Isaia 65 - Iaai Bible 1901 (New Caledonia)

¹ OGE me ling ödra tavat adre me ca hnei nya; ame ö nya bi ge tavat; adre me ca elom nya: oge me ha, ka habe, Walö nya aug, walö nya ang, ka hnyei adre me ca hawʼ ödra hoton iök.

² Oge hia but lau li hnyamok hnyi je bong hia ka tavat adre me ca ûling, waleji adre me vheno gethen ae ca so hoton je ûnykûmenödra bi;

³ tavat adre me ohmönyini nya hnyi hnyimakök hnyi ta je bong, adre me bi hut hnyi ta hnyei, kʼ adre me leû uto ae bo so hon je veto kânâ;

⁴ tavat adre me laba hnyi wanben je erkemok, ke hnyi je dok ae iyong; tavat adre me han utioiny buaka, ke e hnyi anyidra je kaia dân ta je ûnyi ae ikiki;

⁵ tavat adre me ha, ka habe, Tot ut hââng, ca hakekenyi nya anyin a iny kap hom: wale hai hnyi li hnyingöik, ke meic ame hiâ hnyi je bong hia.

⁶ Wâ bi, a sihnalimen dut hnyi hnyimakök: oge me ca he ka laba hnyibû, ke oge me he ka bi hwaban, eke, oge me he ka bi hwaban ka hnyi je ûlaidra,

⁷ wale ta je hwakecibun ae kong, tha e me hwakecin ae kong anyin lakamöbun, haingö Iehova, waleji adre leû utö ae bo so hon je bucen, me bi gan könya hon je hut: anyin a wale oge me he ka bok ka tuluto anyidra ta je huliwa ka hnyi je ûlaidra.

⁸ Walang hna ha hnö Iehova, ke habe, Adre me wâ waina ae teb ûnyi hnyi thi vine, ke haingen ke at, ka habe, Ca degec e, anyin ae hu hnahic hnyin: helâe oge me he ka ânyâ, can ta je athnyabaik, mʼ oge me ca he ka tha ohiʼ ödra hia.

⁹ Ke oge, me he ka oâ ke mâtrân ûnyi ga Jekob, me at ame he ka labā anyik je bucen ûnyi ga Juda: ke ame he tavat oge ûca ka hu hnyei, kʼ ame he je athnyabaik ka labā e.

¹⁰ Ke ame he Sarona ka hnân hnyeuleiny ta je mamoe, ke haba, hwatapkoluiny Akora me hnân mokut hnen je hna hat meno, hobi kâu lakeik waleji tavat adre me elom nya.

¹¹ Ke haba öbun tavat öbun e hna degeci Iehova, me hnying anyik bucen ae kap, me penapena laulau kö Gada, me öunöngötâ hudiny ic hobi kö Meni;

¹² me oge me he ka ip öbun hobi kâu hele vat, ke öbun e he hia ka iyâû ka hnyi hna hlingâ: anyin oge hongot, ke öbun e ca ieû; oge me fuc, ke öbun e ca long; ke öbun e ânyâ hulo hnyi hnyimakök, me ûca ûnyi oge me ca wek.

¹³ Anyin a wale, walang hna ha hnen Than Iehova, Wâ bi, ame he je athnyabaik ka han, ke öbun e he bi öbun ka mekihnânem: wâ bi, ame he je athnyabaik ka ic, ke öbun e he bi öbun ka beic: wâ bi ame he je athnyabaik ka senyin, ke öbun e he bi öbun ka hmehma:

¹⁴ wâ bi, ame he je athnyabaik ka khumöng ge senyin hnyok, ke öbun e he bi öbun ka tenge ge hnyok ae hlöuhlöu, me kuku tenge ge vecin hanu.

¹⁵ Ke öbun e he ka hnaiöbun hnân hângâ ka tavat oge ûca, kʼ ame he Than Iehova ka hlingö u; me wenyö ke ien bi hon je athnyabainy:

¹⁶ me me he at ame ha hnahicâ e bi hnyi hmeledrany, me ame he ka ha hnahicâ e bi ge Khong ae hnathu; ke haba at ame khemanyin hnyi hmeledrany, me ame he ka khemanyin ge Khong ae hnathu; anyin a hia but hnying ta je vec a bân, ke adre hia but ikhâlâ ta je ûnyi e ge li emakök.

¹⁷ Anyin a wâ bi, inya oge me op drany a teb ûnyi, me hmeledrany a teb ûnyi: ke adre me ca he bi ka ûnykûme ta je ûnyi a bân, kʼ ame ca he ka o eû hnyi hnyekon at.

¹⁸ Ke so öbun e senyin me hobâ balua hnyi ûnyi oge me op: anyin a wâ bi, oge me op Jerusalema, hnân senyin, ke ta je aten hnân hobâ.

¹⁹ Ke oge me he ka senyinâ Jerusalema, me hobâ ta je atök: ke adre me ca he hmetu ka long hwan thungaû, me tenge.

²⁰ Ame he ka ba hmetu inma adre me konâm hnyi je bong a tep thibi, ke hingat ae ca bekhot bongon je bong: anyin ame he wanakat ka mok a khaca haded ta je hunainy, ke haba at ae kong a khaca haded hunainy, me ame he bi ka hnaûhango.

²¹ Ke adre me he bi ka op ta je uma me laba hnyin; kʼ adre me he bi ka tā je vine, me ijem wan.

²² Adre me ca he bi ka up uma, me ame he ke at bi he ka labā e; kʼ adre me ca he bi ka tä, me ame he ke at bi he ka han: anyin a haba ta je bong bongon lakeik me ame he ka helâ me ta je bong bongon ûö, ke ame he hnök je hna ûca ka senyinâ beû hmâ ta je huliwa anyin je hnyamödra.

²³ Adre me ca he bi ka huliwa baû, kʼ adre me ca he ka hnokoâ hnân hobi kâu ûokonguny; anyin a ödra je mâtrâniny tavat a hahnahicâ Iehova, tha ödra me lakudra.

²⁴ Ke ödra ka tiga ca hongot bi, me oge me he bi nya ka ieû: ke ödra ka tiga fuc, me oge me he bi nya ka ling ödra.

²⁵ Ame he bi luko ka tha han me nokon mamoe, ke ame he liona ka han thatûnyin hwit helâ me bolok: ke haba sesâiny kânâ, me wale an ta je on. Ke adre me ca he bi ka okongo me ohia hnyi anyik bucen hia ae kap, haingö Iehova.