Isaia 53 - Iaai Bible 1901 (New Caledonia)

¹ IE at a kap anyihmun ûthumetu? kʼ adre hia but omanenâ kö ia benyi Iehova?

² Anyin a e ame kû tot hnyi hnyimakan helâ me bâtân, ke helâ me wân ûnyi hnyi kânâ ae atgec: e ba anyin hmanenang, ke ba meciny; ke ate me wâ e, me ba hmanenang gan mʼ ate me he ka weta.

³ E hûkötiânen tavat, kʼ adre me hna degecâ e; e at ae vec, ke at ae khana hlöuhlöu: ke adre me hûkotiâ e helâ me at ame he tavat ka ikhâlâ je hnyimakodra gan, kʼ ate me ca oûnyihnathoâ e.

⁴ E hnathu e ame hia but vadren anyita ta je hlöuhlöu, ke hom tilâ anyita ta je vec: ke ate me ûnykûme e a gʼ adre hom oûhnyûkongoâ, a gʼ ame kot e ge Khong, kʼ adre ovecâ.

⁵ Ke so bi e ame aat dö can hnöta ta je hna hanyâûâ, kʼ adre me khaû e can hwakecita ae kong: adre me ip hon e je hna kot mʼ ate me hnahic bi, ke öta metu but can hna khûâ hnân.

⁶ Öta hia thithö ate me hia but he monu helâ me je mamoe; ate me ve saû ka hnyi je gethen, ke haba Iehova ame ip hon e anyita ta je hulo hia thithö.

⁷ Adre me ovecâ e, ke e ame ka hokhnyokâ, kʼ ame ca khong hnyimen bi; adre me lelö e helâ me nokon mamoe adre me hom he ka hlingâ, ke helâ me mamoe ame laba hnyibû hnyi hnyimakan tavat subâ leûnen; eke, e ame ca khong hnyimen.

⁸ Adre me hom e ûnyi hnyi hna ovecâ me hna ûhnei; ke ewa at bi hnyi anyin dö ame ûnykûme a gʼ adre subâ degecâ e ûnyi hnyi hnyei iny tavat ae möt? adre me kot e can je hna hanyâûâ hnen lakeik.

⁹ Ke adre me penapena anyin erkemok unyin tavat ae kong, ke ame mok bi unyin tavat adre tren omjeû; ke so bi e ba hnyikongon, ke ba iyawo hnyi hnyimen.

¹⁰ Ke so bi e ûcû kö Iehova he ka thu hwetö e; e ame hia but ohlöuhlöuâ e: ke u ka he ka hudo e hnân hudiny hulo, me e ame he ka wâ je mâtrân, e ame he ka osehia bongon je bong, ke haba we Iehova ame he ka sot unyin.

¹¹ E ame he ka wâ ivecin hanon me sekunâ: kʼ ame he athnyabaik ae wisa ka owisa tavat ae se hia ge hnen hna wâhmakhmeto: ke e ame he ka vadren anyidra ta je hulo.

¹² Anyin a wale, oge me he ka khene jekhon me tavat ae beönua, ke e ame he ka tha khenâ je hna söh me tavat ae hwege: anyin a e ame hingâlâ anyin möt ka mok, ke adre me tha lelö e me tavat hanyâûâ: ke so bi e ame vadren hulo anyin tavat ae se hia, kʼ ame khöûâ tavat hanyâûâ.