Isaia 51 - Iaai Bible 1901 (New Caledonia)

¹ LING nya ju öbun tavat öbun e hnu hoton wisa, tavat öbun e elom Iehova: wâ ju kic adre subʼ öbun ûnyi hnyin, me hwanumen thop adre hiny öbun hnyin.

² Wâ thö kamöbun a Aberahama, me Sara at a hnöku öbun: anyin oge hawâ e ke tiga khaca, ke oge me ohnahicâ me osehia e.

³ Anyin ame hia but Iehova otubweli Ziona; e ame hia but otubwelâ je dok hia thithö unyin ae ba wan, me wia hnyebubainy me me ûcû me Edena, me iny hnyei baga me me helâ me hna belök hnö Iehova; adre me he ka wâ hnyin e senyin me hobâ, me ole, me hwan khumöng.

⁴ Lakeik lö, ling nya ju; ik hnyei lö,, tevehlöng ju könya: anyin ame he ka he but ûheny unyik hnanyibu, ke oge me he; ka ip hnok hna owisa hnân melaminy ta je hnyei.

⁵ E hakekeny jut hwakecin ae wisa, a he but anyik ûhomeli, ke ame he li benyik ka owisa ta je hnyei; ke ame he ta je bomene ka halubahing nya, me labageju ka hnyi benyik.

⁶ Bwele thö goranyai ka hnyi drany, ke wâ ju hmeledrany eû: anyin ame he ka didrut drany helâ me hai, kʼ ame he ka amam hmeledrany helâ me ûkhaû, kʼ ame he tavat adre me! labā e ka mok helâe: ke ame he ka e balua bi anyik ûhomeli, kʼ adre me ca he ka ohia hwakecik ae wisa.

⁷ Ling nya ju öbun tavat ae khanʼ öbun wisa, tavat ae hu anyik hnanyibu eû hnyi hnyekudra; ca he ju öbun ka outen hna haikongu öbun ge at, ke ca gāubun ge hnödra hna hlumʼ öbun.

⁸ Anyin ame he bi walelaba ka ön ödra helâ me ûkhaû, kʼ ame he bi waahnyöng ka ön ödra helâ me leûnen mamoe: kʼ ame he ka e balua bi hwakecik ae wisa, ke anyik ûhomeli ke ne o but hnyi ta je dö hia.

⁹ Hmak dö, hmak dö, hnyamö Iehova, khavâ ju tang hwege; hmak dö helâji me hnyi ta je bong kâû adrem, wale ta je dö a bân. Hawa, ca u at ame sö omomonu Rahaba me kot tanimo?

¹⁰ Hawa, ca u at ame ohmö köiö wale köiö ae dit hmonyin; at ame wia dok ae dit hnyi köiö me hnân gethen bi me me vheno hnen tavat adre ûco melidra?

¹¹ Ke ame he ka hmetu tavat a bi hwaban melidra hnö Iehova, me o hnyi Ziona me hwan khumöng; kʼ ame he ka e bi hon ta je bödra senyin a nyiele balua: adre me he ka senyin me hobâ, kʼ ame he ka hia hlöuhlöu me mâng.

¹² Inya, inya at ame otubweli öbun: u ia, at ame outen at ame he ka mok, ke nokon at adre me he ka wia me me ûcû me hna önying:

¹³ ke u me hnying Iehova bi At a up u, at ame ulolo drany kʼ ame bi taben hmeledrany; ke u me labö outen hnyi ta je bong hia can wathethot anyin at ûöveci, hnyi ûen e ame penapena he ka ohia? ke e but ua hmonyin anyin at ûöveci?

¹⁴ Adre me he ka ie thang at bâ adre ca; ke e ame ca he ka mokcu me dit ka hnyi thop, ke ame ca he ka ba an jeû.

¹⁵ Anyin a inya Iehova Khongom at ame oâ je waköiöiny köiö me ame mea but: haba ien, me Iehova tuhan sabaoth.

¹⁶ Ke oge hia but ip hok ta je hofuc hnyi hnyimâm, me tubi u hnyi hmenon hnyamok, mʼ oge me he ka ohmâ drany me bi taben hmeledrany, me ha kö Ziona, ka habe, U ik hnyei.

¹⁷ Jerusalema lö, hmak dö, hmak dö, todrö, at ame ic ûnyi hnyi beli Iehova wale kaiainy anyin hmonyin; u je hia but ijem onyen kaiainy ta tot, me ijehmö e.

¹⁸ E ba at ame he ka su tilâ e wale unyin je lakon hia e ame hnokoâ; ke ba at ame hom hnyamen wale unyin je lakon hia e ame hat.

¹⁹ Walang li ûnyi ame o köu; ie at ame he ka tenge gam? habe, e ba at, me hnaûhango, me hmiâ, me hele vat; oge ma kâmâu he ka otubweli u.

²⁰ Ame ta but je lakom, adre me mokut hnyi je hna saû hia hnyi gethen, helâ me gotiny hnyot ame hnok hnyi ert; adre unöngötö ge hmonyin anyi Iehova, wale hna thawâ hnen Khongom.

²¹ Anyin a wale, long ju ang, u at adre ovecâ, me at he monu ke ca hnen waina:

²² walang hna ha hnen Tuhâm, a Iehova, a Khongom, at ame ivinoâ lakeiny, ka habe, Wâ bi, oge hia but hom ûnyi hnyi hnyamâm kaiainy ta tot; me u me ca he hmetu ka ijem e:

²³ ke oge me he ka ip e hnyi hnyamen tavat adre me oveci u; waleji tavat adre me hia but ha köu, ka habe, Nom ju mʼ öhmun e he ka he but hom: ke u je hia but ham jom hnân hing kânâ, ke helâ me gethen, ka tavat adre me vheno.