Isaia 5 - Iaai Bible 1901 (New Caledonia)

¹ INY bekhumöngö ka ti oûnykûmik khûmöng ge oûnykûmik ge iny hnyei: vine. E hu ge oûnykûmik ehac hnyei vine hnyi hutiny kânâ ae hoso:

² ke e ame seû igigilo, me hlo je vetoiny, me tā vine soreka hnyin e, me otilö uma hnân belök wanben e, me si taben hlic vine hnyin minya: me e ame lubahingen he ka wa wan vine, ke ame wa bi wan vineiny hnyot.

³ Ke walang ang öbun tavat öbun e laba hnyi Jerusalema, me at Juda, öbun na owisa thö könya me ik hnyei vine.

⁴ Ieû ae khanʼ ödra ânyâ hmetu hnyi ik hnyei vine a oge ca hia but ânyâ hnyin e oge me halubahingen he ka wa wan vine, ke ieû ame wa, wan vineiny hnyot gan?

⁵ Ke oge me he ka omanenâ walang ang köbun ûnyi oge me he ka ânyâ hnyi ik hnyei vine: oge me he ka hom degecâ haginy, mʼ adre me he ka an dö e; oge me he ka hagutâ haginy, mʼ adre me he ka uto but e:

⁶ ke oge me he ka oûnyibauâ e; ke adre me ca he ka ânyâwia me jien; ke ame he ka kû hnyin e je iwadekong me watetaföcö: ke oge me he ka hûna ka je ûlâ me me ca he ka ta we kâu.

⁷ Anyin a hnyei vine i Iehova tuhan sabaoth lap anyi Isaraela, ke haba tavat Juda haleny uö ae so: ke e ame elâm hna owisa, ke wâ bi hna ovecâ; kʼ ame elâm hwakecin ae wisa, ke wâ bi hwan tenge bi.

⁸ Ekölö ge tavat adre me bi hanen ke uma ka ke uma, ke bi hanen ke utkânâ me ke utkânâ, ke ne o but ame ba dok hnân laba hnyin, mʼ öbun biju öbun e hake laba hnyi wanben hnyei!

⁹ Ame ha Iehova hnyi li hnyikönyök, ka habe, E hnathu ame he ka ba onyen ta je uma ae se, je uma ae gan me hmanenang, ke ba at ame he ka labā.

¹⁰ Anyin a ten ta ekeriny hnyei ame he ka wa thibi bath a khaca, ke khaca homer wan adre tä ame he ka wa khaca thibi efa.

¹¹ Ekölö ge tavat adre me vesâkong hnyi hnyomakatu he ka hnu hoton grâg; ke adre me laba ke ne o but hnyi hnyinghet mʼ adre me monu ge waina!

¹² Ke e bi kitara me nabeli, me bwinybet, me utkowi, me waina, hnyi anyidra je bijeû: ke adre me ca ûnykûme ge huliwa anyi Iehova, kʼ adre ca hia but ûnykûme bi huliwa anyin li hnyamen.

¹³ Anyin a wale ame he lakeik ka bâ, can e ba ûnyi ae khanʼ ödra: kʼ ame mekihnânen tavat ae beönua gadra, ke mok ge beic hoûmonu gadra.

¹⁴ Anyin a wale a hia but hedis ogânâ weny bi, kʼ ame memang gan hmâ a ca hnân bi tuluto: me ame tha utut ka hnyin anyidra hmanenang, me hoûmonu, me tavat mede, me tavat hobâ.

¹⁵ Ke ame nom ju hoûmonu, ke adre me hom hnyikânâi je taben, kʼ adre me ohnyikânâ li emakan at ae begörany:

¹⁶ ke adre me oganö Iehova tuhan sabaoth ge hna owisa, kʼ adre me okabâ Khong at ae Kap ge hwakecin ae wisa.

¹⁷ Ke ame he lakon mamoe ka han hnyi hna alin ödra ka hnyin, kʼ ame he ta je atkanyua ka han ta je hnyei iny tavat ae pipikhenya adre me hna degecâ.

¹⁸ Ekölö gadra adre me lelö monu ge je toiny thoi, ke lelö hulo ge toiny kat:

¹⁹ tavat adre me ha, ka habe, E so e ame logot, e so e ame mweimweiâ anyin huliwa, mʼ öhmun e he ka wâ e; ke ohakekenyâ thö, me o but musi anyin Kabiny Isaraela ûse me khanʼ öhmun dö!

²⁰ Ekölö gadra adre me ha ûnyi ae kong, me so; ke haba so, me kong; me ip menekholom hnyi hnen lany, ke lany hnyi hnen menekholom; me ip hiny hnyi hnen hnebwia, ke hnebwia hnyi hnen hiny!

²¹ Ekölö ge tavat a ödra metâ hnyi fanödra hna ûnykûme bi, me ûnykûme a ödra tavat wâ wia!

²² Ekölö ge tavat a ödra hwege ka ic waina, me tavat hwege he ka ûhaniken tap grâg:

²³ adre haiwisa at ae monu ge hwaban, me hok wisa unyin at ae wisa!

²⁴ Anyin a wale, helâ me bâhlân meic ame an thatûnyi, ke helâ me önying ae meleca ame ta hnyikânâi hnyi meic, helâe ame he ka bobot anyidra iwân, kʼ ame he ka sâ göranyai anyidra je vongon helâ me sesâiny kânâ: anyin adre me hna degecâ hnanyibu anyi Iehova tuhan sabaoth, me hûkotiâ hofuc hwan Kapi Isaraela.

²⁵ Anyin a wale ame han hmonyin anyi Iehova ka lakeiny, ke e ame nang hnyamen hudra, me kuc ödra, me ame öbubuny je ong bucen, ke haba je unyidra a mokcu, me helâ me ûnyi ae ikiki eû hnyi gethen. Ke hnyi ta je ûnyi e, e ame ca wia bi anyin i hmonyin, ke ame inâ bala bi hnyamen.

²⁶ Ke e ame he ka ogöranyâ boûdila ka hnyi ta je hnyei ae sâkâû, ke e ame he ka hûlûwhajû kodra ûnyi hnyi obiny hmeledrany: ke wâ bi adre me he ka ie o logot:

²⁷ ame ca he ke at gadrin ka sēnyin me haû; e ba at ame he ka tamokut me mokut; kʼ ame ca ok bi wen hnyekudra, kʼ ame ca mou bi hna hûkâlâ hnyeûcadra:

²⁸ e so homakan anyidra je fana, ke oto anyidra je cafana hia, ke helâ me oût je boûjimen can haledra je hors, ke helâ me hou anyidra je waengen:

²⁹ ke adre me he ka kuku helâ me liona, adre me he ka kuku helâ me je nak liona: eke, adre me he ka kip me oloû je hanidra, me hom ka hnyi dok ae iyong, ke ame he ka ba at ka omelo.

³⁰ Hnyi bong eling adre me he ka kuku gadra helâ me imeainy köiö: ke ödra ka wâ hnyei, wâ bi, e menekholom me hmak, me khömet ge je ûlâiny.