Isaia 45 - Iaai Bible 1901 (New Caledonia)

¹ WALANG hna ha hnö Iehova kö Koreso, a at e ame hû, at oge me kât hnyamen a metân he ka hom ûhnyûkongoâ je hnyei hnyi hnyimakan, ke oge me he ka thang wen hnyin je than; he ka khong je hlinginy hnyi hnyimakan, kʼ adre me ca he ka hlöng je homagöule;

² oge me he ka bok hnyi hnyimâkâm he ka okhabalavâ je dok ae ûjejöng: oge me he ka thö amamâ je hlinginy bras, ke subâ degecâ je ohmâiny fao:

³ ke oge me he ka ham köu je omejeûiny menekholom, me je tang omjeû adre ikhâlâ hnyi je dok ae iyong, me me khanö u a inya Iehova Khongu Isaraela, at ame ha iâm.

⁴ Oge hia but ba iâm, ga Jekob a athnyabaik, ke ga Isaraela hnok hna ûca: oge hia but ham köu iâm ke ca khanö u bi inya.

⁵ Inya Iehova, ke ba ju ke at; ke ba ju ke Khong, ke hake inya ke: oge me he ka oweikâ hnyâm, ke ca khanö u bi nya:

⁶ me me khanʼ ödra hwân hnyi hna o hnen seûno, me ûnyi jimeû, ae ba ju ke at, ke hake inya thibi: inya Iehova ke ba ju ke at.

⁷ Oge me op lany ke oâ lit; oge me ânyâ ûsoköu, ke oâ hulo; inya Iehova at ame ânyâ ta je ûnyi hia thithö eling.

⁸ Ta ju, öbun je drany ûnyi ethö, ke so ame he je ûlâ ka hingâlâ jem hwakecin ae wisa: e so ame he hmeledrany ka memang, me owa but möt, me tha oâ hwakecin ae wisa; inya Iehova at a op e.

⁹ Ekölö ge at ame iwatretra me at a op e! a ec kaia unyin ta je ec kaia eang hmeledrany! hawa, ame he kânâ ae kece ka ha ka at a op e, ka habe, Ieû u me op? ke hawa, ame he ûnyi u je huliwan ka ha, ka habe, E ba li hnyamen?

¹⁰ Ekölö ge at ame ha ka kamen, ka habe, Ieû u je hnoko? ame ne ha ka momo, ka habe, U je hnokoâ ieû?

¹¹ Walang hna ha hnö Iehova Kabi Isaraela, at a op e, ka habe, Hnei nya thö ge ta je ûnyi ame he ka o; ke hûna thö könya ge lakuk, me huliwa anyin li hnyamok.

¹² Oge hia but ânyâ hmeledrany me op tavat adre me labā e: oge me ulolo drany ge li hnyamok, ke oge muso ta je ûnyi hia hnyin e.

¹³ Oge hia but oâ at e hnyi wisa, ke oge me he ka owisa deny je gethen hia, e ame he ka op anyik taun, me hna ta je atök a je hwenbâ, ke ca ge hwaban ke ca ge bwihlany, ame ha Iehova tuhan sabaoth.

¹⁴ Walang hna ha hnö Iehova, ka habe, Haba troban huliwa hnyi Aigupito, me je omjeûiny Aithiope hnân ûcû, me at Seba, tavat ae beû, adre me he ka hum ödra köu, me me ânyâm; adre me he ka he hotom; adre me he ka he ke tiga cʼ ödra ge je tö a fao: ke adre me he ka iyâû köu, me khöu köu me ba, ka habe, E hnathu e bi Khong unyâm; ke ba ju ke at, ke ba ke Khong.

¹⁵ E hnathu u Khong ame ikhölö, Khongu Isaraela, at ûhomeli.

¹⁶ Adre me he hia thithö ka hmehma me hlohlo: adre me he ka he me tha monumonu, tavat adre me bi idola.

¹⁷ Ke adre me he ka omeli Isaraela unyi Iehova hnyi möt ame ca ba balua: öbun e ca he ka hmehma me hlohlo nyiele balua.

¹⁸ Anyin a walang hna ha hnö Iehova at a op drany; e thibi Khong; at ame ânyâ hmeledrany me op e; e ame otethmâ e, kʼ ame ca op baûâ e, e ame mâdrâ e me me labā e: haingen, ka habe, Inya Iehova ka ba ju ke at.

¹⁹ Oge me ca ba ikhâlâ hnyi dok a menekholominy hnyei; oge me ca ha ka je mâtrâni Jekob, ka habe, Elâm baûö nya thö: inya Iehova at ame ha wisa, oge me haimemenâ ta je ûnyi ae ûcû.

²⁰ Ûkhacaköu thö ke ai öbun; tha hakekenyâ ju, öbun tavat öbun e kec möt ûnyi hnyi je hnyei: e ca hu metâ gadra adre me hom tilâ ûtoiny anyidra je idola, me hic ka khong ae ca khana he ka omelo.

²¹ Haimemenâ thö, ke hakekenyâ thö; eke, e so adre me tha ûhnenamö: ia omanenâ e hwân kâû adrem? ia haimemenâ e hwân kâû ehac? hawa, ca hnok Iehova? ke ba ju ke Khong, ke hake inya ke; Khong ae wisa me at ûhomeli; ke ba ju ke at, ke inya thibi.

²² Bwele ju jem könya mʼ adre me he ka omeli öbun, öbun hia thithö je can hmeledrany: anyin a inya thibi Khong ke ba minya ju ke at.

²³ Oge hia but khemanyin gak bi, ame he but hofuc ûnyi hnyi hnyimök hnyi wisa, ke ame ca he bi ka hmetu a gʼ adre me he hia ka cibouca könya, ke ame he ta je hnyem hia thithö ka khemanyin gak.

²⁴ Ame he ka ha könya ke at, ka habe, E hu but gak thibi ûnyi ga Iehova wisa me hwege: ame he ka o tavat kâu, ke adre me he ka hmehma, waleji tavat adre me hmönyidra kâu.

²⁵ Adre me he ka haiwisa ta je mâtrâni Isaraela hia thithö unyi Iehova, ke adre me he ka hobâ.