Isaia 60 - Iaai Bible 1901 (New Caledonia)

¹ HÖHÖI thö, umumelam dö; anyin a o but melamâm, ke a o but hom hmanenangi Iehova.

² Anyin a wâ bi, ame he ka tube hmeledrany hnen lit, ke ame he ka tube ta je hnyei hnen menekholom: ke ame he Iehova ka o hom, ke ame he ka manen hmanenanginy hom.

³ Ke ame he ta je hnyei ka he ka hnyi ânyâm metam, me je than ka hnyi iumumelaminy hnâm hna o.

⁴ Bwele thö goranyai igigilö me wâ: ödra hia thithö adre me ûkhacaköu, adre me o köu: ame he ka o lakom je baga ûhedra hnyi dok ae sâkâû, ke adre me he ka deluâ lakom je hlu.

⁵ Me u me he ka wâ me senyin, ke ame he hnyekom ka öbubuny me hlau; anyin adre me he ka wia köu tang omjeû ûnyi hnyi köiö, ke adre me he ka hom köu tang omjeûiny je hnyei.

⁶ Ame he ka avi u hnen ta je kamela ae se hia, me je nak kamela ûnyi Midiana me Efa; adre me he ka o hia ûhedra Sheba: adre me he ka hom gol, me libanu, me haimemenâ hnân oganö Iehova.

⁷ Adre me he ka ûkhacaköuâ je hnahat hia hnyi Kedera köu, kʼ ame he je mamoe bagainy Nebaioth hia ka bi athnyabaem: adre me he ka öliâ tabök tap hnyi so, ke oge me he ka omecâ uma umen anyik hmanenang.

⁸ Ie je hnyat ang adre me gâ helâ me ûlâ, ke helâ me je biny ka hnyi je hwanumödra bi?

⁹ E hnathu, ame he je bomene ka halubahing nya, kʼ ame he ka bân je huiny Tasesa he ka hom lakom obaga ûnyi hnyi dok ae sâkâû, ke e unyidra anyidra sileva me gol, hobi kâu iö Iehova a Khongom, me Kabi Isaraela at ame ohmanenangi u.

¹⁰ Ke ame he je atkanyua ka op hagâm je hak, kʼ ame he je tuhödra ka bi athnyabaem: anyin a oge me kuc u ehac hnyi anyik hmonyin, ke hnyi anyik ibetengiö oge hia but betenge gam.

¹¹ Ame he bala ka khong ut je homagöulem; kʼ adre me ca he bi ka hlöng hnyi lany me lit, me me he tavat ka sukhöûnâ köu ta je omjeûiny ta je hnyei, me lelö tilâ latuhödra.

¹² Anyin ame he ka hia tavat me dokhu bi adre me höcö bi athnyabaem; eke, adre me he ka ti oba wan ta je hnyei eling.

¹³ Ame he ka o köu hmanenanginy Lebanona, wale kop, me tidera, me tasura; hnân he ka ohmanenangâ anyik dok ae kap, ke oge me he bi nya ka ohmanenangâ e a hnen li cak.

¹⁴ Ke ame he lakon tavat adre me oveci u ka o me iyâû gam; ke ame he tavat hia adre me hûkötiö u ka nom ju ka hnyi li hnyeûcam; ke adre me he ka haiö u, a Taun anyi Iehova, Ziona anyin Kabi Isaraela.

¹⁵ Anyin a adre hia but digic u me hûkötiö u, waleling me me ca he ke at unyâm, awe, oge me he bi nya ka wiö u hnân hnyei ae mec nyiele balua, ke hnân senyin hnyi ta je dö ae se hia.

¹⁶ Ke u me he ka he minya ke ijem debainy ta je hnyei, ke ijem je basin ta je than: ke ame he ka khanö u a inya Iehova at ame omeli u, ke at ame ûcû melâm, Mani Jekob.

¹⁷ Oge me he ka ham gol hwaban bras, ke oge me he ka ham sileva hwaban fao, ke bras hwaban uto, me fao hwaban veto: ke oge me he ka wia ânyâm je taben me me hnahic, me je homakan ânyâm huliwa mʼ adre me wisa.

¹⁸ Adre me ca he hmetu ka long ûökonguny hnyi em hnyei, ke ame ca he bi ka ba wan me hna ûhangö hnyi je hnyigöulâm; ke u me he ka hwenyi ien ânyâm je hna up haginy, ka habe, Ûhomeli, me je homagöulem, ka habe, Ogânâ.

¹⁹ Ame ca he hmetu seûno ka hnân melamâm hnyi lany; ke ame ca he ka omelami u ge melaminy tehi: kʼ ame he Iehova ka olanyi u nyiele balua, ke Khongom a mecâm.

²⁰ Ame ca he hmetu ka dit ânyâm seûno, ke ame ca he bi ka hia ânyâm tehi: anyin ame he Iehova ka melamâm nyiele balua, ke adre me he ka umo je bonginy tenge a u.

²¹ Ke ame he ka wisa hia ânyâm tavat, adre me he ka hu hnyei nyiele balua; a bâtân oge tä, huliwa anyin li hnyamok, mʼ adre me he ka oganö nya.

²² Ame he ka wan thauzan bi, tavat ae wakhalet, ke ame he ka hnyei ae hwege bi, hnyei ae ûhnyûkong: oge me he, inya Iehova, ka ologotâ e hnyi ûen e.