Isaia 56 - Iaai Bible 1901 (New Caledonia)

¹ WALANG hna ha hnö Iehova, ka habe, Vheno thö ûnyi ae ûcû, ke ânyâ thö ûnyi ae wisa: anyin ae hakekeny jut he ka o anyik ûhomeli, me he ka omanenâ anyik wisa.

² Hnahic hnen at ame ânyâ e, me nokon at ame kât hmâ e; at ame tuö sabath, me ca okongoâ e, me at ame tuö hnyamen me me ca ânyâ bi hulo.

³ Ke haba khaca, e so ame ca he atkanyua, at ame hia but ûkhacaköu kö Iehova ka ha, ka habe, E hnathu ame he Iehova ka obö nya ûnyi hnyi iny hnyei: ke haba khaca, e so ame ca he eunuka ka ha, ka habe, Wâ bi, inya ang ûö ae mada.

⁴ Anyin a walang hna ha hnö Iehova Tuhan ta je eunuka, tavat adre me tuö anyik je sabath, me ûca ta je ûnyi oge me senyinâ, me kât hmâ anyik ûhihinyköu, ka habe;

⁵ Oge me he ka ham kodra hnyi umök uma me hnyi hnyin hna up hagik hak ke haten, me ien ae so, hon lakudra a wainda me wahlu; oge me he ka ham kodra ien ae tethmâ, wale adre me ca he bi ka subâ degecâ.

⁶ Ke haba ta je atkanyua minya, tavat adre me ûkhacaköu kö Iehova, he ka bi athnyabainy, me hnyok ka iö Iehova, me bi huliwa kâu, ödra hia thithö adre me tuö sabath me ca okongoâ, me kât hmâ anyik ûhihinyköu;

⁷ oge me he ka hom tavat eling ka hnyi anyik bucen ae kap, me osenyini ödra hnyi uma hnân hic könya; ke haba anyidra je hut adre le, ke anyidra je hut, adre me he ka kap hon tabök tap: ke adre me he ka ha ge umök uma, ka habe, ae uma hnân hic hobi kâu ta je hnyei hia thithö.

⁸ Haingen Than Iehova, at ame ûkhacaköuâ ta je hna obâ a at Isaraela, ka habe, Oge me he bi ju ka ûkhacaköu keihen unyin, ke ca ha bi ge hing aten adre hia but ûkhacaköu.

⁹ Ai öbun omenoiny ta hnyei he ka han, eke, öbun hia thithö omenoiny hnyot.

¹⁰ E wadröu but tavat tue unyin, ödra tavat hia thithö ae ca metâ bi; ödra je kuli hia thithö ae hum, e ca khanʼ ödra, kuku; a tavat bwi, me leleû, tavat bemokot.

¹¹ Eke, e hwenhmiâ je kuli ke ca khanʼ ödra he ka sekudra; ke tavat tuö mamoe ke ca khanʼ ödra bi he k a wâhmakhmeto: ödra hia thithö adre me ve saû ka hnyi dedra bi ta je gethen, adre me ve wia ka anyidra bi troban hnyi je hnödra.

¹² Haingodra, ka habe, Ai öbun, oge mâ he ka hok waina, ke otin e he ka ijem gânâ grâg; he bong nyi ame he ka helâ me bong ang, bong ae gan me pason he ka ha.