Isaia 63 - Iaai Bible 1901 (New Caledonia)

¹ IE at ang ame he jem ûheny Edoma, ae dra anyin ûkhaû ûheny Bozera; a at ae hmanenang ge anyin ûkhaû, kʼ ame he hnyi meciny anyin tang hwege Inya thibi, at ame ha hnyi wisa, at ae hwege he ka omelo.

² Ieû ae dra gan ânyâm je ûkhaû, haba ânyâm je ûkhaû me helâ me je ûkhaûen at hlic vine?

³ Inya oge hia but hake hlic vine; ke ba at unyik ûnyi hnyi ta je hnyei: eke, oge me hlic ödra hnyi anyik hmonyin, ke ututi ödra hnyi anyik wathethot; me ame kong anyik je ûkhaû ge drödra, ke oge hia but okongoâ hia anyik ûkhaû.

⁴ Anyin a e bi eû hnyi hnyekuk bonginy hmonyin, kʼ ame o but hunainy hnok hna ûco.

⁵ Ke oge me wâ, me ba at ûhadruo; ke oge me lâiâ ae ba at hnân ci: anyin a wale ame hom möt könya hnen hing benyik; ke ame ci nya hnen bi anyik wathethot.

⁶ Ke oge me ututo tavat hnyi anyik hmonyin, ke omonu ödra hnyi anyik wathethot, ke oge me hingâlâ dren anyidra möt ka hnyi hon kânâ.

⁷ Oge me he bi nya ka ha ge tang betenge anyi Iehova, me je hnân oganö Iehova, hoton ta je ûnyi hia thithö waleji a ham köta Iehova; me so ae gan hmâ ka lap anyi Isaraela, waleji e ame ham ködra hoton anyin ibetengiö baû, ke hoton anyin tang betenge ae gan hmâ.

⁸ Anyin a e ame ha, ka habe, E hnathu, ta je atök ödra, a je wanakat adre me ca he bi ka ânyâ iyawo: me me at omeli ödra bi.

⁹ E ame tha vec mödra hnyi anyidra ta je vec hia, ke e ame omeli ödra ge angelainy hnyimakan: e ame ûcû ödra hnyi anyin ibetengiö, ke hnen hna betenge baû; ke ame hum ödra me kop ödra bala bi hnyi je bong ehac.

¹⁰ Ke adre me ûkhin fuc, me ovecâ banon ae kap: anyin a wale e ame hwio but me ame iwahnaihmiony mödra, ke e ame ka hamen bi vat mödra.

¹¹ Me e ame ûnykûme je bong ehac, wale ga Mose me lakeiny, ke haingen, ka habe, E but ua at ame hum ödra ûhedra eû hnyi köiö, tha e me tavat tuö haleny hnahat mamoe? ke e but ua at ame ip hanon ae kap eû hnyi hnyekudra?

¹² At ame su ödra ge benyen ae hmanenang tha e me hnyam a metö Mose? at ame subâ luâ köiö hnyi hnyimakodra, me wia hobi kâu bi ien a nyiele balua?

¹³ at ame hum ödra hnyi je dok ae dit, helâ me hors hnyi hnyebuba, mʼ adre me ca haû.

¹⁴ Haba hanu Iehova ame omenʼ ödra, helâ me je meno ame utut hnyi je hwatapkolu: helâe u je su lakem, me wia hobi köu ien ae hmanenang.

¹⁵ Wâ ju ûnyi hnyi drany, me wâ ûnyi hnyi hnyabam ae kap me hmanenang; ewa wem ae hwege me hna ânyâ hnen manâm man? adre hom behânâ medien hnyekom me ânyâm betenge könya.

¹⁶ Anyin a u kamöhmun, eja ke ne a ne ca ö ʼhmun Aberahama, ke ca khanö Isaraela öhmun: Iehova lö, u thibi kamöhmun; at a ûcû öhmun hwân nyiele, wale iâm.

¹⁷ Ieû u je omonu öhmun gan Iehova ûnyi hnyi dem gethen, me okhötâ je hnyekuhmun mʼöhmun e ca outö u? Hmetu ju can je athnyabaem, a je tribuiny em hnyei.

¹⁸ E okhulit hna labā e hnen ânyâm tavat ae kap: haba je iwahnaihmiony möhmun, adre me hia but uto ânyâm dok ae kap.

¹⁹ Öhmun e helâ me tavat u je ca musi ödra adrem balua; ke helâ me tavat adre ca ip iâm hudra.