Isaia 61 - Iaai Bible 1901 (New Caledonia)

¹ E HUK hanon Than Iehova; anyin a hia but Iehova hû nya he ka khetâ uthumetu ae so ka tavat ae ilemuk; e ame kunö nya he ka lan tavat ae vec hnyekudra, me he ka ha hna hna bâûâ ka ta je bâ, me hna khong uma ce at ka tavat adre ca;

² he ka haimemenâ hunainy ae ûcû kö Iehova, me bonginy bi hwaban ge Khonguta; he ka otubwelâ tavat hia adre me tenge thungaû;

³ he ka ip hobi kâu tavat adra tenge hnyi Ziona, he ka ham kodra ûnye vekiny hwaban hnabadröu, me wakacoiny senyin hwaban hlöuhlöu, me ûkhaûen ogânâ, hwaban hnyok ae hmak; mʼ adre me he ka hwenyi iödra me je ûöiny wisa, a tä Iehova, mʼ adre me he ka ogânâ e.

⁴ Ke adre me he ka op je dok ae ba wan ehac, adre me he ka otilâ hmeto je ke keihen adre degec ehac, ke adre me he ka ânyâwia je taun ae ba aten, je dok adre degec hnyi je dö ae se hia.

⁵ Ke ame he ka tot ta je atkanyua me han halebun je hnahat mamoe, ke ame he tavat aten ke je hnyei ka seû tilâ kânâ hobi köbun, me tuö ibun je hnyei vine.

⁶ Ke adre me he ka hwenyi iöbun, me Tavat bihut kö Iehova: kʼ ame he tavat ka haiöbun me Lathnyabainy Khonguta öbun e he ka an je soiny ta je hnyei, ke öbun e he ka hobeluâ anyidra hmanenang.

⁷ Ame he ka lo li hwaban köbun, hwaban anyibun hmehma; ke hwaban imonumonuny adre me he ka senyinâ jekhöûdra; anyin a wale adre me he ka olo hu hnyi idra hnyei: kʼ adre me he bi ka senyin nyiele balua.

⁸ Anyin a inya Iehova oge me hnyok ka hna owisa, inya oge me hûkotiâ venöu, ke hwakecin ae kong; ke oge me he ka bihwaban kodra hnyi hnathu, kʼ oge me he ka ânyâ mödra ûhihinyköu a nyiele balua.

⁹ Ke ame he ka lung je mâtrânidra unyin ta je hnyei, me lakudra huyi wanben tavat: ame he hia tavat adre me ō ʼdra ka wâhmakhmeto a ödra ta je mâtrân a ohnahicâ Iehova.

¹⁰ Oge me he ka ti senyini Iehova, kʼ ame he hanuk ka hobâ Khonguk; anyin a e ame hia but khaûö nya ge je ûkhaûiny möt, kʼ ame khaûö nya ge ûkotiny hwakecin ae wisa, helâ me at ame hap faipoipo ame omecâ e ge ûnyevekiny, ke helâ me hlu ame he ka faipoipo ame theibâ e.

¹¹ Anyin a kânâ ame okûâ je vongon, ke ta hnyei ame okûâ je hatong adre me tä hnyin; helâe minya ame he Iehova ka okûâ kwakecin ae wisa me ogânâ hnyi hnyimakan ta je hnyei hia thithö.