Isaia 44 - Iaai Bible 1901 (New Caledonia)

¹ KE walang ang long ju, Jekob athnyabaik; ke Isaraela waleji oge ûca:

² walang hna ha hnö Iehova at a huliwön u, at a up u hwân hnyi hnyekon hinyâm, at ame he ka hadruo u, ame ha, ka habe, Ca ot bi, Jekob a athnyabaik; me u Jesuruna, waleji oge ûca.

³ Anyin oge me he ka hingâlâ köiö hon at ame beic, me je wagewe hon dok ae hwahwacit: oge me he ka hingâlâ hanuk hon je mâtrânâm, me hnahicik hon tavat adre me o ûnyi gam:

⁴ ke adre me he ka tha kû me hna önying, helâ me je garaba hnyi baten je wagewe.

⁵ Ame he ke at ka ha ka habe, Inya atö Iehova; ke ame he ke at ka hwenyi ien bi hoton iö Jekob; ke ame he ke at ka sihnalimen ge hnyamen hobi kö Iehova, me hwenyi ien hoton iö Isaraela.

⁶ Walang hna ha hnö Iehova, Tuhö Isaraela, me at ûco anyin möt, wale Iehova tuhan sabaoth: inya ang at a bân, me a biliny; ke ba ju ke Khong ke inya thibi.

⁷ Ke ia ame he ka hongot helâ mönya, me haimemenâ, me penapena hobi könya, hwân hnyi hnok hna ip tavat kâû adrem? ke so adre me he ka haimemenâ ta je ûnyi ame he ka o, me ta je ûnyi ame he ka aat dö.

⁸ Ca ot bi, ke ca öbubuny bi: hawa oge ca haimemenâ köu ehac, me omanenâ köu? ke öbun tavat ohnathu nya. Hawa, e hu ke Khong minya ju ke inya thibi? eke e ba ke Kic; e ca khanö nya khaca.

⁹ E ûnyi baû hia tavat adre me bi hnatheat; ke ba troban anyidra ta je ûnyi adre me hnyok kâu: ke ame ca bwele tavat adre me ohnathu ödra, ke ca khanʼ ödra bi; mʼ adre me he ka hmehma but.

¹⁰ Ie at ame tibet ke khong, me okoiâ ke hnatheat ae ba troban?

¹¹ Wâ bi, ame he ka hmehma je lawaeny hia; ke je at, tavat adre me huliwan: e so adre me oûkhacaköu ödra hia, e so adre me ûtitilen; adre me he bi ka ot, adre me he ka tha hmehma.

¹² Haba at leû fao e ame ânyâ giwa, me huliwan hnyi walep, me kokot e ge je hama, me huliwan e ge benyin ae hwege: eke, e ame mekihnânem, me ame ba hwegien; e ame ca ijem köiö me e ame sēnyin dut.

¹³ Haba at ame tretrau utö ame lelö tulut; e ame bi hnalimen e ge pensel; e ame tibet e ge je omelö, ke e ame tuluto e ge je kompas, ke e ame ânyâ öûco e me at, hoton hmainy at, me me laba hnyin uma.

¹⁴ E ame sö hobi kâu e je arasi, me hok tireza, me wajo, me onâkâ khaca hobi kâu e hnyi je ûöiny hnyot: e ame tä kop, ke ame he we ka okûâ e.

¹⁵ Ke ame he ka le e hnen at; ke e ame hom hanen hnân hlök; eke, e ame vâc e, me le falawa: eke, e ame thekhong, me khudrung kâu; e ame bi hnatheat, me ta ju hnyi hnyimakan.

¹⁶ Ke hnyiban e, e ame vâc hnyi meic; ke ke hnyiban hnân leû uthmeno me han, me me sekon dö: eke e ame hlök mo ha, ka habe, Awe, oge mage thö, oge long dö meic:

¹⁷ ke haba kolon, e ame bi khong kâu, hnân anyin idola: e ame ta kâu me khudrung, me hic kâu, me ha, ka habe, Omeli nya thö; anyin a u khonguk.

¹⁸ E ca khanʼ ödra, ke adre me ca wâ ûnykûme: anyin a e ame omûko je emaködra, mʼ adre me ca bwela bi; me je hnyekudra mʼ adre me ca wâhmakhmeto.

¹⁹ Ke ba at ame ûnykûme hnyi hnyekon, ke ba metâ me wâhmakhmeto me me be ka ha, ka habe, Oge hia but vâc ke hnyiban hnyi meic; eke, oge hia but le falawa hon i walepiny ke hnyiban; oge hia but leû meno me han: ke hawa, oge me he bi ka bi ûnyi ae ikiki hnyi kolon? hawa, oge me be ka khudrung ju ka hnyiban ûö?

²⁰ E ame han dröu: kʼ ame omono e ge hnyok adre iyawö, me me ca khana he ka omelo hanon me ha, ka habe, Hawa, e ba thoi hnyi hnyam a metök?

²¹ Jekob lö, ûnykûme ta je ûnyi e, ke u Isaraela, anyin a u athnyabaik: oge me i up u, ke u athnyabaik: Isaraela lö, oge me ca he ka hnying u.

²² Oge hia but kot degecâ hnâm ta je hna hanyâûâ helâ me ûlâ ae khot, me ânyâm ta je hulo helâ me ûlâ: hmetu ju könya, anyin a oge hia but ûcû u.

²³ Drany lö, khumöng dö, anyin a ânyâ e Iehova; je hnyikânâiny hmeledrany lö, hongot senyin dö; öbun je bucen lö, ie khumöng dö goranyai, ke hnyot minya, ke ta je ûö hia hnyin e: anyin a hia but Iehova ûcû Jekob, ke e ame he ka ogânâ e bi hnyi Isaraela.

²⁴ Walang hna ha hnö Iehova, at a ûcû u, ke at a up u hwân hnyi hnyekon hinyâm: inya Iehova at a op ta je ûnyi hia; at a hake ulolo drany; at thibi a olauâ hmeledrany; ie at unyik?

²⁵ inya at ame oûnyibaûâ je haten anyin tavat ae thoi, me omono tavat bi khong; me ohmeto tavat ae metâ, me omono anyidra wâhmakhmeto:

²⁶ at ame ohnathoâ hofuc hwan athnyahainy, me ohwâdâ hna ûhnenamö hnen anyin je metâ; at ame ha ge Jerusalema, ka kabe, Adre me he ka labā e; haingen ge je tauniny Juda, ka habe, Adre me he, ka up veto, ke oge me he ka otilâ hmeto je hudrei:

²⁷ at ame ha ka dok ae dit, ka habe, Hme but, ke oge me he ka ohwahwacitâ ânyâm je wagewe:

²⁸ at ame ha ga Koreso, ka habe, At tuö mamoe hobi könya, e ame he ka ânyâ hia: e ame he bi ka ha ge Jerusalema, ka habe, Adre me he ka up vetoiny; e ame he ka ha ge uma kap, ka habe, adre me ke ka bi trobâm.