Isaia 41 - Iaai Bible 1901 (New Caledonia)

¹ TA je bomene lö, laba hnyibû ju hnyi hnyimakök; ke ame he ta je hnyei ka ohâtâ tang hwegeiödra: he but jem ödra, mʼ adre me fuc dö: ate me he ka ûkhacaköu me ûhnei.

² Ia oâ ke at ûheny jimeio, waleji e ame hawâ ka hnyi li can hnyi hwakecin ae wisa? e ame hna je hnyei kâu, me otilâ he ka musi hon ta je than; e ame hnʼ ödra ka hnyi anyin hele vat helâ me sesâ, me ka anyin cafana helâ me je thatûnyin hwit ame tûâ ang.

³ E ame hnu hotudra, me he so; waleji hnyi gethen e ame tiga ca vheno ge li can.

⁴ Ia mâdrâ me ânyâ e, ame hawâ je dö ûnyi hnyi can? Inya Iehova at a bân me biliny, inya thibi e.

⁵ Haba je bomene adre me wâ me ot; haba je can hmeledrany adre me öbubuny: adre me hakekenyâ, me o.

⁶ Adre me ûhadruoköu ödra ke at me ke at; ke adre me ve ha ka je liamekeiny mödra, ka habe, Hwege ju.

⁷ Ke haba at tretrau ûto ame sihwegiâ at leû fao, ke haba at ame okhabalavâ ge hama ame sihwegiâ at ame kot taben huliwa a fao, me ha, ka habe, E so, hna leû veto hnân hûjâ: me e ame ohmâ e ge je fao me me ca bwebwet.

⁸ Ke haba u Isaraela lö a athnyabaik, ke Jekob at oge me ûca, mâtrâni Aberahama a hanok;

⁹ a u at oge me kât ûnyi hnyi je can hmeledrany, ke hawâ ûnyi hnyi je ke keihen e, ke ha köu, ka habe, U thibi, athnyabaik oge ûco u ke ca hna degeci u;

¹⁰ awe, ca ot bi, anyin a tha inya möu; ca hlohlo bi, anyin a inya Khongom: oge me he ka ohwegiö u; eke, oge me he ka hadruo u; eke, oge me he ka ci u ge hnyamök a metök ae wisa.

¹¹ Wâ bi, adre me i he ka hmehma me hlohlo ödra hia thithö adre me hmönyidra köu: ke haba tavat adre me ivino möu me adre me he ka helâ me ba kʼ adre me he ka hia but.

¹² U me he ka elom ödra, ke u me ca he ka ō ʼdra, wale tavat adre me ivino möu; kʼ ame he ka helâ me ba me ûnyi baû bi tavat adre me vat möu.

¹³ Anyin a inya Iehova Khongom oge me he ka kat benyâm a metâm, me ba köu, ka habe, Ca ot; oge me he bi nya ka hadruo u.

¹⁴ Ca ot bi u Jekob a waahnyöng, ke öbun tavat Isaraela; haingö Iehova, ka habe, Oge me he ka hadruo u; ke haba at ûhomeli u, me Kabi Isaraela.

¹⁵ Wâ bi, oge me he ka wiö u hnân huje hwit ae so hwan a teb ûnyi ke hu nyon: mʼ u me he ka kokot je bucen me me ûhnyûkong ju, ke u me he ka wia je hut me me helâ me unen hwit.

¹⁶ U me he ka ulic ödra, kʼ ame he ang ka tûâ degeci ödra, kʼ ame he hou ka ovesei ödra: ke u me he ka senyini Iehova, ke u me he ka hobâ Kabi Isaraela.

¹⁷ Tavat adre me vec, ke ta je theduoc, me adre me heleû köiö, me ba, ke atgec dö ta je bohmödra ge beic; ke oge me he bi nya Iehova ka thu kodra, oge me ca he bi nya Khongu Isaraela ka hna degeci ödra.

¹⁸ Oge me he ka oâ je wagewe hon je bucen ae ba leûnen, ke je hna pupua köiö hnyi je hnyigöulen je bucen: oge me he ka wia hnyebuba me me köiö, ke hnyei ae hwahwacit me me je an ame pupua.

¹⁹ Oge me he ka tä ta je arasi hnyi hnyebuba, ke je ohum, ke adasi, ke ûö hnân wakaco; oge me he ka tha ip hnyi hnyei baga kop, ke tidera, ke tasura:

²⁰ mʼ adre me he ka wâ me khanʼ ödra, me ûnykûme, me tha wâ ûnykûme a ga ânyâ hnen benyi Iehova, ke a op e hnen Kabi Isaraela.

²¹ Ho jem hnobun hna ivino, ame ha Iehova; omanenâ thö hobun ta je hofuc ae hwege, ame ha Tuhö Jekob.

²² E so adre me he ka omanenâ, me thumetu öta ge ta je ûnyi ame he ka kû: ha thʼ öbun ge bongon ta je ûnyi kâû adrem, mʼ ate me ûnykûme me wâ obiny ta je ûnyi e; ke ame ne he ka omanenâ köta ta je ûnyi ame he ka o.

²³ Ûthumetu thö ge ta je ûnyi ame he ka kû hnyi obiny, me me khanʼ öhmun a öbun ta je khong: eke, ânyâ thö so, ame ne kong, mʼ öhmun e he ka hlohlo, me tha wâ bi e.

²⁴ Wâ bi, öbun ti ba, ke ti ba onyen anyibun huliwa: e ikiki at ame ûcʼ öbun.

²⁵ O ge hia but oâ ke at ûheny hnyi hwadro, ke e ame he jem; ke ûheny hnyi hna o hnen seûno, oge me oâ ke at ame hawâ iök: e ame he ka je than helâ me hna dâ dröu, ke helâ me at ame op kaia ame ututo kânâ ae kece.

²⁶ Ie at ame haimemenâ e ûnyi hnyi can, me me khanʼ öta thö? me kâû adrem mʼ ate me he ka ha ka habe, E at ae wisa? eke, e ba at a haimemenâ, eke, e ba at ame omanenâ, eke, e ba at a long hobun je hofuc.

²⁷ Oge ma bok ka ha kö Ziona, ka habe, Wâ bi, wâ bi ödra; ke oge me he ka ham kö Jerusalema at ame he ka hom ûthumetu ae so.

²⁸ Ke oge me wâ, ke ba at, ke ba at ha bongon unyidra, ke oge me hnei ödra, ke ba at ae khana thu ge ke hofuc.

²⁹ Wâ bi, ödra hia, e ûnyi baû me ba onyen anyidra je huliwa: ang thibi, me monu but anyidra ta je hnatheat adre okoiâ.