Isaia 8 - Iaai Bible 1901 (New Caledonia)

¹ KE haba Iehova ame ha könya, ka habe, U ma he ka hom veto ae gan ae lau, me sihnalimen hnyin e ge pen anyin at, ka habe, Hobi kâu Mahera-salala-hasa-baza;

² ke oge me he ka hom könya li at ohnathoâ ae hnathu he ka sihnalimen, wale Uria at bihut, me Zakaria nöku Jeberekia.

³ Ke oge me he but ka perofeta momo; ke e ame erkin me hnokoâ da. Haba Iehova ame ha könya, ka habe, Hwenyi ien ju Mahera-salala-hasa-baza.

⁴ Anyin ae ka tiga ca khana wanakat he ka ha, ka habe, Cica ke bai, me adre me he ka hom je omjeûiny Damaseko me je hna söh hnyi Samaria hnyi hnyimakan than Asuria.

⁵ Ke haba Iehova ame ha hmetu könya, ka habe,

⁶ Anyin a hnen tavat hna höciâ je köiöiny Siloa, ame omi di, me senyin bi kö Rezina me nöku Remalia;

⁷ anyin a wale, wâ bi, ame he Than ka oâ kodra je köiö ûnyi hnyi Wagewe, wale ae hwege me gan, than Asuria me anyin hmanenang hia: ke e ame he ka o hnyi deny je gethen hia, me bahihingölö hon je baten;

⁸ ke e ame he ka di bala Juda ai; me bahihingölö me vheno e, me khibi ke ne o but hnyi nyin; me ame he ka unöngötö ûlauen em hnyei, Emanuela.

⁹ Ta je hnyei lö, hmonyin dö, ke Öbun e he ka omomonu; ke je hnyei hia ae sâkâû lö, tevehlöng ju: oweikâ ju je hnyekubun, ke öbun e he ka omomonu.

¹⁰ Tha ûhnenamö thö, ke ame he bi ka ûnyi baû; ha thö hofuc, ke ame ca he bi ka hwâdâ: anyin ae unyita Khong.

¹¹ Anyin a walang hna ha hnö Iehova könya me man ae hwege, me nö nya mʼ inye ca he ka vheno gethen deny tavat ang, me ha, ka habe,

¹² Ca he öbun ka hnyi ha, ka habe, Ame sihnân, hnyi ta je ûnyi hia thithö ame he tavat ang, ka ha hnyin ka habe, Ame sihnân; ke haba khaca, ca ot bi helâ me iotidra, ke ca öbubuny bi.

¹³ Öbun e he ka okabi Iehova tuhan sabaoth; ke so öbun e he ka ot kâu, me öbubuny gan.

¹⁴ Ke e thibi hnân dok ae kap; ke veto hnân setu me kic hnân öhûkötö ka li lap anyi Isaraela, hnân hnewe me ofific ka tavat adre me laba hnyi Jerusalema.

¹⁵ Ke se hia tavat adre me he ka haû hnyin, me ta, me amam, me hnok, me hom.

¹⁶ Hûkâlâ ju ûnyi hnân ohnatho, ke okeceâ hmâ ju hnanyibu unyin je latök.

¹⁷ Ke oge me he ka halubahing Iehova, at ame ikhâlâ hnyimakan ge lap anyi Jekob, ke oge me he ka elâm e.

¹⁸ Wâ bi, haba inya ke lakuk a ham könya Iehova, me hnân je haten ke hnân lâiâ hnyi Isaraela ûnyi ga Iehova tuhan sabaoth, at ame laba hnyi bucen Ziona.

¹⁹ Ke ödra ka ha köbun, ka habe, Elâm dö unyin tavat tren je khong, me tavat bi khong, tavat adre me cûk me fufuc: hawa, ca hamen hnyei he ka elâm unyin Khongudra? hawa, adre me he ka elâm hobi kâu tavat ae möt unyin ta je komok?

²⁰ Kec do ka hnyi hnanyibu me hna ohnatho! adre me ne ca fuc hoton hwan hofuc eling me ame he ka ba hnyomakatu hobi kodra.

²¹ Ke adre me he ka vheno e hnyi vec me mekihnânem: ke ödra ka he ka mekihnânem, me adre me he ka vec hnyok, me hangâ hnyi ien tuhödra me Khongudrin, ke hngele bi hnyi dranyai:

²² ke adre me he! ka wâ hmeledrany, ke wâ bi, vec me menekholom, kʼ ame he ka lit ge vec; ke adre me he ka obʼ ödra ka hnyi menekholom ae khot.