Isaia 38 - Iaai Bible 1901 (New Caledonia)

¹ KE haba hnyi ûen eling ame he but Hezekia ka mok. Ke ame o kâu Isaia perofeta nöku Amosa me ha kâu, ka habe, Walang hna ha hnö Iehova, ka habe, Ûhûneköu thö me ânyâm lap; anyin a u me he but ang ka mok, ke u me ca he bi ka möt.

² Me Hezekia ame wia hnyimakan ka hnyi hnyeige uma, me hic kö Iehova,

³ me ha, ka habe, Iehova lö, u na he ju ka ûnykûme walang ang hnok hna he hnathu hnyi hnyimâkâm me hnyok ae wisa, ke ânyâ so hnyi hnyimâkâm. Ke Hezekia ame tenge hwege.

⁴ Ke ame o but hofuc ho Iehova kö Isaia, ka habe,

⁵ He thö me ha kö Hezekia, ka habe, Walang hna ha hnö Iehova Khongu Davita a kibâm, ka habe, Oge hia but long hijâm hic, me wâ ta je deköiâm: me wâ bi oge, me he ka bi hanen bongom je bong a fiftin je huna.

⁶ Ke oge me he ka omeli u me taun ang ûnyi hnyi hnyamen than Asuria: ke oge me he ka bi singiny taun ang.

⁷ Ke walang haten köu ûnyi ga Iehova, a gʼ ame he Iehova ka ânyâ ûnyi eang e ame ha:

⁸ wâ bi, oge me he ka ohmeto hmenon hnyi hon wacuat, waleji ame dit hnyi haten seûno anyi Ahaza, he ka hmetuhmetu ten je haten. Me ame hmetu seûno hnyi ten je haten waleji ame dit hnyin.

⁹ Tusi anyi Hezekia than Juda hnyi anyin mok, ke ame möt hmetu hnyi hna ûâ.

¹⁰ Oge me ha, ka habe, Hnyi jebigöiny bonguk je bong oge me he ka he ka hnyi homagouleny erkemok: Ke adre hûgûnö nya kolon je hunaik.

¹¹ Haingök, Oge me ca he ka ō Ja, wale Ja hnyi hnyei iny tavat ae möt: Oge me ca he hmetu ka wâ at unyin i tavat adre me labā hmeledrany.

¹² Adre oc anyik dö, ke adre hom ûnyi gak helâ me uma mano umen at tuö mamoe: Oge hia but vhec anyik möt helâ me at ame hwâwâ mano; e ame he ka subâ degeci nya ûnyi hnyi hna tuhuny: U me he ka bi obiny gak hwân hnyi lany ke ne o but hnyinghet.

¹³ Inya oge me hok hnyok ke ne o but hnyi hnyomakatu; ke e ame thu je jeiok hia helâ me liona: U me he ka bi obiny könya hwân hnyi lany ke ne o but hnyi lit.

¹⁴ Inya oge me fufuc helâ me wahalep me âiâ, Inya oge me tenge helâ me biny; e hanenak ut li emakök anyin bwela göranyai; Iehova lö, iny vec, u na he ju ka sing nya.

¹⁵ Ieû oge me he ka ha? e ame hia but ha könya, ke e bi at ame ânyâ: Oge me he ka omis he hnyi ta je hunaik hia can vecin hnyekuk.

¹⁶ Than lö, ame möt at hnen ta je ûnyi eling, Ke e bi eû hnyin hia anyik möt: Anyin a wale ö u osoi nya me omeli nya.

¹⁷ Wâ bi, inya hnahic ut ûnyi hnyi vec ae gan hmâ: Ke u je hia but betenge ge hanuk me omelo ûnyi hnyi monop ae bon; Anyin a u je hia but khûâ hotom ai anyik ta je hulo hia.

¹⁸ Anyin ame ca he erkemok ka oganö u, e ca khana mok he ka haisoi u: E ca khana tavat adre me dit ka hnyi thop ka gejon ânyâm hnathu.

¹⁹ Ame he at ae möt ka oganö u, a at ae möt, helâ me hnok hna ânyâ hnyi bong ang: Hamen kamen he ka omanenâ ânyâm hnathu ka lakon.

²⁰ Iehova ame tot he ka omeli nya: Anyin a wale ate me he ka hai hwanyik je khumöng tha e me je ûnyikhumöng ae hu toiny. Hnyi ta je bonginy anyita möt, hnyin uma umo Iehova.

²¹ Ke haba Isaia ame hia but ha, ka habe, E so adre me hom hmata a wan meta, me ip hon ohuc hnân bubuny, me e ame möt dö.

²² Ke a hia but minya ha ga Hezekia, ka habe, Ieû haten a oge me he ka he hnyi uma umo Iehova?