Isaia 7 - Iaai Bible 1901 (New Caledonia)

¹ KE hnyi je bong bongu Ahaza nöku Jotham, nöku Uzia, than Juda, haba Rezina than Suria, me Peka nöku Remalia, than Isaraela, ödru me o hnyi Jerusalema he ka vat mē; ke ca khanʼ ödru he ka hwege hon e.

² Ke adre thumeto lap anyi Davita, ka habe, Ame tha hien at Eferaima me at Suria. Me ame bwebwet hnyekon, me hnyekon lakeiny, helâ me je ûö hnyi hnyot ame bwebwet ge ang.

³ Me haba Iehova ame ha kö Isaia ka habe, He thö walang ang ka ûkhanö me Ahaza, u me Sear-jasub a nokom, hnyi obiny gethen deny köiöiny an ethö, hnyi gethen wanben utkânâ anyin at hnû khaû;

⁴ me ha kâu, ka habe, Wâ ju, me mē laba ju; ca ot bi, ke ca sēnyin bi hnyekom, can li hnyiban uto eang ae hai, ke can hmonyin anyi Rezina, me Suria, me nöku Remalia.

⁵ Anyin a Suria, me Eferaima, me nöku Remalia, ödrin e si hnâm, me ha, ka habe,

⁶ Otin he Juda ai, me ovecâ, me bi detin ka hnyin, me otilö thaniny, wale nöku Tabeela;

⁷ walang hofuc hwan Than Iehova, ka habe, Ame ca he ka hmâ ûnyi e, ke ame ca he ka aat.

⁸ Anyin a Damaseko ban ka Suria, ke Rezina ban ka Damaseko: ke tiga ca um bi je huna a sikste faiv me adre me he ka bödra ka susubâ Eferaima, me me ca hnyei hmetu bi:

⁹ Ke Samaria ban ka Eferaima, ke nöku Remalia ban ka Samaria. Öbun e ne ca labageju, e hnathu öbun e ca he ka tethmâ.

¹⁰ Ke Iehova ame ha hmetu kö Ahaza, ka habe,

¹¹ U me he ka sumâtâ hobi köu haten ûnyi ga Iehova, a Khongom; sumâtâ thö ame ne ûnyi eû, ame ne ûnyi ethö.

¹² Haba Ahaza ame ha, ka habe. Oge me ca he ka sumat, ke oge me ca he ka cubic Iehova.

¹³ Ke e ame ha, ka habe, Lap anyi Davita lö, long ju walang ang; hawa, ûnyi ae ûhnyûkong e öbun e ovecâ at, ke öbun e he minya ka ovecâ Khong?

¹⁴ Anyin a wale, ame he Than ka ham köbun haten; wâ bi, ame he hlu ka erkin, me hnokoâ da, me hwenyi ien e Emanuela.

¹⁵ E ame he ka han bata me hani, e ka khana he ka höciâ hulo, me ûca so.

¹⁶ Anyin ae ka tiga ca khana e wanakat he ka höciâ hulo me ûca so, me adre me he ka hna degecâ hnyei iny li than u je hûkotiâ.

¹⁷ Ame he Iehova ka oâ köu, me em hnyei, me lap anyin kâmâm ta je bong adre tiga ca wâ, hwân hnyi bong ame he Eferaima ûheny Juda; wale than Asuria.

¹⁸ Ke haba hnyi bong eling me ame he Iehova ka hûlûwhajû ka je nöng ûnyi hnyi obiny je wageweiny Aigupito, me ta je bi minya ûnyi hnyi hnyei Asuria.

¹⁹ Ke adre me he ka o hia me tabâ je thop ae ba aten, me je esopiny kic, me je ûö oe ûdedö hia, me je hnaonying hia.

²⁰ Ke haba hnyi bong eling ame he Than ka ûgi ge heleûgi adre me mē bi hwaban, a e bi hnyi ke keihen hoton wagewe, wale unyin than Asuria, ban me leûnen li can: kʼ ame he minya bi ka khudreû bi wainy.

²¹ Ke haba hnyi bong eling ame he at ka hat nak kau me li mamoe;

²² ke can ûganiny dân basidrin, e ame he ka han bata: anyin ame he ka han bata me hani ödra hia je kolon hnyei.

²³ Ke haba hnyi bong eling, hnyi ta je hnyei hia ae hu vine hnyin a wan thauzan, a hwaban je ong sileva a wan thauzan, me wale ame he bi ka hnen ta je iwadekong me watetaföcö.

²⁴ Adre me he ka o ang me je fana me je cafana; anyin ame he ka unöngötö hnyei hia ge je iwadekong me watetaföcö.

²⁵ Ke haba hnyi je ong bucen hia waleji adre me labö trohnenâ ge unu, me u me ca he ka he ka hnyin, anyin a u ma outen je iwadekong me watetaföcö, ke hnân bi e kunâ je bolok ka hnyin, me hnân uto ge je mamoe.