Isaia 36 - Iaai Bible 1901 (New Caledonia)

¹ KE haba hnyi huna a fotini Hezekia than, me ame o but Saneribi than Asuria ka vat me je taun adre up veten hnyi Juda, me hûgûnâ.

² Ke haba than Asuria ame kunö Rabesake ûheny Lahisa Jerusalema ai kö Hezekia than me utbavat ae gan hmâ. Ke e ame tot hnyi deny köiö ethö, hnyi gethen ame he ka hnyi utkânâ anyin at ame hnû khaû.

³ Me ame o but kâu Eliakima nöku Hilekia, at ame muso hnyaba, me Sebena at sihnalimen, me Joa nöku Asafa at ame oûnykûmeâ.

⁴ Ke Rabesake ame ha kodra, ka habe, Ha thö walang ang kö Hezekia, ka habe, Walang hna ha hnen than ae gan, a than Asuria, ka habe, Ie ûnyi e u me labageju kâu?

⁵ Haingök a haba ânyâm metâ me tang hwegiâm hobi kâu vat, me wale je hofuc baû thibi: ke u me labageju kö ia waleling mʼ u me bi gan könya?

⁶ Wâ bi, u me labageju ka uci hlowe ae mita eû, wale Aigupito; ke e ka hlec hnyiban e ge at, me ame he ka dâoâ hnyamen: ke helâe Farao than Aigupito kodra hia adre me labageju kâu.

⁷ Ke u je ne ha könya, ka habe, Öhmun e labageju kö Iehova Khonguhmun; hawa, ca anyin je dok ae gorany me anyin je taben hut waleji a ohia hnö Hezekia, me ha ka at Juda me Jerusalema, ka habe, Öbun e he ka hic hnyi hnyimakan taben hut ang?

⁸ Ke walang ang, u na he ju ka uhihinyköu me tuhok thaniny Asuria, ke oge me he bi nya ka ham köu lo li thauzan je hors a ne khanö u he ka ve bi at he ka tabʼ ödrin.

⁹ Ke u me he ka kâmâu ka ohmeto ke taben vat ae ûhnyûkong hmonyin unyin lathnyabainy tuhok, me labageju kö Aigupito hobi kâu je kariota me tavat tabö hors?

¹⁰ Ke hawa, oge me o but ka hnyei ang ka ohia e, ke a ca musi bi Iehova? Haba Iehova ame ha könya, ka habe, He thö ka hnyei eang me ohia e.

¹¹ Me haingö Eliakima, me Sebena, me Joa, kö Rabesake, ka habe, Ö u fuc ka lathnyabaem hnyi hwen Suria; anyin ae khanʼ öhmun e: ke ca fuc köhmun hnyi hwen Juda wâ e nye long dö tavat hon hna up haginy.

¹² Me Rabesake ame thu, ka habe, Hawa, a kunö nya tuhok ka tuhâm möu minya he ka ha hofuc e? hawa, a ca kunö nya ka tavat adre me laba hon hna up haginy, mʼ adre me an tidra tatet me ijem hnödra hna hwen hingat tha ödra möbun?

¹³ Ke haba Rabesake ame tot me hongot hwege goranyai hnyi hwen Juda me ha, ka habe, Long ju hofuc hwan than ae gan a than Asuria.

¹⁴ Walang hna ha hnen than, ka habe, Ca hna but kö Hezekia he ka iyâwʼ öbun; anyin ae ca khana he ka omeli öbun:

¹⁵ ke haba khaca e so ame ca he Hezekia ka kunʼ öbun he ka labageju kö Iehova, ame ha, ka habe, Ame he Iehova ka omeli öta; ke ame ca he ka hna taun ang ka hnyi hnyamen than Asuria.

¹⁶ Ca he öbun ka ling Hezekia: anyin a walang hna ha hnen than Asuria, ka habe, Ûsoköu thö mönya, me he könya; ke öbun e he ka ve an wan anyibun vine me halebun je elaio, me ve ijem je an öbun e koû:

¹⁷ ke ne o but oge me o me hum öbun ka hnyi hnyei helâ me ibun hnyei, hnyei ae hu hwit me waina, hnyei ae hu areto me je hnyei vine.

¹⁸ Wâ wia wâ e nye he Hezekia ka iyâûʼ öbun, me ha, ka habe, Ame he Iehova ka omeli öbun. Hawa, e hu hna omelo tavat hnen je khongon je hnyei ûnyi hnyi hnyamen than Asuria?

¹⁹ Ewa je khongon Hamath me Arefada? ewa je khongon Sefaravaima! hawa, ödrin e hia but omeli Samaria unyi hnyi hnyamok?

²⁰ Ewa je khongon je hnyei a hnyat adre hia but omelo idra je hnyei ûnyi hnyi hnyamok, me me he Iehova ka omeli Jerusalema ûnyi hnyi hnyamok?

²¹ Ke adre me laba hnyibû, me ca thu kâu ge ke hofuc, anyin a hûna than, ka habe, Ca he ka thu kâu.

²² Me haba Eliakima nöku Hilekia at ame muso hnyaba, me Sebena at sihnalimen, me Joa nöku Asafa at oûnykûmeâ, me ödrin e he kö Hezekia me je ûkhaû adre kia, me thumeto e ge je hofuc ho Rabesake.