Isaia 43 - Iaai Bible 1901 (New Caledonia)

¹ KE walang ang, walang hna ha hnö Iehova at a up u Jekob, me at a huliwön u Isaraela, ka habe, Ca ot bi, anyin a oge hia but ûcö ânyâm möt; oge hia but hawâ iâm, anyin a atök ut u.

² U ka he ka hanyâûâ je köiö, me oge me he ka tha inya möu; me je wagewe, adre me ca he ka khutukhaûö u: u ka he ka he wanben meic, ame ca he ka thung u; kʼ ame ca he bâhlân ka möt unyâm.

³ Anyin a inya Iehova Khongom, Kabi Isaraela, at ame omeli u; oge hia but ham Aigupito hnân hwaban melâm, ke Aithiope me Teba hnân hwabâm.

⁴ Anyin a u oûnykûmik, me hmanenang, me hnok hna betenge gan; awe, oge me he ka ham tavat hnân hwabâm, me je hnyei hwaban melâm.

⁵ Ca ot bi, anyin a tha inya möu: oge me he ka hom ta je mâtrânâm ûheny jimeio, me ûkhaca-köuö u ûheny jimeû;

⁶ oge me he ka ha ka ke keihen hwadro, ka habe, Hna but; ke ka ke keihen hwaiöu, Ca behânâ bi; hom but lakuk obaga ûhedra sâkâû, ke lakuk wahlu ûnyi hnyi je can hmeledrany;

⁷ haba ödra hia adre ip hudra iök, waleji oge me op hnân oganö nya; me inya at a huliwön ödra; eke, oge hia but up ödra.

⁸ Hö jem tavat ae wadröu ke hu ecmak, ke tavat ae wejiji ke hu hnyiköny.

⁹ Ûkhacaköuâ thö ta je hnyei hia, me ame he tavat ka ûkhacaköu: ie at gadra ame he ka haimemenâ e, me omanenâ köta ta je ûnyi a bân? hamödra he ka hawâ tavat ohnatho, mʼ adre me he ka ohnathu ödra: ke adre me ne he ka long me ha, ka habe, E hnathu.

¹⁰ Öbun tavat ohnathu nya, haingö Iehova, ke athnyabaik waleji oge me ûca: me me khanʼ öbun me labageju könya, me wâ ûnykûme a inya thibi; e ba ke Khong a ban ke bilik bi, ke haba khaca, me ba ke at hnyi hwabök.

¹¹ Inya thibi Iehova, ke ba ju ke at ûhomeli, ke hake inya ke.

¹² Oge hia but haimemenâ, ke oge hia but omelo, ke oge hia but omanenâ, ke tiga ba khong kanyua unyibun: anyin a wale haingö Iehova, öbun tavat ohnathu nya, a inya thibi Khong.

¹³ Eke, inya but ling ke tiga ba bong; ke ba at ae khana he ka hûgûnâ ûnyi hnyi hnyamok: inya oge me he ka huliwa, ke ie at ame he ka bi ovheliny.

¹⁴ Walang hna ha hnö Iehova at omeli öbun, a Kabi Isaraela, ka habe, Can gabun, oge me he ka ûkhûnöng Babulona ai, ke oge me he ka hum ödra hia thithö a je bâ, wale at Kaledia, adre me tabâ je hu adre me senyin hnyin.

¹⁵ Inya Iehova, Kabibun, at a Up Isaraela, ke Tuhöbun.

¹⁶ Walang hna ha hnö Iehova at ame bi gethen hnyi köiö, kʼ ame bi deny gethen hnyi wanben köiö ae gan;

¹⁷ at ame hom je kariota me je hors, me utbavat me tang hwege; adre me tha mokut ju, kʼ adre me ca he ka tot hmetu bi; e hiʼ ödra but, kʼ adre me mok ut helâ me wakunenu:

¹⁸ haingen, ke habe, Ca ûnykûme bi ta je ûnyi a bân, ke ca hnyok bi ka ta je ûnyi kâû adrem.

¹⁹ Wâ bi, oge me he ka ânyâ ûnyi a teb ûnyi; kʼ ame he ka kû walang ang; ame ca he ka khanʼ öbun e? Oge me he ka bi gethen hnyi hnyebuba, me bi wagewe hnyi hnyei baga.

²⁰ Ke ame he ka oganö nya hnen je menoiny hnyot, je luko me je iaena: anyin oge me oâ köiö hnyi hnyebuba, me je wagewe hnyi dok ae hnyei baga, he ka habelen lakeik waleji oge ûca:

²¹ waleji tavat oge me op hobi könya bi, mʼ adre me he ka oganö nya.

²² Ke so bi u je ca hawo nya, Jekob; ke u je katebu könya Isaraela.

²³ U je ca hom könya halem ta je nak meno a je hudiny leû; ke u je ca oganö nya ge ânyâm ta je hut. Oge ca ohmakö u ge ta je hut, me osenyini u ge ta je ûö ae bo so.

²⁴ U je ca ûcû ûö ae hnebwia hobi könya hwaban mone, ke u je ca osekuni nya ge pipikhenyainy ânyâm ta je hut: ke u je hia but ohmaki nya ge ânyâm ta je hulo, u je hia but osenyini nya ge hwakecâm ae kong.

²⁵ Inya, inya thibi at ame kot degecâ hnâm ta je hna hanyâûâ cak bi; ke oge me ca he ka ûnykûme ânyâm ta je hulo.

²⁶ Oûnykûmi nya thö; ate me he ka tha ûhneiköu: ha thö hnâm hna ivino, mʼ adre me he ka haiwisai u.

²⁷ Ame ânyâ hulo hnen kâmâm a bân, ke ame ûkhin fuc mönya ânyâm je ûthumetu.

²⁸ Anyin a wale oge me he ka okongoâ je tuhan dok ae kap, me hnö Jekob ka hnaûhango, ke Isaraela hnân haikongoâ.