Isaia 59 - Iaai Bible 1901 (New Caledonia)

¹ WÂ bi, e ca okhulit benyi Iehova me me ca khana he ka omelo; ke ca wejeji li hnyikonyen me me ca khana he ka long:

² ke haba ta je hwakecibun ae kong, me ame ûsâkâû öbun me Khongubun, ke anyibun je hulo ame ikhölʼ öbun ge hnyimakan, me me ca long.

³ Anyin ae kong ut je hnyamöbun ge dra, me je banyöbun hnen hulo; ame ha thoi hnen je esongodibun, ke ame fuc monu je bohmöbun.

⁴ E ba at ame hawâ hnyi hwakecin ae wisa, ke ba at ame ivino hnyi hnathu: adre me labageju ka ûnyi ae ba onyen, me ha thoi; kʼ adre me erkinâ ûokonguny, me hnokoâ but hulo.

⁵ Adre me thö je wakunyin vaipa, ke hwâwâ haihnai wahaihna: ama mok at ame he ka an je akunyidra, ke at ka thö but khaca, me ame ie oâ but on.

⁶ Kʼ ame ca he bi ka ûkhaû anyidra je ûhaihnâ, ke adre me ca he bi ka tubi ödra ge anyidra ta je huliwa: haba anyidra je huliwa, me je huliwa ae kong, ke e bi hnyi hnyamödra ûokonguny.

⁷ Ke ame wadring je cadra ka hnyi hulo, kʼ adre me logot hingâlâ dra ae ba hnyikongon: je ûnykûme ae kong je ûnykûmenödra; ke eû hnyi anyidra je hna cit gethen hnaûhango me ûokonguny.

⁸ E ca khanʼ ödra gethen deny hnahic; ke ba wisa hnyi je dedra: kʼ adre me ka ânyâ hobi kodra je gethen ae hwali; e ca khanʼ ödra hnahic tavat adre me vheno e.

⁹ Anyin a wale e ûsâkâûö möhmun hna owisa, kʼ ame ca khöû öhmun wisa: öhmun e halubahingen lany, ke wâ bi, wale lit; öhmun e halubahingen umumelam, ke wâ bi, wale menekolom.

¹⁰ Öhmun e khaûteta hna up veto helâke ta je wadröu, eke, öhmun e khaûteta helâke ba li ecmak: öhmun e haûhaû hnyi jebigo helâke me hauhauotreng: öhmun helâke me ta je komok unyin tavat ae möt.

¹¹ Öhmun e kuku hia helâ me je bea, ke kuku tenge tot helâ me je biny: öhmun e halubahingen owisa ke ba bi; me halubahingen ûhomeli ke ûsâkâûö bi möhmun.

¹² Anyin ae se hia hnöhmun je hna hanyâûâ hnyi hnyimâkâm, ke ame hai öhmun anyihmun je hulo: anyin a e bi unyihmun hnöhmun je hna hanyâûâ, ke e khanʼ öhmun dut anyihmun ta je monu:

¹³ wale hnyi hnöhmun hna hanyâûâ me ivino Iehova, me hmetuhmetu ge Khonguhmun, me ha ûöveci me thu musi, me ûnykûme me ha ûnyi hnyi hnyok je hofuc ae thoi.

¹⁴ Ke adre me ohmetu hna owisa, ke ame tot sâkâû hwakecin ae wisa: anyin a kolu but hnathu eû hnyi gethen, ke ca khana hwakecin ae fofâ he ka didrö.

¹⁵ Eke, e hia but hnathu; ke haba at ame kec ge hulo, me e ame ka ânyâ e bi me hnân söh: ke Iehova ame wâ e, me ame kong kâu ae ba owisa.

¹⁶ Ke e ame wâ ae ba at, me e ame lâiâ ae ba at ame khöûâ: anyin a wale ame ka ânyâ möt hobi kâu e hnen hnyamen bi; ke ame cö e anyin bi hwakecin ae wisa.

¹⁷ Ke e ame khavâ hwakecin ae wisa helâke me hna tube ûlâiny, ke e ame bicâ möt; ke e ame khavâ ûkhaûen bihwaban hnân ûkhaû, me khavâ weny ae gan hmâ helâ me ûkot.

¹⁸ E ame he ka bi hwaban hoton huliwa, wale hmonyin ka tavat a ûcon, me hwaban ka ta je iwahnaihmiony mē; e ame he ka bi hwaban ka je bomene.

¹⁹ Me adre me he ka outen iö Iehova ûhedra jimeû, me outen anyin hmanenang ûhedra hnyi hna o hnen seûno: anyin a e ame he ka o helâ me wagewe ae hwege, wale ame tûâ hnen; homenö Iehova.

²⁰ Ke ame he at ûhomeli! ka o hnyi Ziona, me kodra tavat adre me hmetu ûnyi hnyi hulo anyi Jekob, haingö Iehova.

²¹ Ke haba inya, waleû anyik ûhihinyköu mödra, haingö Iehova: Haba hanuk at ame laba hom, me hok je hofuc waleji oge ip hnyi hnyimâm, ame ca he ka hia ûnyi hnyi hnyimâm, me hnyimen ta je mâtrânâm, me hnyimen ta je mâtrâniny ta je mâtrânâm, hwân walang ang, ke ne o but nyiele balua, haingö Iehova.