I. Ioane 3 - Iaai Bible 1901 (New Caledonia)

¹ WA bi ûganiny ibetengiö waleji a ham köta Kamen, mʼ adre me he ka haʼ öta me je lakon Khong: ke öta e. Waleling me me ca khanʼ öta hnen hmeledrany, anyin ae ca khanʼ ödra e bi.

² Hnyat a oûnykûmik lö, öta je lakon Khong walang ang, ke tiga ca manen bi bonguta nyiele. Ke e khanʼ öta, ka habe, e ka manen dut, me ate me he ka helâ më; anyin ate me he ka wâ cicöâ e.

³ Ke haba ödra hia ae hu gadra geju eang, me, adre me okabi ödra bi, helâ më ae kap.

⁴ Haba ödra hia [adre me ânyâ hulo, me adre me hanyâûâ j hnanyibu: ke haba hna hanyâûâ hnanyibu, me wale hulo.

⁵ Ke e khanʼ öbun a gʼ ame manen dut me me he ka hom degecâ hulo; ke ba anyin hulo.

⁶ Haba at ame laba eû hnyin e ame ca mâdrâ hulo: haba at ame ânyâ hulo, me ame ca hia but wâ e, ke ame ca wâhmakhmetoâ e;

⁷ Je wanakat lö, ca he ka omonu öbun hnen ke at: e wisa at ame ânyâ hwakecin ae wisa, helâ më ae wisa:

⁸ ûnyi ge diabolo at ame ânyâ hulo; anyin ame ânyâ hulo diabolo ûnyi hnyi can. Kʼ a manen dut Nokon Khong, me me he ka ohia ta je huliwa anyin diabolo.

⁹ Ame ca ânyâ hulo at adre hnokoâ ûnyi ge Khong, anyin ame laba eû hnyi hnyekon wan gan; ke e ca khana he ka ânyâ hulo, anyin adre hnokoâ ûnyi ge Khong.

¹⁰ Ûnyi hnyi e, me manen dut lakon Khong me lakon diabolo: anyin a ca ûnyi ge Khong at ame ca ânyâ hwakecin ae wisa, me at minya ame ca betenge me liamekeiny më.

¹¹ Anyin a walang ûthumetu öbun e löng ûnyi hnyi can, ka habe, hamöta he ka ibetengiököu:

¹² ca helâ me Kaina, a ûnyi ge at ae kong, kʼ ame hlingâ keiny. Ke can ieû e ame hlingâ e? Can ae kong anyin bi ta je huliwa, ke wisa bi ta je huliwa anyin keiny.

¹³ Hnyat me lakeiny lö, ca he bi ka hlohlo e ka hûköti öbun hnen aten hmeledrany.

¹⁴ E khanʼ öta, a ate me hia but didro ûnyi hnyi mok ka hnyi möt, anyin ate me betenge ge je liamekeiny. Haba at ame ca betenge, me e bala bi hnyi mok.

¹⁵ Haba at ame hûkotiâ liamekeiny më, me e thibi at ûhlingö; ke e khanʼ öbun dut a haba at ûhlingö, me ba bi möt ame ca ba balua eû hnyi hnyekon.

¹⁶ Ke manen köta ibetengiö anyin a e ame hamen ham anyin möt hnân hobi köta: me ûcû minya köta he ka ham anyita möt hnân hobi kâu je liamekeiny.

¹⁷ Haba at ae hu ta ûnyi eang hmeledrany, kʼ ame wâ liamekeiny më ae theduoc, kʼ ame thelöng oûnykûminy gan, me ame he ka kâmâu hnyok ka Khong ka laba eû hnyin at e?

¹⁸ Je wanakat lö, ca he öta ka betenge thibi ge hofuc, me bohmen; ke so bi hnyi huliwa me hnathu.

¹⁹ Hnen e ate me he ka wâhmakhmeto a ûheta hnyi hnathu, kʼ ate me he ka cubec je hnyekuta hnyi hnyimakan,

²⁰ hnyi ûnyi ame haikongu öta hnen hnyekuta: anyin ae beönua bi Khong hon ta je hnyekuta, me khana ta je ûnyi hia thithö.

²¹ Hnyat a oûnykûmik lö, a ne ca haikongu öta hnen je hnyekuta, me hu but gata hnyok ae hwege ka Khong;

²² ke haba ûnyi ate me sumâtâ me ate me hu but gan, anyin ate me löng hoton anyin hnanyibu, me ânyâ ta je ûnyi ae so hnyi hnyimakan.

²³ Ke walang ang anyin hnanyibu, ka habe, hamöta he ka labageju ka hnyi ien Nokon a Iesu Keriso, me ibetengiököu, helâ me hnanyibu a ham köta.

²⁴ Ke haba at ame löng hoton anyin ta je hnanyibu, me ame laba eû hnyi hnyekon, ke e minya eû hnyi hnyekon. Ke hnen bi e, me ate me wâhmakhmeto a e ame laba eû hnyi hnyekuta, ûnyi ge Hanu e ame ham köta.