Isaia 46 - Iaai Bible 1901 (New Caledonia)

¹ BEL ame iyâû, Nebo ame he nom; e bi hon je meno anyidra je idola, ke hon je meno ae hnam; e hmak anyibun je hok ka ta je meno, kʼ adre sēnyin dut.

² Adre me he nom, kʼ adre me tha iyâû; e ca khanʼ ödra he ka hauden hok, kʼ adre me he but a gʼ adre me bâ.

³ Ling nya ju lap anyi Jekob, me je kolon hia lap anyi Isaraela, tavat adre me hom tilʼ ödra ûnyi hnyi hna hnokoâ, tavat adre me kap tilʼ ödra ûnyi hnyi hnyok:

⁴ ke inya thibi e, ke ne o but öbun e hingat ut, ke oge me he ka kap tilʼ öbun ke ne o but öbun e hûen dut: oge hia but op me oge me he ka kap; eke, oge me he ka kap me omelo.

⁵ Öbun e he ka ûhöûcû nya ke oûcû nya me ia, ke tuluti nya me inye ûcû me ia?

⁶ Haba tavat adre me hingâlâ gol ûnyi hnyi tang, ke tuluto sileva hnyi tulut, me adre me hawâ at ame huliwan gol, me e ame ânyâ e me me khong; adre me ta ju hnyikânâi, eke, adre me khudrung.

⁷ Adre me vadren e hon abenyidra, kʼ adre me hom tilâ e, me ip e hnyi hnen, ke e ame tot; kʼ ame ca he bi ûnyi hnyi hnen: eke, ame he at ka tenge kâu, ke e ca khana he ka thu, me omelo e ûnyi hnyi anyin hmak.

⁸ Ûnykûme thö e öbun, ke hnyok baga thö: tavat hanyâûâ lö, ûnykûme hmetu e.

⁹ Ûnykûme ju ta je ûnyi waleji a bân: anyin a inya Khong, ke ba minya ju; inya Khong, ke ba at ae ûcû mönya;

¹⁰ at ame haimemenâ obiny ûnyi hnyi can, ke ame ha ehac ta je ûnyi a ödra, tiga ca ânyâ bi; kʼ ame ha, ka habe, Ame he ka tethmâ anyik musi, ke oge me he bi nya ka ânyâ hia wek:

¹¹ at ame hawâ meno ame gâ ae behan ûheny jimeio, ûheny hnyi hnyei ae sâkâû, waleji at oge me ûsabö mē; eke, oge hia but ha, me oge me he ka ohwâdâ e; oge hia but ip hnyi hnyekuk, me oge me he bi ka ânyâ.

¹² Ling nya ju, öbun tavat ae hnyok baga, tavat adre me ûsâkâûö me wisa:

¹³ oge me hakekenyâ anyik wisa, e ame ca he ka ûsâkâûö, ke ame ca he ka bec ûhomeli ûnyi gak; ke oge me he ka ip hnyi Ziona ûhomeli hobi kö Isaraela hmanenangik.