Isaia 9 - Iaai Bible 1901 (New Caledonia)

¹ KE ame ca he bi ka lit at eji ame vec hnyok. Haba hnyi je bong ehac e ame ohûkötiâ hnyei Zebulona me hnyei Nafatali, ke haba hnyi ûen a biliny, me e ame ohmanenangâ, hnyi gethen hnyi hobat köiö, hoton Joridano, Galilaia iny ke ta je hnyei.

² Haba tavat waleji adre me vheno menekholom, me adre me wâ melam ae gan: ke haba tavat adre me labā je hnyei a hanon mok, me ame umumelam hudra lany.

³ U je hia but osehia hnyei, ke u je ogânâ senyin: kʼ adre me senyin hnyi hnyimâkâm helâ me senyin hnyi menu, ke helâ me hna senyin ge tavat adre me khenâ je hna söh.

⁴ Anyin a u je hia but thu anyin ûnyi hnân ûhûkâlâköuâ ae hmak, me uciny abenyin, me osö anyin at ame okongoâ e, helâke hnyi bong bongon Midiana.

⁵ Anyin a haba je omjehen vat hia anyin tavat penapena hnân vat, ke je ûkhaû adre me kina hnyin dra, me adre me he ka ip hnân thong, ke hnân hlogon meic.

⁶ Anyin adre me hnokoâ hobi köta wanakat, kʼ adre me ham köta da; ke ame he ka e bi hon bajebenyin musi; ke adre me he ka hwenyi ien e, Hnân lâiâ, me At ame obongon, me Khong ae man, me Kamen a nyiele balua, me Thaniny ûsoköu.

⁷ Ame ca he ka hu obiny ûganiny anyin musi, me ûsoköu hon theron anyi Davita, me hon dokhon dokhu, he ka ohmâ e me cö e ge hna owisa me hwakecin ae wisa hwân walang ang ke ne o but nyiele balua. Ame he ka ânyâ e hnen weny ae gan hmâ anyi Iehova tuhan sabaoth.

⁸ Than ame kunâ hofuc kö Jekob, ke ame bi bi hon Isaraela.

⁹ Ke ame he ka khana hnen tavat hia, wale Eferaima, me tavat adre me laba hnyi Samaria, tavat adre me ha ge hnyok bi gan me begörany, ka habe,

¹⁰ A kolu but je veto kânâ, ke öhmun e he bi ka up uma ge je veto adre kave: adre sö but je sukamore, ke öhmun e he bi ka bi hnen ge je arasi.

¹¹ Anyin a wale ame he Iehova ka otilâ gorany kâu je iwahnaihmiony me Rezina, me obwebwelâ anyin je iwahnaihmiony;

¹² at Suria hnyi hnyimakodra, me at Filisiti hotudra ai; ke adre me he ka uto Isaraela ge hnyem ae memang. Ke hnyi ta je ûnyi e hia, e ame ca hwio hnyi anyin hmonyin, ke ame lau bala bi hnyamen.

¹³ Ke so bi ame ca hwio tavat kâu at ame kuc ödra, ke haba khaca adre me ca elom Iehova tuhan sabaoth.

¹⁴ Anyin a wale ame he Iehova ka subâ degecâ hnyi Isaraela ban me obiny, pama me amun, hnyi bong a khaca.

¹⁵ Haba hingat ae lung so, me wale ban; ke haba obiny, me wale perofeta ame ûne thoi.

¹⁶ Anyin a haba tavat adre me su tavat ang, me wale tavat omonu ödra; ke adre me ohi ödra a tavat he hotudrin.

¹⁷ Anyin a wale ame ca he Than ka senyin ge je hidröu unyidra ke e ame ca he ka betenge ge tavat ae ba kamödra, me je safac: anyin a ödra hia thithö adre me ca ot, ke tavat bi ae kong, me je hnyem hia ame hwen monu. Hnyi ta je ûnyi e hia, ame ca hwio anyin hmonyin, ke ame lau bala bi hnyamen.

¹⁸ Anyin a haba hwakecin ae kong ame han helâ me meic; ke ame an je iwadekong me watetaföcö: eke, e ame möt hnyi je nedronginy hnyot, ke adre me sâ khekhenyi goranyai hainy e.

¹⁹ Ame le degecâ hnyei ûnyi ge wathethot anyi Iehova: ke haba tavat, me helâ me uto hnân hiâ hnyi meic; ke ba at ame betenge ge liamekeiny mē.

²⁰ Ame he ke at ka söh hnyi ke keihen a metâ, kʼ ame he ka mekihnânem bala bi; ke e ame he ka han hnyi ke keihen me, kʼ ame ca he ka sekon bi: kʼ adre me he ka ve an viny je benyidra bi:

²¹ Manase ame he ka ön Eferaima; ke Eferaima ame he ka ön Manase: kʼ ödru ma he ka tha hiödru ka vat me Juda. Ke hnyi ta je ûnyi e hia, e ame ca hwio hnyi anyin hmonyin, kʼ ame lau bala bi hnyamen.