang, a o but je lakeiny than he ka ha hnahici Davita a tuhötin, me ha, ka habe, E so Khongom ame he ka obeönua iö Solomona hon iâm, me ogânâ anyin theron hon ânyâm theron: ke than ame nom ju hon hnen hna mokut.

⁴⁸ Ke ame ha minya than, ka habe, Ole kö Iehova Khongu Isaraela at ame ham hnyi bong ang at he ka tabâ anyik theron, ke inya oge me wâ.

⁴⁹ Me ame ot tavat hia a tha ödrin me Adonia, me todrö, me vese but.

⁵⁰ Haba Adonia ame outö Solomona; ke e ame tot, me kât je baitoiny taben hut.

⁵¹ Ke adre me thumetu Solomona, ka kabe, Wâ bi, Adonia ame outö Solomona than: ke wâ bi, e ame kât je baitoiny taben hut me ba, ka habe, Ö e khemanyin könya hnyi bong ang Solomona than a e ame ca he ka hlingâ athnyabainy ge hele vat.

⁵² Haba Solomona ame ha, ka habe, Ame ne he ka ânyâ hwakecin ae ûcû ame ca he ka kölu hnyikânâi ke leûnen ban: ke adre me ne he ka wâ hwakecin ae kong gan, me e ame he ka mok.

⁵³ Me Solomona than ame ûkhû-nöng, ke ödrin e hom e ûnyi hnyi taben hut. Ke e ame o me nom ju kö Solomona than: ke Solomona ame ha kâu, ka habe, He thö ka hnyi hnyabam.