Isaia 39 - Iaai Bible 1901 (New Caledonia)

¹ HNYI ûen eling haba Merodaka-baladana nöku Baladana, than Babulona ame kunâ je tusi me je bwihlany kö Hezekia; anyin ame long ut a ga ne mokcu ke a möt hmetu thö.

² Me Hezekia ame senyin ködrin, me omanenâ ködrin tang omjehen, wale sileva me gol, me je uto ae bo so, me wakaco ae so, me uma umen omjehen vat hia, me ta je ûnyi hia eû hnyi tang omjehen: e ba ke ûnyi hnyi umen uma me hnyi dokhon dokhu hia a ca omanenâ Hezekia ködrin.

³ Me haba Isaia perofeta ame he kö Hezekia than me ha kâu, ka habe, Ieû hna ha hnen tavat e? ke ûhedrin ua köu î Me Hezekia ame thu ka habe, Ûhedrin hnyi hnyei ae sâkâû ka o könya, wale Babulona.

⁴ Ke haingen, ka habe, Ieû ödrin e hamâ hnyi umâm uma? Ke Hezekia ame thu, ka habe, Ödrin e hia but wâ ta je ûnyi hia thithö hnyi umök uma: e ba ju ke omjehek oge me ca omanenâ ködrin.

⁵ Me Isaia ame ha kö Hezekia, ka habe, Long ju hofuc ho Iehova tuhan sabaoth.

⁶ Wâ bi, ame he ka o ta je bong, me adre me he ka tha hom Babulona ai ta je ûnyi hnyi umâm uma, me ta je ûnyi a hip hnen lakâmâm ke ne o but hnyi bong ang: ke ame he ka ba kolon ame ha Iehova.

⁷ Ke haba ke je lakon ame he ka o ûnyi gam, a je mâtrânâm, adre me he ka hom dö; adre me he ka hnân je eunuka hnyi hnyaban than Babulona.

⁸ Haba Hezekia ame ha kö Isaia, ka habe, E so hofuc ho Iehova wale u me ha. Ke e ame ha minya, ka habe, Ame he ka hu ûsoköu me hnathu hnyi bonguk ta je bong.