Isaia 49 - Iaai Bible 1901 (New Caledonia)

¹ LING nya ju öbun je bomene; ke tevehlöng ju öbun ta je hnyei ae sâkâû: Iehova ame ha iök ûnyi hnyi hnyok; kʼ ame ha iök ûnyi hnyi hnyeku bai:

² ke e ame ânyâ hnyimök me me helâ me hele vat ae so hwan, e ame ikhöiö nya hnyi hmenon hnyamen; ke e ame wiö nya mʼ inya fana ae hadröngöc, e ame ikholö nya hnyi tangen anyin fana:

³ ke e ame ha könya, ka habe, U thibi athnyabaik; a Isaraela, at oge me he ka hmanenang gan.

⁴ Ke haingök, ka habe, Oge hia but huliwa baû, ke a dit ut hwegiök, ke ba troban ke ûnyi baû bi: ke so bi, e hnathu, hamö Iehova be ka owisa könya, ke e unyin Khonguk hwabök bi.

⁵ Ke walang ang ame ha Iehova, at a up nya ûnyi hnyi hnyok mʼ inya athnyabainy, he ka ohmetu Jekob kâu, me me ûkhacaköu hmetu Isaraela unyin: (anyin a inya at adre ogânâ hnyi hnyimakö Iehova, ke haba Khonguk me wale tang hwegiök:)

⁶ eke, haingen, ka habe, E ti hâhâ a u me he ka bi athnyabaik he ka ogöranyâ je tribu anyi Jekob, ke ohâtâ hmetu hnyat adre tuö a at Isaraela: me oge me he bi minya he ka hnö u hnân melaminy ta je Ethen, ke hnân anyik ûhomeli ka hnyi can hmeledrany.

⁷ Walang hna ha hnö Iehova, at ame ûcû meli Isaraela, wale Kabiny, kâu a at ame hûkhötiâ hnen tavat, ke u at ame bi athnyabainy tavat musi, ka habe, Ame he je than ka wâ me tot; kʼ ame he lakon than ka khudrung; can bi Iehova ae hnathu, wale Kabi Isaraela at a ûco u.

⁸ Walang hna ha hnö Iehova, ka habe, Oge me thu köu hnyi ûen ae ûcû, ke oge me hadruo u hnyi bonginy möt: ke oge me he bi nya ka tuö u, me hnö u hnân ûhihinyköu me tavat, he ka ogöranyâ hnyei, me olabʼ ödra hnyi hnyei ae ba aten:

⁹ me ha ka tavat adre ca, ka habe, Didrut öbun; ke kodra hnyi dok ae lit, ka habe, Omanenʼ öbun ju. Adre me he ka han hnyi je gethen, me han tot hnyi je dok hia ae gorany.

¹⁰ Adre me ca he ka mekihnânem me beic; ke ame ca he ka li ödra kahwa, me seûno: anyin ame he at a betenge gadra ka hum ödra, me su ödra ka hnyi an ame pupua.

¹¹ Ke oge me he ka wia anyik je bucen hia hnân gethen, ke adre me he ka ögoranyâ anyik je hna cit gethen.

¹² Wâ bi, ame he ka o tavat ang ûhedra sâkâû: ke wâ bi, tavat ang ûhedra hnyi hwadro, me ûhedra jimeû; ke tavat ang ûhedra hnyi hnyei Sinim.

¹³ Je drany lö, khumöng dö; hmeledrany lö, senyin dö; je bucen lö, ie khumöng dö goranyai: anyin a Iehova ame otubwelâ lakeiny, me e ame he ka betenge ge anyin tavat adre me oveci ödra.

¹⁴ Ke haingen Ziona, ka habe, A hia but Iehova digic nya, ke a hnying nya but Than.

¹⁵ Hawa, ame he mono ka hnying nokon ame asen, me me ca he ka betenge ge onyen hnyekon? eke, e khanʼ ödra he ka hnying, ke so bi oge me ca he ka hnying u.

¹⁶ Wâ bi, oge hia but khavi hnalimâm hnyi li hnyamok; e bala bi hnyi hnyimakök ta je bahebetâm.

¹⁷ Ame mweimwei je lakom; ame he ka he but unyâm tavat adre me okongu u me tavat adre me ohiö u.

¹⁸ Bwela thö goranyai li emâkâm me wâ igigilo: ödra hia thithö ang adre me ûkhacaköu, me he jem köu. Haingö Iehova, Kia inya, ke e hnathu, u me he ka hum ödra hia me me khaûâm me hnân theibâm, me hnân oweikö u, helâ me hlu ame he ka faipoipo.

¹⁹ Ke haba je dok unyâm ae ba hnyin wan, ke je dok ae ba hnyin tavat, ke em adre hia but okongoâ, me e hnathu, ame he ka hnek em walang ang ge tavat adre me he ka labā, ke adre me he ka ûsâkâû ödra waleji adre me ohiö a

²⁰ Ame he lakem waleji u je tenge gadra, ka ha bi hnyi li hnyikönyâm, ka habe, E hnek könya hnen: ö u ha hnok mʼ inye he ka labā.

²¹ Ke u me he ka ha eû hnyi hnyekom, ka habe, Ia hnöku ödra ang könya anyin oge hia but tenge ge imekiny lakuk, me hake laba, a at adre obâ ke he monu? ke ia hat hnyat ang? Wâ bi, iny khaca thibi; ke haba hnyat ang, me ûhedra ua?

²² Walang hna ha hnö Iehova, ka habe, Oge me he ka hai hnyamok ka ta je hnyei, ke oge me he ka otilâ anyik boudila ka tavat: ke adre me he ka hom jem lakom obaga hnyi je ûlaidra, ke vadren lakom wahlu.

²³ Ke ame he je than ka hat ödra hobi köu, ke je momo than ka ûhalin: adre me he ka nom hnyikânâi köu, me drem sesâiny li cam; ke ame he ka khanö u a inya Iehova, kʼ adre me ca he bi ka hmehma, a tavat adre me halubahing nya.

²⁴ Hawa, adre me he ka hûgûnâ je hna söh unyin at ae hwege, me omelo je bâ waleji adre me hom hoton hnanyibu?

²⁵ Ke so bi, walang hna ha hnö Iehova, ka habe, Adre me he ka hûgûnâ je bâ unyin tavat ae hwege, ke adre me he ka hna but hna söh hnen tavat ae hwege hnyimen: anyin a oge me he ka ivino me at ame ivino möu, ke oge me he ka omelo ta je lakom.

²⁶ Ke oge me he bi nya ka han tavat ge hing vidra a ödra adre me oveci u; kʼ adre me he ka monu ge hing drödra bi, helâke me hnen waina ae hnebwia: ke ame he tavat hia ka khanʼ ödra a inya Iehova, at ame omeli u, me at ame ûcû melâm, a Man mani Jekob.