Isaia 66 - Iaai Bible 1901 (New Caledonia)

¹ WALANG hna ha hnö Iehova, ka habe, Anyik theron drany, ke taben li hnyeûcak hmeledrany: ieû bongon uma öbun e he ka op hobi könya? ke ewa dok oge me he ka menâ hnyin?

² Anyin a haba ta je ûnyi hia ang ame ânyâ hnen hnyamok, me me e bi ta je ûnyi hia thithö e, haingö Iehova: ke walang at oge me he ka wâ, wale at ae theduoc me bewisa hanon, me öbubuny ge hok hofuc.

³ Haba at ame hlingâ bolok, me ame helâ me at ame hlingâ at; haba at ame hudo nokon mamoe, me ame helâ me at ame thu nyin kuli; haba at ame hudo bwihlany, me ame helâ me at ame hudo dren buaka; haba at ame leû libanu, me ame helâ me at ame hahnahicâ hnatheat: eke, adre hia but ûca dedra bi je gethen, ke ame senyin je hanudrin hnyi anyidra bi ta je ûnyi ae ikiki.

⁴ Oge me he bi minya ka ûca anyidra ta je tang iyauö, me oâ kodra ta je ûnyi adre me outen; anyin a hnyi ûen oge me hongot, e ba at ame ieû; hnyi ûen oge me fuc, e ba at ame long: ke so bi adre me ânyâ hulo hnyi hnyimakök, me ûca ûnyi oge me ca senyinâ.

⁵ Long ju öbun hofuc ho Iehova, tavat adre me öbubuny ge hwan hofuc, ka habe, A hia but ha hnen je liamekeiny möbun tavat adre me hûkötiʼ öbun, me digic öbun can iök, ka habe, E so adre oganö Iehova, mʼ öhmun e he ka wâ anyibun senyin; ke adre me he ka hmehma.

⁶ Hwan mede hnyi taun, hwan hofuc hnyi uma kap, ho Iehova ame bi hwaban ka je iwahnaihmiony mē.

⁷ E ka tiga ca vec hnyekon momo e ame hnokoâ; ke tiga ca o anyin vec, e ame hnokoâ da.

⁸ Ie at ame long a helâe? ie at ame wâ ta je ûnyi a helâe? Hawa, adre me he ka hnokoâ hnyei hnyi bong a khaca? hawa, adre me he ka hnokoâ ke dokhu hnyi ûen a khaca thibi? ke so bi ame o but je lakon Ziona e ka tiga vec hnyekon.

⁹ Hawa, oge me he ka oâ vec hnyekon, me ca he ka oâ? haingö Iehova: hawa, oge me he bi nya at ame oâ, ka thawâ bi? haingen Khongom.

¹⁰ Tha senyin dʼ öbun me Jerusalema, me hobâ thö gan öbun hia thithö tavat öbun e hnyok kâu: tha senyin hwege thö mē, öbun hia thithö öbun e tenge gan:

¹¹ mʼ öbun e he ka ijem me sekubun ge li basin hnân otubwelâ; mʼ öbun e he ka oâ debai me hobâ ûganiny anyin hmanenang.

¹² Anyin a walang hna ha hnö Iehova, ka habe, Wâ bi, oge me he ka inâ hnahic kâu helâ me wagewe, me hmanenanginy je hnyei helâ me di ame bahihingölö, ke öbun e he ka ic; adre me he ka abiny öbun, me jijingʼ öbun hon li jevan.

¹³ Ame otubwelâ wanakat hnen hinyen, ke helâe oge me he ka otubweli öbun; ke adre me he ka otubweli öbun bi hnyi Jerusalema.

¹⁴ Ke öbun e he ka wâ e, me ame he ka senyin je hnyekubun, ke ame he ka möt so je jeiöbun, helâ me je bâtân: ke ame he je athnyabainy ka khanʼ ödra hnyamö Iehova, ke e ame he ka hmonyin ka je iwahnaihmiony mē.

¹⁵ Anyin a wâ bi, ame he Iehova ka o me meic, ke helâ me hou anyin je kariöta; me me ohmeto anyin hmonyin hnyi wathethot, me hnen hna thawâ hnyi bâhlân meic.

¹⁶ Anyin ame he Iehova ka ivino me tavat hnen meic, me anyin hele vat: ke ame he ka se hia hani Iehova.

¹⁷ Haba tavat adre me okabi ödra bi me obosoi ödra bi, he ka he hnyi ta hnyei, hoton khaca hnyi wanben, adre an utioiny buaka, me ûnyi ae ikiki, me tep: awe, adre me he ka tha bi obiny kodra, haingö Iehova.

¹⁸ Anyin ae khanö nya hnödra hna ânyâ, me je ûnykûmenödra: ame o thö ûen, me oge me he ka ûkhacaköuâ ta je hnyei hia thithö, me je hwen hnyei; ke adre me he ka o but, me wâ anyik hmanenang.

¹⁹ Ke oge me he ka ip unyidra haten, ke oge me he ka kunâ ka hnyi ta je hnyei tavat gadra adre me kec möt, Tasesa ai, me Pula ai me Luda ai, wale tavat hlic fana, me Tubala ai, me Heleni ai, me ka hnyi je bomene ae sâkâû, tavat adre me ca hnyi long ûthumetu gak, me ca wâ anyik hmanenang: ke adre ma he ka khetâ anyik hmanenang ka hnyi je hnyei.

²⁰ Ke adre me he ka hom je liamekeiny möbun hia thithö ûnyi hnyi ta je hnyei hia thithö hnân hut kö Iehova, hon ta je hors, me ta je kariota, me hon je tap, me je miul, me hon je meno adre me he logot, ka hnyi anyik bucen ae kap a Jerusalema, haingö Iehova, helâ me lakon Isaraela adre me hom bwihlany hnyi kaia ae kalaöt ka hnyi uma umo Iehova.

²¹ Ke oge me he ka hom keihen gadra, mʼ adre me tavat bihut, me at Levi but, haingö Iehova.

²² Anyin ame he ka tet hmâ hnyi hnyimakök drany a teb ûnyi, me hmeledrany a teb ûnyi, wale oge me he ka op, haingö Iehova, ke helâe ame he ka tethmâ mâtrânibun me iöbun.

²³ Ke hwân hnyi ke imaneniny tehi, ke ne o but hnyi ke imaneniny ke tehi, ke hwân hnyi ke sabath, ke ne o but hnyi ke sabath, ame he ka o tavat hia he ka khudrung hnyi hnyimakök, haingö Iehova.

²⁴ Ke adre me he ka he me wâ ta je unyin tavat adre mokcu, a tavat adre hia but ûkhiny fuc mönya: anyin ame ca he ka mok hnödra waahnyöng, kʼ ame ca he bi ka mok anyidra meic; ke ame he bi tavat hia thithö ka hûköti ödra.