Isaia 64 - Iaai Bible 1901 (New Caledonia)

¹ ÖU he ju ka kia but drany, me utut, me me badedö but je bucen hnyi hnyimâkâm;

² helâ me meic ame vâc je ong utö, me ame citröu köiö ge meic: he ka omanenâ iâm ka ta je iwahnaihmiony möu, me me öbubuny je hnyei hnyi hnyimâkâm!

³ Waleji hnyi hnâm hna ânyâ je ûnyi hnân outen waleji öhmun e ca ûnykûme, u je utut, me ame badedö but je bucen hnyi hnyimâkâm.

⁴ Anyin a haba hwân kâû adrem, ame ca löng bi hnen tavat, me ca tevehlöng bi, ke ame ca wâ hnen ecmak ke Khong, ke hake u ke thibi, at ame huliwa kodra adre me halubahingen e.

⁵ U me ûkhanö me at ame senyin me ânyâ hwakecin ae wisa, tavat adre me ûnykûme köu hnyi dem ta je gethen: wâ bi, u je hmönyâm, ke öhmun e ânyâ hwakecin ae kong: öhmun e laba kueny hnyin, ke hawa, öhmun e ha ka möt?

⁶ Öhmun hia thithö öhmun e helâ me ûnyi ae bo kong, ke helâ me je ûkhaû ae ikiki anyihmun wisa hia thithö: öhmun hia öhmun e meleca helâ me lany hnyot; kʼ ame ohiʼ öhmun hnen hwakecihmun ae monu helâke ame oû ang dö.

⁷ Ke ba at ame hawâ iâm, me ka bwebwelâ e bi me me he ka kot u: anyin a u je hia but ikhâlâ hnyimâkâm gahmun, ke u je oauʼ öhmun hnen je hwakecin ae monu öhmun e ânyâ.

⁸ Ke walang ang, Iehova lö, u thibi Kamöhmun; öhmun ang kânâ ae kece, ke u at ame op kaia; ke öhmun hia thithö ang huliwa, anyin hnyamâm.

⁹ Iehova lö, ca he ka hmonyâm gan hmâ, ke ca he ka ûnykûme hwakecin ae kong nyiele balua: wâ bi, ö u wâ thö, öhmun hia thithö ang je atâm.

¹⁰ A hnyot ut ânyâm je taun ae kap, a hnyot ut Ziona, e ba but wan hnyi Jerusalema.

¹¹ Adre hia but hiâ ge meic umöhmun uma ae kap ke hmanenang, waleji a oganö u hnyin hnen lakamöhmun; kʼ adre hia but hagutâ anyihmun ta je ûnyi hia ae kese.

¹² Iehova lö, hawa, u me he ka hokhnyokâ ta je ûnyi e? u me he ka laba hnyibû, me oveci öhmun hwegi öhmun?