Isaia 40 - Iaai Bible 1901 (New Caledonia)

¹ ÖTUBWELÂ ju öbun, otubwelâ ju öbun lakeik, haingen Khongubun.

² Ha thö hofuc ae kaukahwa kö Jerusalema, ke hongot dö kâu a ga um dö bonginy vec, ke adre hia but thang degecâ anyin hulo; a hia but kap ûnyi ga Iehova hna olo bi hwaban anyin ta je hulo hia.

³ Ifucin at ame hongot, ka habe, Penapena thʼ öbun gethen de Iehova hnyi hnyebuba, okhabalavâ hna cit gethen hobi kâu Khonguta hnyi hnyei baga.

⁴ Adre me he ka ogöranyâ ta je hnyigöuleny bucen hia, ke adre me he ka ohnyikânâ ta je bucen me ta je hut hia: ke adre me he ka owisa ta je dok ae hwahwali, ke adre me he ka othahonâ ta je dok ae ûjejöng:

⁵ ke adre me he ka omanenâ hmanenangi Iehova, ke ame he ka tha wâ hnen tavat hia thithö: anyin a ha hnen hnyimö Iehova.

⁶ Ifucin ke at ame ha, ka habe, Hongot dö. Ke haingen ke at, ka habe, Oge me he ka hongoti ieû? Hna önying tavat hia thithö, ke helâ me vongon hnyot hmanenanginy:

⁷ ame meleca hna önying, ke ame kolu vongon; anyin ame tûâ hon e homenö Iehova: e hnathu a hna önying tavat.

⁸ Hna önying ame meleca, ke vongon ame kolu: ke tethmâ bi nyiele balua hofuc hwan Khonguta.

⁹ At ame omanenâ ûthumetu ae so kö Ziona lö, ölö thö ka hnyi bucen ae beû gorany; at ame omanenâ ûthumetu ae so kö Jerusalema lö, fuc hwege thö; fuc hwege thö goranyai ca ot bi; ha thö ka je tauniny Juda, ka habe, Wâ bi, Khongubun!

¹⁰ Wâ bi, ame he Than Iehova ka o helâ me at ae man, kʼ ame he benyin ka musi hobi kâu e bi: wâ bi, e unyin hwaban, ke e hnyi hnyimakan hwaban anyin huliwa.

¹¹ E ame he ka han haleny hnahat mamoe helâ me at tuö mamoe, e ame he ka hom tilâ lakon mamoe hnyi li benyin, me kop ödra hnyi ûlainy, me omi alen je hnyat adre me ûasin.

¹² Ia tuluto köiö hnyi thopiny hnyamen, ke tuluto drany ge banyen, ke hitangen hnyi tulut sesâiny hmeledrany, ke tuluto ihmakiny ta je bucen, ke ta je hut bi hnyi tulut?

¹³ Ie at a tuluto hanu Iehova, ke ia obotkonginy me me ometâ e?

¹⁴ E ame ûhnenamö me ia, me me nâ e, ke ûne kâu hnyi gethen deny hna owisa, me nâ e he ka khana wâhmakhmeto, me okhana e hnyi gethen deny wâ ûnykûme?

¹⁵ Wâ bi, haba je hnyei me helâ me ûkhulainy baket, kʼ adre me ûnykûmi ödra me helâ me kânâ hnyi ûnyi hnân tulut: wâ bi, e ame kap goranyai je bomene helâ me ûnyi ae ti ûhnyûkong hmonyin.

¹⁶ Ke ca ûcû bi Lebanona hnân thong, ke ca ûcû bi ta je menoiny hnân hudiny leû.

¹⁷ Haba ta je hnyei hia, me helâke ba hnyi hnyimakan; ke ti ba me ba onyen hnyi ûnykûmenen.

¹⁸ Awe, öbun e he ka oûco Khong me ia? ke ewa ûhöûcû, mʼ öbun e he ka oûco mē?

¹⁹ Haba at huliwa ame okoiâ hnatheat, kʼ ame tube e ge gol hnen at ame huliwan gol, kʼ ame le je tö sileva hobi kâu e.

²⁰ Ke haba at ae ba ta ûnyi, me ame ûca ûö ame ca he ka amam bi; e ame elâm hobi kâu bi ke at ae metâ huliwa he ka penapena hnatheat a ûnyi ame ca he ka bwebwet.

²¹ Hawa, e ca khanʼ öbun? öbun e ca long? kʼ adre ca thumetu öbun ûnyi hnyi can? kʼ öbun e ca wâhmakhmeto hwân hnyi hna bi taben hmeledrany?

²² E at ame laba hon wathelabainy hmeledrany, ke helâ me ta je wahamon tavat adre me labā e; at ame ulolo drany helâ me imano, kʼ ame ulolo e me helâ me uma mano adre me laba hnyin:

²³ at ame oûnyûkongo me oba je than; at ame wia tavat owisa hmeledrany mʼ adre me ûnyi baû bi.

²⁴ Eke, adre me tiga ca te ödra, kʼ adre me tiga ca konim ödra; eke e tiga ca hu wân anyidra hnyiban eû hnyi kânâ; me e ame tûʼ ödra, me adre me meleca thö, ke haba weneû ame tûâ degeci ödra helâ me thatûnyin hwit.

²⁵ Ke öbun e he ka oûcû nya me ia, mʼ oge me he ka tha ûcû mē? ame ha At ae Kap.

²⁶ Bwela thʼ öbun goranyai, me wâ, ia op ta je ûnyi e, ke ame su anyidra ta je dö hnyi ûseidra: e ame ve hawâ ta je iödra hia thithö; ke haba hnyi ûganiny maniny man, ke can hwegien ae gan, me ame ca hia bi khaca.

²⁷ Anyin a ieû gam Jekob u me ha, ke u Isaraela u me fuc, ka habe, E iyong kö Iehova dek gethen, ke a he but ûnyi ge Khonguk hna owisa könya?

²⁸ Hawa, e ca khanö u î u me ca long? a Khong nyiele balua, a Iehova, at a op je can hmeledrany e ame ca mat, me sēnyin; ca hnân bi wâ anyin metâ.

²⁹ E ame ha hwegien at ae sēnyen, me ham gânâ hwege ka at ae ba maniny.

³⁰ Ke ame he je thoth ka mat me sēnyin, ke ame he je wahidröu ka ta but:

³¹ ke ame he tavat adre me halubahing Iehova ka ohâtâ tang hwegiödra; adre me he ka gâ goranyai ge je labenyidra helâ me aeto; adre me he ka wadring, ke adre me ca he ka mat; adre me he ka he, me ca he bi ka sēnyin.